.jpg)
រូបតំណាង : ការលក់គ្រឿងស្រវឹងត្រូវបានកំហិតមិនឲ្យរំលងអ្រធាត្រ។ រូបថត AFP
ក្រុងស៊ីដនី៖ ការកម្សាន្តពេលរាត្រីដ៏សោះកក្រោះនៅទីក្រុងស៊ីដនីឆាប់ៗនេះ នឹងទទួលបានការយោគយល់ដោយអជ្ញាធរបានប្រកាសលុបចោលច្បាប់កំណត់ម៉ោងចរាចរណ៍លក់ និងក្រេបគ្រឿងស្រវឹង។
អគ្គទេសាភិបាលរដ្ឋញូវសោតវែល បានប្រកាសថា ម៉ោងពេលដំណើរការតៀមស្រានឹងពន្យារពេល ហើយច្បាប់ទម្លាប់ក្នុងការផឹកគ្រឿងស្រវឹងក្រោយវេលាអាធ្រាត្រ ក៏ត្រូវបានបន្ធូរបន្ថយនៅតំបន់ភាគច្រើននៃក្រុងស៊ីដនី។
លោកស្រី Berejiklian បានថ្លែងថា៖ «យើងត្រូវតែធានាថា យើងមានសេដ្ឋកិច្ចពេលរាត្រីដ៏ស្រស់បំព្រង រឹងមាំ និងរស់រវើក ហើយវានឹងឆ្លុះបញ្ចាំងពីស្ថានភាពរបស់យើងក្នុងនាមជាទីក្រុងលំដាប់សាកលលោកតែ ១ គត់របស់អូស្ត្រាលី»។
សម្រាប់ទីក្រុងដែលល្បីខាងពិធីជប់លៀងរាត្រីចូលឆ្នាំសកល ដ៏ជោរជន់ដោយគ្រឿងស្រវឹងនោះ ស្រារ៉ាំ (rum) ជាជម្រើសសម្រាប់អ្នកផឹកពីក្បាលព្រលប់ ខណៈយប់បន្តិចទីក្រុងស៊ីដនីបែរជាស្ងប់ស្ងាត់។
ក្រោមឥទ្ធិពលច្បាប់ចាក់សោទ្វារ បារ៍ត្រូវបិទត្រឹមម៉ោង ១ កន្លះរំលងអាធ្រាត្រ។ ទន្ទឹមនឹងនោះ ក៏មានបម្រាមលើការលក់ដូរស្រាក្រឡុក និងស្រាបៀរដាក់កែវ ក្រោយពីពាក់កណ្ដាលអាធ្រាត្រផងដែរ។
រូបតំណាង : ពលរដ្ឋខ្លះ ចាត់ទុកក្រុងស៊ីដនីខ្វះរសជាតិការកម្សាន្តរាត្រី។ រូបថត AFP
ច្បាប់ទម្លាប់ដាក់កំហិតម៉ោងពេលស៊ីផឹកនេះ ត្រូវបានអនុវត្តនៅដើមឆ្នាំ ២០១៤ ដើម្បីកាត់បន្ថយអំពើហិង្សាក្រោមឥទ្ធិពលគ្រឿងស្រវឹង។
ដោយសារតែច្បាប់នេះ សូម្បីតែតារាចម្រៀងប៉ុបល្បីៗដូចជា ម៉ាដូណា និងចេស្ទីន ប៊ីប៊ើរ មិនអាចចូលរួមកម្មវិធីតង់ទី ២ របស់ពួកគេ ដោយសារតែពួកគេមកដល់យឺតពេលក្រោយពីចប់កិច្ចការច្រៀងសម្ដែង។
យោងតាមវិបសាយស្ទាបស្ទង់មតិ TimeOut.com ទីក្រុងស៊ីដនីជាប់ចំណាត់ថ្នាក់លេខ ៣៩ ជាទីក្រុងល្អបំផុតក្នុងលោកប្រចាំឆ្នាំ ២០១៩ ដោយសារតែពលរដ្ឋរបស់ខ្លួនបានបោះឆ្នោតដាក់ងារទីក្រុងនេះថា «ទីក្រុងដែលមានជីវិតពេលរាត្រីដ៏សោះកក្រោះបំផុតក្នុងលោក»។
ទីក្រុងនេះនឹងស្វាគមន៍ជីវិតកម្សាន្តពេលរាត្រីដ៏រសើរវើក នៅពេលច្បាប់ដកកំហិតលើគ្រឿងស្រវឹងនៅក្រុងស៊ីនដី នឹងចេញជាធរមាននៅថ្ងៃទី ១៤ ខែមករា ខាងមុខនេះ៕ AFP
