ភ្នំពេញ: តារាកំប្លែងបានសម្រែកស្រួយស្រែស អ្នកនាង ស្រេង សុកាន់ដា ហៅនាង ខ្ញុង ក្រោយពីទទួលទាំងការកោតសរសើរ និងការរិះគន់ស្របគ្នា ក្រោយពីបានបង្ហោះវីដេអូរិះគន់តម្លៃសំណាក់នៅក្រុងព្រះសីហនុនោះ ពេលនេះ អ្នកនាង ខ្ញុង បានអះអាងប្រាប់អ្នកគាំទ្រថា ការងារសិល្បៈ និងជំនួញជាច្រើនមុខទៀតរបស់អ្នកនាង នៅតែកាក់កប មិនថមថយចំណូលព្រោះតែឥទ្ធិពលសម្ដីទាំងនោះឡើយ។
កាលពីអំឡុងបុណ្យអុំទូកកន្លងទៅប៉ុន្មានសប្ដាហ៍នេះ តារាកំប្លែងអ្នកនាង ខ្ញុង បានក្លាយជាប្រធានបទជជែកវែកញ៉ែកក្នុងបណ្ដាញសង្គម ក្រោយពីអ្នកនាងបានលើកឡើងពីតម្លៃស្នាក់នៅដ៏ថ្លៃ ទឹកដីខេត្តព្រះសីហនុ ដែលធ្វើឲ្យអ្នកនាងឆ្អែតចិត្តលែងចង់ទៅតំបន់ឆ្នេរសមុទ្រមួយនេះ។
ទន្ទឹមនឹងការបញ្ចេញមតិរបស់អ្នកនាង ខ្ញុង បានធ្វើឲ្យមនុស្សមួយចំនួនទទូចសុំឲ្យនាងធ្វើការសុំទោសជាសាធារណៈ ក៏មានមតិខ្លះកោតសរសើរនាងថាជាមនុស្សនិយាយត្រង់ ហើយក្នុងនោះក៏មានប្អូនស្រីរបស់លោកនាយករដ្ឋមន្ត្រី គឺលោកស្រី ហ៊ុន ស៊ីណាត បានលើកឡើងថាការលើកឡើងរបស់នាង ខ្ញុង ពិតជាមិនខុសទេ។
តារាកំប្លែងស្រីមានបោះសំលេងក្នុងវិស័យសិល្បៈអស់រយៈពេលជាច្រើនឆ្នាំ ជាមួយភាពក្រមិចក្រមើមប៉ិនប្រសប់ចាប់ដៃគូសមឥតខ្ចោះជាមួយនាយ ពាក់មី ធ្វើឲ្យអ្នកទស្សនាសើចបិទមាត់មិន អ្នកនាង ខ្ញុង បានធ្វើឲ្យមហាជនខ្លះលើកឡើងថា សម្ដីអ្នកនាង ដែលទាក់ទាញចំណាប់អារម្មណ៍ខ្លាំងបែបនេះ អាចជួយឲ្យអ្នកនាងរឹតតែល្បីខ្លាំង ហើយរបររកស៊ីក៏រឹតតែកាក់កបដែរ។ រីឯអ្នកខ្លះទៀតយល់ថា អ្នកនាង ខ្ញុង បញ្ចេញមតិហាក់ដូចជាជ្រុលបន្តិច ដែលអាចធ្វើឲ្យអ្នកនាងបាត់បង់ប្រជាប្រិយភាព។
ជុំវិញទីផ្សារសិល្បៈ និងជំនួញជាច្រើនមុខរបស់អ្នកនាង ខ្ញុង តារាចម្រៀងម្ចាស់បទ «ប្តីខ្ញុំចាស់តែលួចក្បត់ខ្ញុំ» បានផ្តល់បទសម្ភាសទាំងមានការរវល់ខ្លាំងចំពោះមុខរបរកាត់សក់ ធ្វើម្ហូបតុការ លក់សាច់ក្រក ផ្អក និងគ្រឿងសម្អាង នោះ អ្នកនាងបានឲ្យដឹងថា៖ «ខ្ញុំសុំមិននិយាយចំពោះរឿងនេះទេ (រឿងឡើងថ្លៃផ្ទះសំណាក់នៅកំពង់សោម) ព្រោះអ្វីដែលខ្ញុំនិយាយសុទ្ធតែជាពាក្យពិត ហើយខ្ញុំមានការរវល់ណាស់ក្នុងការលក់សាច់ក្រក ធ្វើឲ្យភ្ញៀវមិនចង់ទាន់ផង»។
បើទោះជាមានរឿងអាស្រូវមួយនេះកើតឡើង ទទួលបានទាំងការកោតសរសើរ និងការរិះគន់រួមគ្នាពិតមែន ប៉ុន្តែចំពោះការរកក្នុងរបរលក់សាច់ក្រកតារាស្រីរូបនេះហាក់ទទួលបានការពេញនិយម និងនៅតែលក់ដាច់ជាបន្តបន្ទាប់ ចំណែកការងារសិល្បៈវិញក៏មានការទៅសម្តែងមិនលួសថ្ងៃដែរ។
តារាកំប្លែងស្រីមេម៉ាយកូនមួយ ដែលទើបនឹងសាងគ្រួសារថ្មីជាមួយតារាសម្តែងលោក កៃ ដ អ្នកនាង ស្រេង សុកាន់ដា ហៅនាង ខ្ញុង បាននិយាយដូច្នេះថា៖ «របរមួយនេះពិតជារវល់ពិតមែន ធ្វើឲ្យភ្ញៀវមិនចង់ទាន់ទេ ចំពោះសាច់ក្រកវិញមួយថ្ងៃលក់បានជាង ១០០ គីឡូ ក្នុង ១ គីឡូ ៣ ម៉ឺនរៀល។ បើផ្អកសាច់ជ្រូក និងផ្អកកំពឹសវិញធ្វើប៉ុន្មានអស់ប៉ុណ្ណឹង ហើយមិនងាយបានធ្វើបានលក់ទៀតដល់ទៅ ១០ ថ្ងៃ អីទើបលក់បាន ហើយ ១ គីឡូ ៤ ម៉ឺនរៀល»៕