.jpg)
កញ្ញា លៀង សំណាង ពេលជួប Idol ខ្លួន គឺតារាចម្រៀងហង្សមាស ណុប បាយ៉ារិទ្ធ។ រូប ហ្វេសប៊ុក
ភ្នំពេញ៖ ទោះបីពេលប្រកួតចម្រៀងកម្មវិធី Cambodia Idol រដូវកាលទី ៣ មិនជោគជ័យមែនក្តី ក៏តារាចម្រៀងស្រីរលកថ្មីកញ្ញា លៀង សំណាង កំពុងស្រូបប្រជាប្រិយភាពពីអ្នកគាំទ្រច្រើនដោយបង្ហើរសំនៀងតាមប៉ុស្តិ៍ Channel YouTube ខណៈកញ្ញាក៏មានក្តីប្រាថ្នាចង់មានទ្រនំផលិតកម្ម ដែលមានទីផ្សារសិល្បៈល្អលើអាជីពចម្រៀងទៅថ្ងៃមុខផងដែរ។
អតីតជាបេក្ខភាពប្រឡងកម្មវិធី Cambodia Idol រដូវកាលទី ៣ រូបនេះ នៅមិនទាន់មានផលិតកម្មណាកក់ទុកនៅឡើយទេ បើទោះបីជាខ្លួនមានទេពកោសល្យច្រៀងល្អ សំឡេងពីរោះមានអ្នកគាំទ្រច្រើនជាសំនៀងច្រៀង Cover បទមរតកដើមក្នុង Channel YouTube នានាដូចជា Asian Dragon និង Home Music ជាដើម ក៏ពិតមែន។
តារាចម្រៀងស្រីវ័យ ២៣ ឆ្នាំ សំឡេងស្រួយស្រទន់ មានស្រុកកំណើតនៅខេត្តតាកែវ កញ្ញា លៀង សំណាង ប្រាប់ភ្នំពេញប៉ុស្តិ៍ឲ្យដឹងពីគោលបំណងចង់បន្ថែមអាជីពទៅលើការងារសិល្បៈដូច្នេះថា៖ «កាលទើបចេញពីការប្រកួតដំបូងក៏មានខាងផលិតកម្មមួយចំនួនទាក់ទងមកដែរ ប៉ុន្តែខ្ញុំមិនទាន់មានពេលទំនេរគ្រប់គ្រាន់សម្រាប់ធ្វើការ ទើបខ្ញុំបដិសេធគេសិន ហើយរហូតមកដល់បច្ចុប្បន្ននេះ ខ្ញុំក៏នៅមិនដឹង ពេលណាទើបអាចរៀបចំការងារ ឬក៏លៃលកពេលបានទេ ព្រោះខ្ញុំក៏ចង់ចូលក្នុងផលិតកម្មណាមួយ ជាពិសេសគឺចង់មានផលិតកម្មដែលមានទីផ្សារសិល្បៈស្រាប់ក្នុងស្រុកយើង»។
កញ្ញា លៀង សំណាង ក៏បន្តឲ្យដឹងអំពីចំណូលចិត្តសិល្បៈផ្សេងពីចម្រៀងនាពេលអនាគតដែរថា៖ «តាមពិតទៅខ្ញុំក៏ស្រឡាញ់ការសម្តែងដែរ ប៉ុន្តែដូចនិយាយអ៊ីចឹងខ្ញុំខ្លួនឯងក៏មិនទាន់មានពេលគ្រប់គ្រាន់ ហើយជាពិសេសនោះក៏នៅមិនទាន់មានផលិតករណាមួយ ទាក់ទងមកខ្ញុំឲ្យចូលសម្តែងដូចគ្នា។ ខ្ញុំក៏បានតែសង្ឃឹមថា នឹងបានប្រឡូកក្នុងអាជីពទាំងនេះពេញលេញ គឺទាំងការសម្តែង និងចម្រៀង»។
ដោយឡែកតារាចម្រៀងស្រីកំពុងប្រែសម្ផ្សសរូបនេះ មុនប្រឡងកម្មវិធី Cambodian Idol រដូវកាលទី ៣ ក៏ជាអ្នកចម្រៀងតាមវង់តន្ត្រីក្នុងខេត្តតាកែវ ក៏ដូចជាតារាចម្រៀងនៅក្នុងវង់តន្រ្តីលោក សុខ រក្សា ផងដែរ ក្រៅពីខ្លួនជាអ្នកស្រឡាញ់ខាងវិស័យសិល្បៈ។
ស្រីស្រស់ស្រអែម លៀង សំណាង ដែលមានឪពុក គឺជាអ្នកលេងឧបករណ៍ភ្លេងបុរាណ ក៏បានបញ្ជាក់ឲ្យដឹងថា៖ «ខ្ញុំធ្លាប់ប្រឡងក្នុងកម្មវិធី Cambodia Idol នេះ ២ ឆ្នាំមកហើយ។ ពេលនេះ ខ្ញុំក៏នៅទទួលច្រៀងតាមកម្មវិធីនានាដែរទាំងសម័យ និងបុរាណ ហើយខ្ញុំក៏ធ្លាប់បានច្រៀងនៅវង់បង សុខ រក្សា ដូចគ្នា ដោយសព្វថ្ងៃខ្ញុំមិនទាន់ចូលក្នុងផលិតកម្មណាមួយដែរទេ»៕
