ភ្នំពេញ: ខណៈសង្គ្រាមពាក្យសម្ដីដ៏ក្ដៅគគុករវាង អតីតតារាសម្ដែងកញ្ញា បេននី យ៉ាង និងតារាស្រីសាច់សខ្ចីកញ្ញា លីឡា វីន ឈានដល់ការជេរហែកកេរ្តិ៍គ្នា ធ្លាយរហូតដល់ការចោទប្រកាន់ថាជាស្រីលក់ខ្លួន និងប្រើប្រាស់គ្រឿងញៀននោះ តារាសិល្បៈជារៀមច្បងពួកនាងគឺលោក អេនឌី បានត្រឹមតែពោលពាក្យសោកស្ដាយ ហើយលោកសុំចិត្តមិនលូកដៃរឿងអ្នកទាំងពីរ ដែលសុទ្ធតែជាអ្នកល្បីក្រោយពីបានថតរូប និងបទចម្រៀងជាមួយលោក។
តារាសម្តែងប្រុសចាស់វស្សា តែរូបរាងមិនចាស់តាមវ័យលោក លាវ ពិសិដ្ឋ ហៅ អេនឌី ក្រៅពីអាជីពជាតារាសម្តែង លោកក៏ជាតារាចម្រៀងគ្មានទ្រនំ ល្បីឈ្មោះមួយរូបក្នុងចំណោមតារាល្បីនៅក្នុងប្រទេសតាមរយៈការសម្តែងឈុតឆាករោលរាលជាមួយតារាស្រីល្បីៗជាច្រើនរូប។
លោក អេនឌី មិនត្រឹមតែជាតារាសម្តែងមានឈ្មោះបោះសំឡេងក្នុងវិស័យសិល្បៈទេ ថែមទាំងល្បីទៀតថា ឲ្យតែលោកថតជាមួយតារាស្រីរូបណា មិនយូរទេនាងនឹងប្រែជាហង្សរះត្រចង់លើវិថីសិល្បៈ។
តារាចម្រៀងគ្មានទ្រនំរូបនេះ ក៏បាន បណ្តុះតារាសម្តែងជាច្រើនឲ្យល្បីឈ្មោះក្នុងនោះក៏មានកញ្ញា លីឡា វីន និងកញ្ញា បេនី យ៉ាង ដែលទើបនឹងផ្ទុះដំណឹងមានការដៀលគ្នាយ៉ាងចាស់ដៃនៅក្នុងបណ្តាញសង្គម។
តាមរយៈការឈ្លោះគ្នារវាងតារាសម្តែងស្រីស្រស់ស៊ិចស៊ីទាំងពីរ កញ្ញា លីឡា វិន និងកញ្ញា បេនី យ៉ាង នេះដែរធ្វើឲ្យមានការផ្អើលអស់អ្នកលេងក្នុងបណ្តាញសង្គមហ្វេសប៊ុក ព្រោះតែពាក្យសម្តីហែកកេរ្តិ៍គ្នាមិនសំចៃមាត់ ដោយសូម្បីតែរៀមច្បងអ្នកជ្រោងឲ្យពួកនាងល្បី គឺលោក អេន ឌី ក៏អស់យោបល់។
តារាសម្តែងប្រុសមានភាពទាក់ទាញខាងឈុតរោលរាល លោក អេនឌី បានបង្ហើបមក ភ្នំពេញ ប៉ុស្តិ៍ ថា៖«ទាក់ទងដំណើរដើមទង ដែលអ្នកទាំងពីរ (លីឡា វីន និង បេននី យ៉ាំង) ឈ្លោះគ្នានេះខ្ញុំអត់បានដឹងទេ»។
លោក អេនឌី បានបន្តទៀតថា៖ «ហើយក៏បានឃើញការឈ្លោះគ្នាតាមហ្វេសប៊ុក តែខ្ញុំមិនបានធ្វើការខំមិនអីដែរ ព្រោះមិនចង់ពាក់ព័ន្ធ ដោយសារសុទ្ធតែជាអ្នកជិតស្និតដូចគ្នា ហើយខ្ញុំក៏មិនចង់បញ្ចេញមតិយោបល់អីច្រើនដែរសម្រាប់រឿងនេះព្រោះខ្ញុំពិតជាមិនដឹងថា លីឡា និង បេននី ចាប់ផ្តើបឈ្លោះគ្នា ដោយសាររឿងអី»។
លោក អេនឌី បានថ្លែងយ៉ាងសោកស្តាយចំពោះការឈ្លោះគ្នារវាងកញ្ញា លីឡា និង បេននី ដោយលោកមិនចង់ឲ្យមានការឈ្លោះទេ។
តារាចម្រៀង និងសម្ដែងមិនចាស់តាមវ័យរូបនេះ បានលើកឡើងថា៖ «ព្រោះថាក្នុងនាមជាតារាសិល្បៈត្រូវមានការសាមគ្គីគ្នាជាគំរូដល់សិល្បៈជំនាន់ក្រោយ និងបារម្ភខ្លាចអ្នកទាំងពីឈ្លោះគ្នាយូរទៅអាចប៉ះពាល់រហូតដល់ឈប់ពីសិល្បៈ និងមានការសោកស្តាយព្រោះអ្នកសិល្បៈក៏មិនមានច្រើនដែរ»។
ដោយឡែក ចំពោះការងារសិល្បៈរបស់លោកវិញ ក្រៅពីមានការរវល់ក្នុងការសម្តែង និងបញ្ចេញចម្រៀងបែបពីដើមជាបន្តបន្ទាប់ លោក អេនឌី ក៏មានការរវល់ច្រៀងនៅក្នុងភោជនីយដ្ឋាននៅពេលយប់ ចំណែកឯអាជីវកម្មវិញក៏មានការគ្រងទុកដែរ គ្រាន់តែមិនទាន់មានពេលគ្រប់គ្រាន់ និងត្រូវធ្វើការពិចារណាឲ្យបានច្បាស់លាស់សិន៕