ក្រុងសាន់ត្យាហ្គោ: ខ្មោចត្រីបាឡែនខៀវមួយក្បាលត្រូវបានមនុស្សម្នានាំគ្នាឡើងជាន់ទន្ទ្រាំថតរូបសែលហ្វ៊ី ដោយមានទាំងស្លាកស្នាមឆូតស្បែកសរសេរអក្សរលើខ្លួនវា ក្រោយពីវាងាប់លើឆ្នេរប្រទេសស៊ីលី។
ត្រីបាឡែនយក្សប្រវែងជាង ២០ម៉ែត្រ បានធ្វើឲ្យភ្ញាក់ផ្អើលដល់អ្នកស្រុកក្រោយពីវាត្រូវបានប្រទះឃើញងាប់ទើរលើ ឆ្នេរពុនតា អារ៉េណាស៍ ក្នុងតំបន់ម៉ាហ្គាល់ឡាណេស។
ប៉ុន្ដែរូបភាពជាច្រើនសន្លឹកដែលត្រូវបានបង្ហោះ បានបង្ហាញពីមនុស្សម្នានាំគ្នាជាន់លើខ្មោចត្រីបាឡែន និងអង្គុយថតរូបលើខ្នងរបស់វា។
ស្លាកស្នាមជើងត្រូវបានមើលឃើញលើសពត្រីបាឡែន ហើយអ្នកប្រើប្រាស់បណ្ដាញសង្គមជាច្រើនបានសរសេររិះគន់ចំពោះទង្វើនេះ។
Carmen Julia Gonzalez Escanilla បានសរសេរថា៖ «មនុស្សយើងកំពុងតែបាត់បង់ការគោរព និងក្ដីអាណិតអាសូរអស់រលីងហើយ»។
រីឯ Xieman Hernandez បានបន្ដថា៖ «ឆ្កួតមែនទែនហើយ! ពីមួយថ្ងៃទៅមួយថ្ងៃ កាន់តែយ៉ាប់។ តើពួកគេមានទឹកចិត្ដជាមនុស្សដែរឬទេ?»។
ពេលនេះសពត្រីបាឡែនត្រូវបានអាជ្ញាធរស៊ីលី យកចេញដើម្បីតាមដានពីមូលហេតុធ្វើឲ្យវាងាប់។ បាឡែនខៀវ គឺជាសត្វធំបំផុតដែលមានជីវិតរស់នៅលើផែនដី។ បាឡែនខៀវធ្ងន់បំផុតត្រូវបានកត់ត្រាថាមានទម្ងន់ ១៩០ តោន៕HR