.jpg)
ក្រុមភាពយន្តផ្កាឈូករ័ត្នពេលដំណើរការបង្រៀនថតភាពយន្តឯកសារសម្រាប់មហោស្រពភាពយន្តខ្លីចតុមុខឆ្នាំនេះ។ រូប សហការី
ភ្នំពេញៈ តាមរយៈគម្រោងមួយដែលមានឈ្មោះថា «តោះថតឯកសារកម្ពុជា» គឺជាគម្រោងមួយដែលបានបង្កើតឡើងដោយក្រុមភាពយន្តផ្កាឈូករ័ត្ន នៅក្នុងគោលបំណងបណ្តុះបណ្តាលដល់ប្រជាជនកម្ពុជា ជាពិសេសយុវជនខ្មែរឲ្យមានជំនាញគ្រប់គ្រាន់នៅក្នុងការថតទុកអ្វីដែលទាក់ទងនឹងបញ្ហា «សេរីភាពក្នុងការបញ្ចេញមតិ» និង «សេរីភាពទទួលបានព័ត៌មាន» ថែមទាំងដើម្បីត្រៀមខ្លួនសម្រាប់ការចូលរួមប្រកួតកម្មវិធីមហោស្រពភាពយន្តខ្នាតខ្លីចតុមុខប្រចាំឆ្នាំ ២០១៩ នៅខែកញ្ញាខាងមុខទៀតផង។
លោក គាំ វុត្ថា ប្រធានគ្រប់គ្រងផ្នែកព័ត៌មាននៃកម្មវិធីមហោស្រពភាពយន្តខ្នាតខ្លីចតុមុខបានប្រាប់ភ្នំពេញ-ប៉ុស្តិ៍ឲ្យដឹងថា៖ «ក្រុមការងារ «តោះថតឯកសារកម្ពុជា» គឺក្រុមភាពយន្តផ្កាឈូករ័ត្នបានបើកនូវវគ្គបណ្តុះបណ្តាលអ្នកចូលរួមចំនួន ៣០ នាក់ដោយបានបែងចែកជា ៦ ក្រុមហើយក្រុមនីមួយៗមានសមាជិកចំនួន ៥ នាក់។ ក្រុមទាំង ៦ នេះតម្រូវឲ្យចូលរួមសិក្សាវគ្គបណ្តុះបណ្តាលដែលទាក់ទងនឹងដំណើរការនៃការថតភាពយន្តឯកសារ។
វគ្គបណ្តុះបណ្តាលនេះមានរយៈពេលចំនួន ១០ ថ្ងៃដោយបានចាប់ផ្ដើមពីថ្ងៃទី ១១ រហូតដល់ថ្ងៃទី ២០ ខែមិថុនា ឆ្នាំ ២០១៩ កន្លងមក។ បន្ថែមពីនេះទៅទៀត ក្រុមនីមួយៗតម្រូវឲ្យផលិតខ្សែភាពយន្តខ្លីក្រោមប្រធានបទទាក់ទងនឹងរឿង «សេរីភាពក្នុងការបញ្ចេញមតិ» និង «សេរីភាពទទួលបានព័ត៌មាន» ដោយត្រូវបង្កើត ១ ក្រុម ១ រឿងផងដែរ»។
ក្រុមយុវជនទទួលបានការណែនាំពីរបៀបថតភាពយន្តឯកសារ។ រូបថត សហការី
លោក គាំ វុត្ថា បន្តថា៖ «ពិសេសជាងនេះទៀតរឿងទាំង ៦ របស់ក្រុមពួកគាត់ក៏នឹងត្រូវយកទៅចាក់បញ្ចាំងក្នុងកម្មវិធីមហោស្រពភាពយន្តខ្នាតខ្លីចតុមុខ ដែលនឹងប្រព្រឹត្តទៅក្នុងខែកញ្ញាខាងមុខនេះផងដែរ ខណៈការបណ្តុះបណ្តាលពីអ្នកជំនាញថតខ្សែភាពយន្តអំពីការសរសេរស្គ្រីប (Script) ឬគម្រោងតែងវិធីសាស្ត្រក្នុងការធ្វើការជាមួយនឹងតួសម្តែង និងការកែសំឡេង»។
គូរបញ្ជាក់ដែរថាកម្មវិធីមហោស្រពភាពយន្តខ្នាតខ្លីចតុមុខ (CSFF) បង្កើតឡើងក្នុងគោលបំណងទទួលយកខ្សែភាពយន្តខ្លីៗទាំងអស់ពីជុំវិញពិភពលោក និងស្វាគមន៍រដូវកាលថ្មីឆ្នាំ ២០១៩នេះបានបើកប្រកាសទទួលរឿងពីសមិទ្ធកររឿងខ្លីផ្នែកភាពយន្តឯកសារផងដែរ ដើម្បីជាការលើកទឹកចិត្តទៅដល់ក្រុមយុវសមិទ្ធករ ឬផលិតករវ័យក្មេងខ្មែរយើងឲ្យពួកគាត់អាចបង្ហាញពីទេពកោសល្យរបស់ខ្លួនទៅកាន់ពិភពលោកតាមរយៈស្នាដៃភាពយន្តខ្លួនទៀតផង។
ខណៈកម្មវិធីមហោស្រពភាពយន្តខ្នាតខ្លីចតុមុខឆ្នាំ ២០១៩ ដែលជាការប្រារព្ធធ្វើលើកទី ៨ នេះបានរៀបចំឡើងដោយក្រុមភាពយន្តឈូករ័ត្ន- Sunflower Film Alliance (SFA) ដោយបានចាប់ផ្តើមទទួលស្នាដៃខ្សែភាពយន្តខ្នាតខ្លី ទាំងជាស្នាដៃរបស់ផលិតករខ្មែរ និងបរទេសចាប់តាំងពីដើមខែមីនា មក និងការឈប់ទទួលរឿងនៅត្រឹមថ្ងៃទី ១២ ខែកក្កដា ឆ្នាំ ២០១៩។
ជានិច្ចកាលសម្រាប់កម្មវិធី CSFF នឹងជ្រើសរើសភាពយន្តខ្លីដែលមានភាពលេចធ្លោ ខណៈសម្រាប់ឆ្នាំទី ៨ នេះនៅក្នុងពាក់កណ្តាលខែកក្កដាហើយម្ចាស់ជយលាភីនឹងត្រូវបែងចែកជា ៤ ប្រភេទគឺទី ១ ភាពយន្តខ្លីឆ្នើមរបស់កម្ពុជាទី ២ ភាពយន្តខ្លីឆ្នើមបន្ទាប់ទី ៣ ជារង្វាន់ទស្សនិកជនដល់ភាពយន្តខ្លីក្នុងស្រុក និងទី ៤ ជារង្វាន់ទស្សនិកជនទៅដល់ភាពយន្តខ្នាតខ្លីរបស់អន្តរជាតិ។
មហោស្រពភាពយន្តខ្នាតខ្លីចតុមុខប្រចាំឆ្នាំ ២០១៩ នេះត្រូវលោក គាំ វុត្ថា បន្ថែមឲ្យដឹងថានឹងមានការប្រគល់នូវរង្វាន់ជយលាភីនៃវគ្គផ្តាច់ព្រ័ត្រមានចំណាត់ថ្នាក់ពីលេខ ១ លេខ ២ និងលេខ ៣ វិញហើយសម្រាប់វណ្ណកម្មភាពយន្តខ្មែរ ខណៈវណ្ណកម្មបរទេសមានតែ ១ រង្វាន់ប៉ុណ្ណោះ។ ចំពោះកម្មវិធីផ្លូវការចុងក្រោយនៃមហោស្រពភាពយន្តខ្លីចតុមុខឆ្នាំ ២០១៩ នេះនឹងធ្វើនៅថ្ងៃទី ៥ រហូតដល់ទី ៨ ខែកញ្ញា ឆ្នាំ ២០១៩ ខាងមុខនេះហើយ៕
