.jpg)
លោក កែវ វាសនា និងកញ្ញា ឈិន សៀវម៉ី ដែលចូលសិល្បៈតាមការប្រឡងច្រៀង។ រូបថត សហការី
ភ្នំពេញៈ ដំណើរកន្លះទសវត្សរ៍លើវិថីសិល្បៈដែលផ្ដើមជំហានតាមរយៈការប្រកួតសមត្ថភាពចម្រៀង កញ្ញាសិចស៊ីសាច់សខ្ចី ឈិន សៀវម៉ី មិនដុះដាលលើថ្នាលចម្រៀងបែរជាមកកាក់កបនឹងទីផ្សារសម្ដែងខ្សែភាពយន្តទៅវិញ។
តារាសម្តែងស្រីចូលចិត្តបង្ហាញភាពសិចស៊ីផ្លាស់ប្តូរពីសម្លៀកបំពាក់សមរម្យ ដើម្បីចាប់យកចំណាប់អារម្មណ៍ពីអ្នកគាំទ្រកញ្ញា ឈិន សៀវម៉ី ហាក់សម្បូរទីផ្សារថតកុនក្រោយបញ្ចប់រឿង «មន្តស្នេហ៍ក្រមុំបាយឆា» ក្នុងតំណែងជាតួអង្គសំខាន់ម្នាក់នៅក្នុងសាច់រឿង។
ជុំវិញការជោគជ័យលើវិស័យសម្ដែងផ្ទុយពីប្រភពចាប់ផ្ដើមសិល្បៈដំបូង តារាសម្តែងស្រីវ័យក្មេងកញ្ញា ឈិន សៀវម៉ី បានផ្តល់បទសម្ភាសមកកាន់ ភ្នំពេញ ប៉ុស្តិ៍ ពីការចូលសិល្បៈដំបូងថា៖ «ខ្ញុំចូលសិល្បៈក្នុងការសម្តែងអស់រយៈពេល ៥ ឆ្នាំហើយ ប៉ុន្តែពីមុនមកមិនសូវមានទីផ្សារថតកុនប៉ុន្មានទេ មានតែការសម្តែងក្នុង MV និងថតស្ប៉តតិចតួចប៉ុណ្ណោះ ទើបតែសម្បូរការសម្តែងកុនរយៈពេល ២ ឆ្នាំក្រោយនេះទេ»។
តារាស្រីវ័យ ២៣ ឆ្នាំរូបនេះក៏បានបញ្ជាក់ពីការចូលសិល្បៈដំបូងដូច្នេះថា៖ «ខ្ញុំចូលសិល្បៈដំបូងតាមរយៈការប្រឡងចម្រៀងក្នុងកម្មវិធីប្រលងចម្រៀង «ពេជ្រកំពុងច្នៃ» របស់ទូរទស្សន៍អាស៊ីអាគ្នេយ៍ឆ្នាំ ២០១២ ប៉ុន្តែមិនទទួលបានជយលាភីទេ ហើយមកដល់ឆ្នាំ ២០១៤ និង ២០១៥ ទើបខ្ញុំមានការថតម៉ូដសម្លៀកបំពាក់ចុះក្នុងទស្សនាវដ្តី»។
តារាសម្តែងស្រីសាច់សខ្ចីដែលទើបទទួលបានការចាប់អារម្មណ៍ និងមានការគាំទ្រដោយសារសមត្ថភាពក្នុងការសម្តែងគួបផ្សំជាមួយសម្រស់ស្រស់ស្អាតក៏បានបង្ហើបថា តាំងពីបរាជ័យក្នុងការប្រលងចម្រៀងមក រូបកញ្ញាក៏លែងសូវចាប់អារម្មណ៍ទៅលើការច្រៀងទៀតដែរ។ យ៉ាងណាមិញកញ្ញា សៀវម៉ី នៅតែមានចំណូលចិត្តច្រៀងលេងនៅពេលទំនេរ និងមិនទាន់គិតថា ចង់សម្រេចក្ដីប្រាថ្នាក្លាយជាតារាចម្រៀងអាជីពនោះទេ។
ចំពោះការថតកុនវិញកញ្ញា ឈិន សៀវម៉ី ទើបតែរំលេចវត្តមានក្នុងការសម្ពោធរឿងភាគរបស់ទូរទស្សន៍ភីអិនអិនជាតួអង្គសំខាន់ «ថ្ងៃមុនស្អប់ ថ្ងៃនេះស្រឡាញ់» ជាខ្សែភាពយន្តសំខាន់សម្រាប់ទូរទស្សន៍ភីអិនអិនក្នុងឆ្នាំ ២០១៩។ នាងក៏កំពុងតែសម្តែងឲ្យផលិតកម្មរស្មីហង្សមាសដោយតារាស្រីរូបនេះសុំមិនទាន់បង្ហាញចំណងជើងនៅឡើយទេ។
តារាស្រីវ័យក្មេងចូលចិត្តបង្ហាញដើមទ្រូងរូបនេះទើបតែបានសម្តែងក្នុងកុនភាគបាន ៥ រឿងក្នុងរយៈពេល ២ ឆ្នាំក្រោយនៃការចូលប្រឡូកក្នុងវិស័យសិល្បៈតាំងពីវ័យក្មេងមករួមទាំងរឿង «ថ្ងៃមុនស្អប់ ថ្ងៃនេះស្រឡាញ់» មានរឿង មន្តស្នេហ៍ក្រមុំបាយឆា រឿង កូនប្រសាឡឺកឺ (ជាតួឯកស្រី) រឿង អាពាហ៍ពិពាហ៍ចម្លែក និងរឿង ថ្ងៃណាកូនមាសម្តាយ។
សម្រាប់កុនដុំវិញកញ្ញា ឈិន សៀវម៉ី ទើបតែថតបាន ១ រឿងប៉ុណ្ណោះជាខ្សែភាពយន្តខ្មោចបែបកំប្លែង និងជាតួអង្គខ្មោចដែលមិនទាន់ចាក់បញ្ចាំងនៅឡើយទេ ប៉ុន្តែកំពុងតែមានគម្រោងសម្ពោធនៅឆាប់ៗនេះផងដែរ៕
