.jpg)
តារាសម្តែងពន្លកសិល្បៈថ្មីកញ្ញា វណ្ណៈ ហាត់ក្បាច់សម្តែង។ ហ្វេសប៊ុក
ភ្នំពេញៈ ទើបតែបានប្រឡូកវិស័យសិល្បៈសម្តែងត្រឹម ២ ឆ្នាំសោះ តារាសម្តែងស្រីរាងតូចច្រឡឹង ស្រស់សោភា ជាពន្លកថ្មីកញ្ញា វណ្ណៈ បូរមី ឆក់បានឱកាសថតកុនភាគ ៣ រឿងជាប់គ្នា ហើយមានការគាំទ្រច្រើនពីមហាជន ខណៈស្រីស្រស់រូបនេះ ក៏ប្រាថ្នាចង់បានកំណត់ត្រាខាងសម្តែងជាតួបែបវាយតប់ផងដែរ។
តារាសម្តែងស្រីវ័យក្មេងទើបតែ ២០ ឆ្នាំ ដែលអតីតជាបេក្ខនារីប្រកួតកម្មវិធី Freshie Girls & Boys កាលពីឆ្នាំ ២០១៦ ត្រឹមជាបេក្ខនារី ៦ រូបចុងក្រោយកញ្ញា វណ្ណៈ បូរមី នៅពេលនេះកំពុងតែទទួលបានការចាប់អារម្មណ៍ខ្លាំងពីមហាជននៅក្នុងវិស័យសិល្បៈភាពយន្ត ហើយជាពិសេសរូបនាងក៏មានឱកាសបានថតសម្តែងរឿងកុនភាគ និងរឿងកុនមួយចំនួនផងដែរ។
តារាស្រីដែលតោងភាពល្បីតាមរយៈការថតកុនភាគដំបូងរឿង «បេសកកម្មមួយ» ដែលដើរតួជានារីក្លាហានផ្នែកស៊ើបអង្កេតនោះ កញ្ញា វណ្ណៈ បូរមី ក៏ទទួលចំណងដៃថ្មីថតកុនភាគទី ៣ រឿង «តួខ្ញុំគេសម្តែង» ដែលជាវណ្ណកម្មរបស់អ្នកស្រី ពាន់ ភួងបុប្ផា សម្រាប់ចាក់បញ្ចាំងនៅប៉ុស្តិ៍ទូរទស្សន៍ភីអិនអិន ក្រោយពីបានសម្តែងកុនភាគទី ២ រឿង «ផ្កាថ្ម» របស់ផលិតកម្ម និងទូរទស្សន៍ហង្សមាស នាពេលកន្លងមកថ្មីៗនេះ។
បើក្រឡេកមើលសម្រស់របស់នាងវិញ តារាស្រីរូបនេះ អាចនិយាយបានថា គឺមានភាពស្រស់ស្អាតបែបធម្មជាតិពិតៗ គ្មានការកែសម្ផស្សនោះទេ ជាមួយនឹងទម្រង់មុខមូលពងក្រពើ និងច្រមុះខ្ពស់ស្រាប់តាំងពីក្មេង ដែលផុសចេញពីអាជីពដំបូងជាតារាម៉ូដែល។
ថ្លែងប្រាប់ក្រោយពីពេលថតឈុតខ្លះៗសម្រាប់កុនភាគទី ៣ ឲ្យផលិតករជើងចាស់កំពុងតែមានឈ្មោះបោះសំឡេងអ្នកស្រី ពាន់ ភួងបុប្ផា កាលពីចុងសប្តាហ៍មុនពីឱកាសល្អនេះថា៖ «ដោយសារការសម្តែងរបស់នាងខ្ញុំដំបូងនៅក្នុងរឿងបេសកកម្មមួយ ដែលជាវណ្ណកម្មរឿងនិពន្ធដោយលោក ម៉ានិត ខណៈគាត់ដូចជាចៅប្រុសគាត់ [អ្នកស្រី ពាន់ភួងបុប្ផា] នោះ ទើបបានគាត់សម្រេចយកខ្ញុំឲ្យសម្តែងរឿងក្រោយនេះទៅ!»។
ទោះបីជារយៈពេលប្រឡូកចូលវិស័យសិល្បៈខ្លីត្រឹម ២ ឆ្នាំ មែន តែស្រីស្រស់សម្រស់កាន់តែស្អាត កញ្ញា វណ្ណៈ បូរមី បានថតកុនភាគ ៣ រឿង កុនដុំ ១ រឿង និងកុនខ្លីអប់រំ ១ រឿង ខណៈការថតស្ប៉តពាណិជ្ជកម្មច្រើនហូរហែទៀតផងដែរ។
ដោយឡែកចំពោះទេពកោសល្យសម្តែងរបស់តារាស្រីពន្លកថ្មីរូបនេះ បើតាមពិនិត្យមើលទៅគឺនាងសម្បូរការសម្តែងបែបជាវីរនារី ឬតួស្រីជាអ្នកលេងវាយតប់ ឬតួ Spy Girl ដោយសារ ការសម្តែងមើលទៅមានភាពល្អសមសួនខ្លាំងតែម្តង។
កញ្ញា វណ្ណៈ បូរមី ក៏ព្រលយថា៖ «តាមពិតទៅ ធ្វើជាតួសម្តែងត្រូវតែមានភាពបត់បែនតាមតម្រូវការរបស់ផលិតករ។ តែបើនិយាយពីអ្វីជាចំណូលចិត្តវិញនោះ គឺនាងខ្ញុំពេញចិត្តសម្តែងជាតួវាយតប់ Spy Girl ឬ ជាកុន action film ច្រើន។ ព្រោះថា នាងខ្ញុំក៏ចូលចិត្តទស្សនាការសម្តែងបែបនេះតាមរយៈតួ Idols ស្ត្រីដែលជាតួហូលីវូដដ៏ល្បី ២ រូបផងដែរ។ អ៊ីចឹង បើអាចនោះ គឺថា នាងខ្ញុំចង់សម្តែងបែបនេះឲ្យមានភាពលេចធ្លោតែម្តងនៅជំនាន់ខ្ញុំ»៕
