.jpg)
គ្រូពេទ្យបង្ហាញប្រេងកញ្ឆាដែលចែកជូនពលរដ្ឋដោយឥតគិតថ្លៃ។ រូបថត សហការី
ក្រុងបាងកក៖ គ្លីនិកវេជ្ជសាស្ដ្រមួយក្នុងទីក្រុងបាងកក ដែលបើកទ្វារកាលពីថ្ងៃចន្ទ បានផ្ដល់ប្រេងកញ្ឆាឥតគិតថ្លៃដល់ពលរដ្ឋថៃរាប់រយនាក់ដែលមកព្យាបាលជំងឺមហារីក គេងមិនលក់ និងឈឺសាច់ដុំ ខណៈរដ្ឋាភិបាលបានអនុញ្ញាតការប្រើប្រាស់កញ្ឆា ដើម្បីបង្កើនសេដ្ឋកិច្ចជាតិ និងសុខុមាលភាពពលរដ្ឋ។
កាលពីឆ្នាំ ២០១៨ ថៃបានក្លាយជាប្រទេសទី ១ នៅអាស៊ីអាគ្នេយ៍ផ្ដល់សិទ្ធិស្របច្បាប់ដល់ការប្រើប្រាស់កញ្ឆាវេជ្ជសាស្ដ្រ ទោះបីជាពលរដ្ឋថៃជាច្រើនធ្លាប់ប្រើរុក្ខជាតិនេះជាថ្នាំសង្កូវយ៉ាងណាក៏ដោយ។
រដ្ឋាភិបាលមានបំណងដាំដំណាំកញ្ឆាតម្លៃរាប់ពាន់លានដុល្លារ ដោយធ្វើការវិនិយោគលើបច្ចេកវិទ្យាដើម្បីចម្រាញ់ប្រេង ចំហុយ និងប្រេងកញ្ឆាលក់លើទីផ្សារ។
លោករដ្ឋមន្ដ្រីសុខាភិបាល អានូទីន ឆានវីរ៉ាគុល និយាយប្រាប់ AFP ពេលឈរនៅក្បែររូបស្លឹកកញ្ឆាដោយស្លៀកឈុតពេទ្យថា៖ «យើងកំពុងប្រយុទ្ធប្រឆាំង ដើម្បីអត្ថប្រយោជន៍ចំពោះសុខភាពពលរដ្ឋថៃ និងបង្កើនសេដ្ឋកិច្ចជាតិ»។
អ្នកជំងឺទៅរង់ចាំពិនិត្យជំងឺនៅមន្ទីរពេទ្យនាពេលកន្លងមក។ រូបថត សហការី
ពលរដ្ឋថៃវ័យចំណាស់រាប់រយនាក់បានរង់ចាំទទួលយកប្រេងកញ្ឆាពី ៥ ទៅ ១០ មីល្លីក្រាម សម្រាប់ព្យាបាលជំងឺសាច់ដុំ ដោយខ្លះទៀតត្រូវការព្យាបាលជំងឺរ៉ាំរ៉ៃ ដូចជាក្មេងស្រី Natjuta ដែលមានជំងឺស្វិតដៃជើង ពីកំណើត និងត្រូវជិះរទេះរុញ។
ស្ដ្រីវ័យ ៦០ ឆ្នាំ ជាម្ដាយនាងបានពោលថា៖ «គាត់គេងមិនបានស្រួលទេ ធ្វើឲ្យខ្ញុំក៏គេងមិនលក់ផងដែរ។ ខ្ញុំគិតថា វាមានប្រសិទ្ធភាពព្រោះពេលនេះ គាត់មានអារម្មណ៍ស្ងប់បន្ដិច»។
ការស្រាវជ្រាវវេជ្ជសាស្ដ្របង្ហាញថា ប្រេងកញ្ឆាអាចជួយសម្រួលដល់ការឈឺចាប់ដល់អ្នកជំងឺ ដូចជាការឈឺចាប់ធ្ងន់ធ្ងរ និងអាការស្កន់ជាដើម តែចំពោះវិទ្យាសាស្ដ្រ វាក៏មានឥទ្ធិពលលើជំងឺមហារីកមួយចំនួនទៀតផងដែរ។
ការប្រើប្រាស់កញ្ឆានៅក្នុងវិស័យសុខាភិបាល និងជំនួញកញ្ឆា នៅតែផ្ទុយទៅនឹងច្បាប់ ហើយក៏អាចដាក់ទោសទណ្ឌដល់ជនប្រព្រឹត្ដិខុសច្បាប់ដោយជាប់គុករហូតដល់ ១០ ឆ្នាំថែមទៀត៕
AFP/HR
