ក្រុងសេអ៊ូល: សម្រាប់ពលរដ្ឋ កូរ៉េខាងត្បូង ការស្វែងរកកន្លែងស្ងប់ស្ងាត់ពីជីវិត ដ៏មមាញឹកសព្វថ្ងៃ គុកក្លែងក្លាយ ២៤ ម៉ោង កំពុងផ្ដល់សេវាកម្ម «អារម្មណ៍សេរីភាព» សម្រាប់ពួកគេ។
ឈ្មោះ «គុកក្នុងចិត្ដខ្ញុំ» សេវាកម្មគេចចេញពីជីវិតដ៏អាប់អួលមួយរយៈយកតម្លៃ ៩០ ដុល្លារមករស់បែបស្ងប់សុខ ២៤ ម៉ោង។
តាំងពីបើកសម្ពោធក្នុងឆ្នាំ២០១៣ គុកក្លែងក្លាយ ស្ថិតក្នុងក្រុង Hongcheon បានរៀបចំកម្មវិធីឲ្យបុគ្គលិកការងារស្ដ្រេស និងសិស្សនិស្សិតជាង ២ ពាន់នាក់ស្វែងរកជីវិតស្ងប់សុខដោយគេចចេញពីការញាំញីក្នុងប្រទេសដែលទាមទារឲ្យមានការអប់រំខ្ពស់ និងបរិយាកាសការងារដ៏ប្រកួតប្រជែង។
នៅក្នុងគុក មិនត្រូវបានឲ្យអ្នកទោសទាក់ទងទៅពិភពខាងក្រៅទាំងអស់ សូម្បីតែការប្រើទូរស័ព្ទ នាឡិកា និងកញ្ចក់ជាដើម។ អតិថិជននិយាយថា ភាពឯកោទាំងស្រុងនេះអនុញ្ញាតឲ្យពួកគេសម្រាក និងគេចចេញពីជីវិតដ៏គួរឲ្យធុញថប់ទាំងពួង។
ក្នុងបន្ទប់ត្រឹម ៥ ម៉ែត្រការ៉េ ចំនួន ២៨ បន្ទប់ អ្នកទោសចំណាយពេលស្ទើរតែទាំងស្រុងក្នុងបន្ទប់ដែលមានតែសៀវភៅកំណត់ត្រាប្រចាំថ្ងៃ កម្រាលយោគៈ និងប៊ូតុងអាសន្ន តែពួកគេក៏អាចចូលរួមសកម្មភាពជាក្រុមផងដែរ បើចង់។
អតិថិជនដ៏ត្រូវពាក់ខោអាវអ្នកទោស និងបម្រើអាហារតាមប្រឡោះទ្វារផងដែរ។ ការសិក្សាមួយពីអង្គការសហប្រតិបត្ដិការសេដ្ឋកិច្ច និងអភិវឌ្ឍ (OECD) បានរកឃើញថា ពលរដ្ឋកូរ៉េខាងត្បូងធ្វើការជាមធ្យម ២០០០ ម៉ោងក្នុងឆ្នាំ២០១៧ ដោយត្រូវបានចាត់ទុកជាអ្នកធ្វើការលើសម៉ោងច្រើនបំផុតនៅអាស៊ី។
អត្រាអត្ដឃាតក្នុងប្រទេសក៏មានស្ថិតិខ្ពស់បំផុតមួយក្នុងលោក ដែលលើសពលរដ្ឋនៅអាមេរិកជាងពាក់កណ្ដាល។ អតិថិជនវ័យ ២៨ ឆ្នាំ ផាក ហេរី បាននិយាយថា៖ «ប្រាកដណាស់ ខ្ញុំមានអារម្មណ៍ថា គុកនេះធ្វើឲ្យខ្ញុំមានសេរីភាព»។
សហស្ថាបនិក ណូ ជី-យ៉ាង បាននិយាយថា គំនិតផ្ដួចផ្ដើមបង្កើតគុកសម្រាកនេះកើតឡើងដោយសារស្វាមីអ្នកស្រី ជារដ្ឋអាជ្ញា ដែលតែងតែធ្វើការងារប្រមាណ ១០០ ម៉ោងក្នុងមួយសប្ដាហ៍។
អ្នកស្រី បន្ដថា៖ «ដំបូង អតិថិជនមានអារម្មណ៍ធុញថប់នឹងបន្ទប់តូចចង្អៀត។ ប៉ុន្ដែក្រោយពីបានស្នាក់នៅ ពួកគេនិយាយថា វាជាគុកដែលពួកគេចង់វិលវិញ»៕ AFP/HR