ក្រុងហាណូយ: ពិធីបុណ្យមួយស្ដីពីកិច្ចការអភិរក្សវប្បធម៌ និងអភិវឌ្ឍសហគមន៍ជនជាតិចាមនឹងត្រូវបានរៀបចំនៅភាគកណ្ដាលខេត្ដភូយេនពីថ្ងៃទី ១៣ ដល់ទី ១៦ ខែសីហា។
ពិធីបុណ្យវប្បធម៌ កីឡា និងទេសចរណ៍លើកទី ៥ រួមមានការចូលរួមពីសហគមន៍ជនជាតិភាគតិចចាម ១១ ខេត្ដ និងក្រុងដូចជាខេត្ដដាណាង ខេត្ដក្វាងណាម ប៊ិញឌិញ និញធួន ប៊ិញធួន តាយនិញ ប៊ិញភួក និងទីក្រុងហូជីមិញ។
ទ្រិញ ធីធុយ អនុរដ្ឋមន្ដ្រីវប្បធម៌ កីឡា និងទេសចរណ៍និយាយថា៖ «វានឹងបង្ហាញពីសាមគ្គីភាពចំណោមសហគមន៍ចាមនៅទូទាំងប្រទេស»។
សកម្មភាពចម្បងៗជាច្រើននឹងរួមបញ្ចូលការសម្ដែងសិល្បៈ សម្លៀកបំពាក់ប្រពៃណី និងការសម្ដែងបែបទេវកថា ពិព័រណ៍រូបថត ព្រមទាំងការប្រកួតម្ហូប និងល្បែងប្រជាប្រិយ។
ភាពវិសេសគឺផ្ដោតលើពិធីទទួលវិញ្ញាបនបត្រតំបន់សិរីរិកធាតុប្រចាំជាតិដ៏ពិសេសសម្រាប់ ថាប់ ញាន (ប៉មញាន) នៅ April 1 Square នាល្ងាចថ្ងៃទី ១៤ ខែសីហាខាងមុខ។
ប៉មញាន ត្រូវបានកសាងដោយជនជាតិដើមចាមពីសតវត្សរ៍ទី ១០ និងទី ១៣ នៅភ្នំញាន ក្បែរទន្លេបាក្នុងសង្កាត់ ១ ទីក្រុងធុយហាវ។ វាជាវិមានចតុកោណកម្ពស់ជ្រុងទាំង ៤ គឺ ២៣,៥ ម៉ែត្រ។
វាជាប៉មចាមតែមួយគត់ដែលនៅសេសសល់ក្នុងខេត្ដ។ គ្រឿងសក្ការៈខាងក្នុងប៉មគឺជាសិល្បៈស្ថាបត្យកម្មចាមល្អឯក និងជាសំណល់ទីសក្ការៈសេសសល់ដ៏តិចតួចបំផុត។
ពេលពិធីបុណ្យ សេវាកម្មទេសចរណ៍ត្រូវបានរៀបចំឡើងដើម្បីលុកលុយតំបន់កម្សាន្ដនានាក្នុងខេត្ដ និងសិក្ខាសាលាស្ដីពីការផ្សារភ្ជាប់វិស័យទេសចរណ៍ ភូយេន និងបណ្ដាខេត្ដភាគខាងត្បូងប្រទេស។
ពិធីបុណ្យនឹងមិនត្រឹមតែផ្ដល់កិត្ដិយស ផ្សព្វផ្សាយ និងបង្ហាញពីកេរដំណែលវប្បធម៌ជនជាតិចាមប៉ុណ្ណោះទេ ប៉ុន្ដែថែមទាំងព្រឹត្ដិការណ៍នោះអាចទាក់ទាញទេសចរមកលេងទាំងភាគកណ្ដាល និងខាងត្បូងផងដែរ។
ក្រុមអ្នករៀបចំព្រឹត្ដិការណ៍នេះមានបំណងបង្កើនមោទនភាពជាតិ និងពង្រឹងសាមគ្គីភាព ព្រមទាំងការយោគយល់គ្នាចំណោមជនជាតិភាគតិចនៅវៀតណាមទាំងអស់៕ VNS/HR