ក្រុងប៉ារីស៖ គ្រងឈុតប៊ីគីនី និងខ្លះទៀតអាក្រាតទទេស្អាត មនុស្សទាំងប្រុសទាំងស្រី បាននាំគ្នាប្រារព្ធប្រពៃណីអ្នកធម្មជាតិនិយម ដោយចុះងូតទឹកសមុទ្រអបអរការមកដល់នៃឆ្នាំ ២០២០ នៅឆ្នេរអាក្រាតកាយ Le Cap d''Agde ឯតំបន់ Herault ប្រទេស បារាំង កាលពីថ្ងៃទី ៣១ ខែ ធ្នូ ឆ្នាំ ២០១៩។
ស្ថិតក្រោមកម្ដៅព្រះអាទិត្យ មេឃស្រឡះ និងសីតុណ្ហភាពត្រជាក់ ១៣ អង្សាសេ អ្នកធម្មជាតិនិយមជាង ៤០០ នាក់ បានមកចូលរួមប្រារព្ធនូវប្រពៃណីអាក្រាតកាយ ដោយជម្រុះសម្លៀកបំពាក់រួចចុះទឹកនៅថ្ងៃចុងក្រោយនៃឆ្នាំចាស់។
នេះជាការប្រារព្ធប្រពៃណីងូតទឹកស្រាតដំណាច់ឆ្នាំ លើកទី៣០ ហើយសម្រាប់ក្រុមអ្នកធម្មជាតិនិយម នៅឆ្នេរដែលអនុញ្ញាតឲ្យមានការដើរហើរ និងងូតទឹកសមុទ្រក្នុងសភាពអាក្រាតកាយ។
ប្រទេស បារាំង ជាទិសដៅទេសចរណ៍អាក្រាតដ៏ល្បីល្បាញសម្រាប់អ្នកធម្មជាតិនិយម ជាមួយចំនួនអ្នកលម្ហែកាយដោយការស្លៀកខ្យល់ដណ្ដប់មេឃដល់ទៅជាង ៤ លាននាក់ឯណោះ ជារៀងរាល់ឆ្នាំ។
ជាមួយសមាជិកអាក្រាតជាអ្នកធម្មជាតិនិយម ចំនួនដ៏ច្រើនប្រមាណ ៨៨ ០០០ នាក់ នៅរដ្ឋធានី និងជាយក្រុង ពេលនេះសិទ្ធិសេរីភាពពួកគេកាន់តែទូលំទូលាយ។
យ៉ាងណាមិញ ឆ្នាំនេះអ្នកចូលរួមទាំងអស់ មិនសុទ្ធតែស្រាតននលគកនោះទេ ដោយអ្នកខ្លះមានបិទបាំងកេរ្តិ៍ខ្មាស់តិចតួចដែរ។ ប៉ុន្តែអ្វីដែលសំខាន់ក្នុងកម្មវិធីនេះ គឺភាពក្លាហានក្នុងការចុះទឹកប្រៃទោះបីជាវាត្រជាក់ខ្លាំងប៉ុនណាក៏ដោយ។
ក្រៅពីប្រពៃណីស្រាតងូតទឹកឆ្លងឆ្នាំ អ្នកចូលរួមឆ្នាំនេះក៏តម្រូវឲ្យទិញសំបុត្រ ដែលថវិកាត្រូវបានបរិច្ចាគក្នុងការអភិរក្សសមុទ្រ និងធនធានធម្មជាតិផងដែរ៕ AFP