ភ្នំពេញ៖ បើទោះបីជាបានដឹងមុនថា នឹងមានការថតឈុតខ្មោចក្នុងកុនភាគរបស់ទូរទស្សន៍ប៉ុស្តិ៍លេខ ៥ រឿង «ភ្លើងគំនុំ» ដែលអ្នកដឹកនាំតម្រូវឲ្យមានថតឈុតជាតួខ្មោចក្តី ក៏តារាសម្ដែងសម្បុរស្រអែមដែលទើបបន្ថែមជំនាញបង្ហើរសំនៀងបទអូរីជីណល កញ្ញា ឌី សូនីតា បង្ហាញពីអារម្មណ៍រន្ធត់ខ្លាំងពេលទៅដល់កន្លែងឃើញមានរូបថតខ្លួននៅក្នុងរបៀបដូចជាពិធីបុណ្យសពមែនទែននោះ។
តារាស្រីមានរាងស្លីម ដែលជារឿយៗមហាជនរមែងបានឃើញនូវការសម្តែងរបស់នាងជាតួអង្គកាចឆ្នាស និងតួស្រីដ៏រឹងមាំ ក្បាច់គុនវាយប្រហារ មើលទៅហាក់ដូចរាងចាលតែម្តងសម្រាប់ការថតកុន ដែលតួខ្លួនមានឈុតស្លាប់នោះ ទើបបង្ហើរសារថា៖ «វាជាហេតុផលមួយដែលខ្ញុំមិនដែលទទួលថតរឿងខ្មោចទេ ខ្ញុំដឹងថាមនុស្សកើត ចាស់ ឈឺ ស្លាប់ ជារឿងធម្មតា ប៉ុន្តែគ្រាន់តែថាពេលមកដល់ឃើញ នឹងភ្នែកបែបនេះក៏មានអារម្មណ៍ពិបាកនិយាយឲ្យសមណាស់ គ្រាន់តែដឹងត្រឹមថា ឈរមើលរូបខ្លួនឯងភាំងមួយសន្ទុះដែរ! គេចណាស់ជួបណាស់ខ្ញុំ ថ្ងៃនេះជាថ្ងៃចុងក្រោយថតបញ្ចប់រឿងផង បញ្ចប់ទាំងរូបថតទៀតលោកព្រះ! សំខាន់ថ្ងៃនេះ អ្នកម្តាយមកជាមួយ គាត់ថាមកលេងកូនថ្ងៃចុងក្រោយនៃរឿងមកដល់ឃើញបែបនេះចាំអង្កាល់ក៏រត់ទៅសុំអង្ករពីលោកក្នុងវត្តស្រាប់យកមកបញ្ចេរអង្ករកូនភ្លាម!»។
តារាសម្តែងស្រីដែលមហាជនតែងឃើញបង្ហាញពីភាពស្និទ្ធស្នាល និងផ្អែមល្ហែមតាមភាសាហៅគ្នានៅសម័យទំនើបនេះ ជាការរាប់អានគ្នាដូចបងប្អូនថា «Sis និង Bro» ជាមួយតារាសម្តែងប្រុសលោក អាឡិចហ្ស៊ូ នោះបញ្ជាក់ទៀតថា៖ «វាជាអារម្មណ៍ដែលរន្ធត់ខ្លាំង ពេលដែលខ្លួនឯងបានឃើញរូបថត និងការរៀបចំសម្រាប់ការថតកុននៅថ្ងៃចុងក្រោយនៃការថតខ្សែភាពយន្តភាគរឿង «ភ្លើងគំនុំ» របស់ផលិតកម្មប៉ុស្តិ៍លេខ ៥ ដែលមានឈុតជាតួអង្គខ្មោចនោះ គឺមើលវាដូចជាការពិតបុណ្យសពរបស់មនុស្សស្លាប់មែនទែននោះឯង។ ម្យ៉ាងទៀតតាំងពីដើមមក ខ្ញុំតែងបដិសេធការថតកុនណាដែលមានតួសម្តែងជាខ្មោច តែរឿងនេះ ខ្ញុំក៏មិនស្មានថា ឈុតមានតួខ្មោចគឺមានការរៀបចំដូចពិតបែបនេះឡើយដែរ គឺគ្រាន់គិតថាយ៉ាងហោចមានការដើរកាន់រូបថតមានស៊ុម គឺអស់បាត់ទៅហើយ តែនេះគឺមានមួយឈុតដូចការពិតតែម្តង ទើបខ្ញុំស្លុតអារម្មណ៍ ខណៈសូម្បីតែម្តាយខ្ញុំក៏គាត់តក់ស្លុតដែរ ពេលបានទៅចូលរួមការថតកុនចុងក្រោយរបស់ខ្ញុំក្នុងកុនរឿង «ភ្លើងគំនុំ» នោះ»។
កញ្ញា ឌី សូនីតា ក៏បានបញ្ជាក់ប្រាប់ពីលក្ខខណ្ឌទទួលថតកុនលើកក្រោយផងដែរ ក្រែងមានឈុតបែបនេះទៀត ហើយម្តាយនាងក៏មិនចូលចិត្តឲ្យកូនស្រីថតកុនជាតួអង្គមានការស្លាប់នោះទេ។
តារាស្រីមានពហុជំនាញទាំងវ័យក្មេងដែលមហាជនបានដឹងថា មានជំនួញខាងអចលនទ្រព្យ នាពេលថ្មីៗនេះបានបន្ថែមថា៖ «សម្រាប់ទស្សនៈម្តាយខ្ញុំ មិនសូវខុសពីផ្នត់គំនិតចាស់ៗមួយចំនួន ដែលជឿរឿងលេងក្តី ឬរឿងសម្តែងក្តី ពាក់ព័ន្ធនឹងអាយុជីវិតដូច្នេះ គឺគាត់មិនសូវចូលចិត្តទេព្រោះជារឿងធ្វើឲ្យគាត់គិតបារម្ភច្រើន។ តែថ្ងៃនោះ គាត់ក៏បានធ្វើពិធីកាត់គ្រោះតាមទំនៀមទម្លាប់រួចហើយ ខណៈគ្រួសារខ្ញុំក៏មានការសូត្រមន្តរំដោះគ្រោះរាល់ចុងឆ្នាំដែរ»៕