.jpg)
ទិដ្ឋភាពបន្ទប់ផ្ទុកស្រាទំពាំងបាយជូរប្រណីតៗក្នុងទីក្រុងប៉ារីស។ រូបថត AFP
ក្រុងប៉ារីស: ប្រភពពីប៉ូលិសបាននិយាយកាលពីថ្ងៃអង្គារថា ចោរបានលុងបន្ទប់ផ្ទុកអីវ៉ាន់នៃភោជនីយដ្ឋានប្រណីត ១ ក្នុងទីក្រុងប៉ារីស និងលួចយកស្រាទំពាំងបាយជូរតម្លៃខ្ពស់យ៉ាងតិច ១៥០ ដបដែលមានតម្លៃរាប់ម៉ឺនដុល្លារ។
ប្រភពបានប្រាប់ AFP ថាបុគ្គលិកភោជនីយដ្ឋាន Maison Rostang ក្នុងខណ្ឌបុរាណសតវត្សរ៍ទី ១៧ ភាគឦសានក្បែរវិមាន Arc de Triomphe បានប្រទះឃើញរូងទំហំកន្លះម៉ែត្រក្នុងជញ្ជាំងនៃបន្ទប់ផ្ទុកស្រាទំពាំងបាយជូរដែលបានកើតឡើងកាលពីថ្ងៃចន្ទ។
ភោជនីយដ្ឋានទទួលបានផ្កាយ ២ ពីមគ្គុទេ្ទសក៍អាហារដ៏ល្បីល្បាញ Michelin និងត្រូវបានចាត់ទុកជាកន្លែងលក់ស្រាទំពាំងបាយជូរល្អៗដែលរួមទាំងស្រាល្បីមកពី Petrus និង Romanee Conti ផងដែរ។
បន្ទប់ផ្ទុកស្រាទំពាំងបាយជូរពេលនេះត្រូវបានជួសជុល។ ប្រភពពីប៉ូលិសបានបន្ដថា ស្រាដែលត្រូវបានចោរលួចមានតម្លៃចន្លោះពី ៤៥ ម៉ឺនទៅ ៦៨ ម៉ឺនដុល្លារ។
ក្នុងឆ្នាំ ២០១៧ ក្រុមចោរបានលួចស្រាទំពាំងបាយជូរប្រណីត ៣០០ ដបតម្លៃ ២៨ ម៉ឺនដុល្លារពីបន្ទប់ផ្ទុកស្រាមួយភាគកណ្ដាលក្រុងប៉ារីស ក្រោយពីចោះតាមទីបញ្ចុះសពដែលជារូងក្នុងដីក្រោមទីក្រុងបារាំងនេះ។
ច្បាស់ណាស់ក្រុមចោរបានទម្លុះចូលរូងបញ្ចុះសពពីផ្លូវអាថ៌កំបាំងណាមួយនៃក្រុងប៉ារីសមុនពេលចោះជញ្ជាំងបន្ទប់ស្រាក្បែរឧទ្យាន Luxembourg ជាទីតាំងវិមានព្រឹទ្ធសភាបារាំងស្ថិតនៅ។ ក្រោយពីលួចស្រាថ្លៃៗទាំងនោះពួកគេរត់តាមផ្លូវក្រោមដីនោះបាត់ស្រមោលឈឹង។
ក្នុងឆ្នាំ ២០០៩ ប៉ូលិសបារាំងបានចាប់ខ្លួនបុរសអាយុ ៤៤ ឆ្នាំម្នាក់ពីបទលួចស្រាជាង ៥០០ ដបតម្លៃរាប់ម៉ឺនដុល្លារពីភោជនីយដ្ឋានប្រណីតៗក្នុងក្រុងប៉ារីស៕ HR
