ភ្នំពេញៈ ពិធីការិនីពូកែវោហារស័ព្ទ សម្តីចាក់ទឹកមិនលេច បូករួមទាំងទម្រង់មុខឃ្យូតគួរឲ្យស្រឡាញ់កញ្ញា ម៉េង ឃុននី ហៅ ជីមមី មិនត្រឹមតែមានសម្រស់ស្រស់ស្អាតបែបកូនកាត់ចិនទេ ថែមទាំងជាតារាដែលពោរពេញដោយទេពកោសល្យ និងមានចំណេះដឹងខាងភាសារហូតដល់ទៅ ៤ ភាសា រួមទាំងភាសាកំណើត។
តារាស្រី ដែលពោរពេញដោយទេពកោសល្យ មិនថា ជាពិធីការិនី ម៉ូដែល និងជាតារាសម្តែង ត្រូវបានគេដឹងថា ចេះជាច្រើនភាសាមាន ចិន ថៃ អង់គ្លេស និងភាសាកំណើតគឺភាសាខ្មែរ។ កញ្ញាគឺជាកូនកាត់ខ្មែរ ចិនមានរូបសម្រស់មិនចាញ់តារារួមអាជីព និងមានភាពល្បីល្បាញមិនចាញ់អ្នកសិល្បៈជំនាន់មុនឡើយ។
កញ្ញា ជីមមី ជាពិធីការិនីរូបស្រស់ប្រចាំនៅប៉ុស្តិ៍ភីអិនអិន ទើបតែចូលប្រឡូកក្នុងវិស័យសិល្បៈបានរយៈពេល ៣ ឆ្នាំ តែជោគជ័យមិនធម្មតារូបនេះបានផ្តល់បទសម្ភាសមកកាន់ ភ្នំពេញ ប៉ុស្តិ៍ តាមរយៈការសន្ទនាសំឡេងក្នុងបណ្តាញហ្វេសប៊ុកថា៖ «កាលពីនៅក្មេងម៉ាក់បានឲ្យរៀនភាសាចិន ដល់ពេលចូលរៀនថ្នាក់ទី ៥ ក៏ចូលរៀនភាសាអង់គ្លេសទៀត ហើយនៅពេលដែលចប់ទី ១២ បានទៅរៀនតនៅប្រទេសថៃ ដើម្បីចេះភាសាថៃហ្នឹងហ្មង ដោយរៀនចប់ផ្នែកអក្សរសាស្ត្រថៃ»។
តារាស្រីសម្បូរមន្តស្នេហ៍ពូកែនិយាយ មិនឆ្មើងឆ្មៃកញ្ញា ម៉េង ឃុននី ហៅ ជីមមី រូបនេះ បានបន្តទៀតថា៖ «កាលដែលរៀនភាសាច្រើនបែបនេះមកពីបងជាមនុស្សដែលមិនចេះគិតលេខអីទេ តែជាមនុស្សដែលពូកែចាំ ហើយចូលចិត្តខាងភាសាហ្នឹងហ្មង។ ចំពោះភាសាចិនវិញបងរៀនដល់ថ្នាក់ទី ៨ បើភាសាអង់គ្លេសមនុស្សនៅក្នុងប្រទេសគឺពេញនិយមស្រាប់ហើយ»។
ស្រីស្រស់ទើបរះលើវិថីសិល្បៈក៏ច្បាមបានទីផ្សារក្បាលមេក្រូ ព្រោះតែចំណេះដឹងជាច្រើនភាសា កញ្ញា ជីមមី បានបន្តបរិយាយប្រាប់ពីមូលហេតុ ដែលធ្វើឲ្យនាងរៀនភាសាថៃដែរថា៖ «កាលដែលរៀនថៃ មកពីបងមានហាងអារហារមួយនៅខេត្តប៉ៃលិន ដែលមានជនជាតិថៃចូលច្រើនហើយក៏បានគិតថាយើងនៅខ្វះភាសាថៃហ្នឹងមួយទៀត ហើយក៏ជាភាសាមួយដែលអាចរកលុយឲ្យយើងបានរាល់ថ្ងៃ និងអាចចេះភាសាថៃបានទាំងអស់ហើយក៏មិនខកបំណងដែរក្នុងការចំណាយពេល ៤ ឆ្នាំ ដើម្បីរៀន ក្នុងអាជីពជាពិធីការិនីយើងអាចបកប្រែបាន»។
តារាស្រីវ័យ ២៣ ឆ្នាំ សម្រស់កាន់តែស្រស់ស្អាតក៏បានប្រាប់ពីគោលបំណងដែរថា៖ «នឹងបន្តការសិក្សាផ្នែកភាសាអង់គ្លេស់ថែម ២ ទៅ ៣ ឆ្នាំទៀតនៅសហរដ្ឋអាមេរិក និងភាសាចិនឲ្យចប់តែមិនទាន់ដឹងច្បាស់ថាទៅពេលណាទេ ព្រោះការងារសិល្បៈពិតជារវល់ពិតមែន ក្នុងអាជីពជាពិធីការិនី និងថតផ្សព្វផ្សាយឲ្យផលិតផលផ្សេងទៀត មានការកក់ទុករហូតដល់ខែ ៥ ឆ្នាំក្រោយឯណោះ»។
តារាស្រីស្អាត ហើយឆ្លាត គួរជាទីចោមរោមនៃបុរសៗតាមសុំស្នេហ៍ កញ្ញា ជីមមី ក៏បានបង្ហើបពីជីវិតស្នេហាថា នាងមានម្ចាស់បេះដូងរួចទៅហើយ។
ស្រីស្រស់មានចំណេះដឹងផ្នែកភាសាជាដើមទុនបង្កើនទ្រព្យរូបនេះបានបង្ហើបដែរថា៖ «មានម្ចាស់ចិត្តរួចហើយ តែកំពុងមើលចិត្តគ្នា ឲ្យបានច្បាស់ថាម្នាក់ហ្នឹង អាចរស់នៅជាមួយអស់មួយជីវិតបានទេ»។
យ៉ាងណា កញ្ញាក៏មិនបានបញ្ជាក់ពីអត្តសញ្ញាណបុរសមានសំណាងម្នាក់នោះដែរ រហូតដល់នាងប្រាកដក្នុងចិត្តសិន ទើបបង្ហាញឲ្យទស្សនិកជនបានដឹង៕