ក្រុងប៉ារីស៖ តុលាការបារាំងកាលពីថ្ងៃពុធ បានឃុំខ្លួនជនជាតិចិន ២ នាក់ ដែលព្យាយាមរត់ពន្ធកូនអន្ទង់ ៦០ គីឡូក្រាម ក្នុងវ៉ាលិសលើជើងហោះហើរទៅកាន់ប្រទេស ចិន។
អន្ទង់អឺរ៉ុបតូចៗ ហៅថា «អន្ទង់កញ្ចក់» ដោយសារតួខ្លួនថ្លាដូចកញ្ចក់ មានតម្លៃប្រមាណ ៥ ៦០០ ដុល្លារក្នុង ១ គីឡូក្រាម ក្នុងប្រទេស ចិន និងរដ្ឋអាជ្ញាក្នុងស្រុកម្នាក់ បាននិយាយថា ករណីនេះគឺជាផ្នែកមួយនៃទម្រង់ជួញដូរថ្មីដែលកំពុងតែពេញនិយម។
ស្ដ្រីវ័យ ២០ ឆ្នាំ និងបុរសអាយុ ៤៤ ឆ្នាំ ត្រូវបានឃាត់ខ្លួនពីថ្ងៃចន្ទនៅអាកាសយានដ្ឋានអន្ដរជាតិ Paris Charles de Gaulle នៅស្ថានីយផ្ទេរជើងហោះហើរពីទីក្រុង Toulouse ភាគនិរតីប្រទេស បារាំង។
ក្នុងវ៉ាលិស ៤ ក្រុមមន្ដ្រីបានរកឃើញថង់ប្លាស្ទិកច្រកទឹកដាក់អន្ទង់ ឬហៅថា «អេលវើស៍»។ ថង់នីមួយៗត្រូវបានរុំក្រដាសមិនជ្រាបទឹក។
តុលាការនៅ Bobigny ក្បែរក្រុងប៉ារីស បានដាក់ទោសជនសង្ស័យជាប់គុក ១០ ខែ និងពិន័យជាប្រាក់ ៧ ០០០ អឺរ៉ូ ម្នាក់ៗពីបទរត់ពន្ធ និងឧក្រិដ្ឋកម្មប្រឆាំងជីវចម្រុះ។
បើយោងតាមក្រុមជំនាញបានឲ្យដឹងថា ចំនួនអន្ទង់អឺរ៉ុបបានធ្លាក់ចុះនាពេលថ្មីៗដោយសារការប្រមាញ់ច្រើនជ្រុល បរិស្ថានកខ្វក់ និងទំនប់ទន្លេដែលរាំងស្ទះការបំផ្លាស់ទីពួកវា។
នៅប្រទេស បារាំង កូនអន្ទង់ ១ គីឡូក្រាម មានតម្លៃប្រមាណ ២៥០ អឺរ៉ូ (១,១២ លានរៀល)។ អន្ទង់អឺរ៉ុបត្រូវបានការពារតាំងពីឆ្នាំ ២០០៩ ដោយសន្និសញ្ញាស្ដីពីពាណិជ្ជកម្មអន្ដរជាតិចំពោះសត្វ និងរុក្ខជាតិព្រៃជិតផុតពូជ (CITES)។
CITES ប៉ាន់ថា ចំនួនអន្ទង់ពាក់កណ្ដាលដែលចាប់នៅអឺរ៉ុប ត្រូវបាននាំចេញទៅកាន់ចិន ជប៉ុន និងកូរ៉េខាងត្បូង ដើម្បីចិញ្ចឹមក្នុងកសិដ្ឋានត្រី។ ជំនួញអន្ទង់មានប្រមាណ ២០០ លានក្បាល ក្នុង ១ ឆ្នាំ៕ AFP/HR