ភ្នំពេញ: តារាចម្រៀង និងអ្នកនិពន្ធខ្មែរ អាមេរិក ឡូរ៉ា ម៉ម ត្រូវបានប្រគល់ពានរង្វាន់ សិល្បៈ និងវប្បធម៌ឆ្នាំនេះ ពីកម្មវិធី «ពានរង្វាន់ស្ត្រីនៃថ្ងៃអនាគតអាស៊ីអាគ្នេយ៍» (Women of the Future Awards South East Asia)។ ជាមួយទេពកោសល្យតាក់តែងបទចម្រៀង និងសម្ដែង កញ្ញា ឡូរ៉ា ម៉ម ជាម្ចាស់ផលិតកម្ម Baramey Production ដែលត្រូវបានបង្កើតឡើងសម្រាប់ជួយជ្រោមជ្រែងតន្ដ្រីអូរីជីណល នៅកម្ពុជា។
ស្ថិតក្នុងចំណោមបេក្ខភាពបញ្ជីសម្រាំងម្នាក់ចំពោះការប្រកួតប្រជែង ចក្ខុវិស័យរបស់កញ្ញាសម្រាប់ឧស្សាហកម្មចម្រៀងកម្ពុជា ទាក់ទាញចិត្ដគណៈកម្មការជ្រើសរើសយករូបកញ្ញាក្នុងប្រភេទវប្បធម៌។
គណៈកម្មការ Torie Henderson និង Anne Abraham បានឲ្យដឹងថា៖ «ឡូរ៉ា បានបង្ហាញសមត្ថភាពសាងអាជីព ដោយចង់ឲ្យមានតន្ដ្រីអូរីជីណល នៅកម្ពុជា។ នាងបានសាងកេរ្ដិ៍ឈ្មោះខ្លួនឯង និងប្រើវាជាមូលដ្ឋានដើម្បីជំរុញទឹកចិត្ដសិល្បករ និងតន្ដ្រីករដទៃពួតដៃគ្នាអភិវឌ្ឍវិស័យសិល្បៈនេះ»។
ចំពោះកញ្ញា ភាពជោគជ័យនេះ គឺជាមោទនភាពសម្រាប់កម្ពុជាទាំងមូល មិនមែនរូបកញ្ញាម្នាក់នោះទេ។ ក្នុងសារមួយដែល ភ្នំពេញ ប៉ុស្ដិ៍ទទួលបាន នៅថ្ងៃព្រហស្បតិ៍ ឡូរ៉ា ម៉ម បាននិយាយថា កញ្ញា សូមផ្ញើជូនពានរង្វាន់នេះដល់ប្រជាជនខ្មែរទាំងអស់ដែលមានក្ដីសុបិនពន្លឺជីវិតនាពេលអនាគត។
ទន្ទឹមនឹងនោះផងដែរ តារាចម្រៀងខ្មែរអាមេរិករូបនេះក៏បានបន្ដថា កញ្ញា ចង់ចែករំលែកកិត្ដិយសពីការឈ្នះពានរង្វាន់មួយនេះជាមួយតារាចម្រៀងរ៉ុកខេនរ៉ូលល្បីខាងច្រៀងបទមរតកខ្មែរពីដើម អ្នកនាង កាក់ ចាន់ធី ដែលបានទទួលមរណភាពកាលពីថ្ងៃអង្គារដោយគ្រោះថ្នាក់ចរាចរណ៍។
កញ្ញា ឡូរ៉ា ម៉ម អះអាងថា៖ «ខ្ញុំពិតជាមានក្ដីសោមនស្សរីករាយ និងមានមោទនភាពដែលខ្ញុំបាននាំយកពាននេះជូនដល់កម្ពុជា ហើយខ្ញុំសង្ឃឹមថា វាអាចជានិមិត្តរូបដ៏មានសក្ដានុពលសម្រាប់កម្ពុជា»៕
Suntharoth Ouk
HR