.jpg)
តុក្កតាមានវិញ្ញាណក្មេងស្រីសណ្ឋិត និងដុះសក់មនុស្សពិតៗ នៅអារាម ឯកោះហុកកៃដូ។ ហ្វេសប៊ុក
ក្រុងតូក្យូ: អូគីគុ ឬ «តុក្កតាខ្មោចនៅកោះហុកកៃដូ» ជាតុក្កតាជប៉ុនបុរាណដ៏គួរឲ្យខ្លាចនៅទីអារាមមួយក្នុងប្រាសាទអ៊ីវ៉ាមីហ្សាវ៉ា ដែលបានដុះសក់មនុស្ស។ ច្បាស់ណាស់ ពលរដ្ឋជប៉ុនមានជំនឿថា ព្រលឹងខ្មោចក្មេងស្រីតូចសណ្ឋិតក្នុងតុក្កតានេះ។
មានរឿងតំណាលខុសៗគ្នាអំពីតុក្កតាខ្មោច អូគីគុ តែការនិយាយតៗគ្នាដ៏ពេញនិយមបំផុតមួយចំពោះតុក្កតាបុរាណជប៉ុននេះគឺវាត្រូវបានក្មេងប្រុសអាយុ ១៧ ឆ្នាំ អៃគីឈិ ស៊ូហ្ស៊ូគិ មកពីកោះហុកកៃដូ បានទិញវាជាកាដូឲ្យប្អូនស្រីក្នុងឆ្នាំ ១៩១៨។
មានរឿងតំណាលថា កុមារីវ័យ ៣ ឆ្នាំឈ្មោះ គីគូកុ ស្រឡាញ់តុក្កតានេះយ៉ាងខ្លាំង ដែលតែងតែនាំយកតាមខ្លួនជានិច្ច សូម្បីតែគេងរៀងរាល់រាត្រី។ ប៉ុន្តែរឿងរ៉ាវដែលនាំឲ្យតុក្កតាដ៏គួរឲ្យស្រឡាញ់នេះប្រែក្លាយជាវត្ថុគួរឲ្យព្រឺព្រួចនោះគឺ ក្មេងស្រីតូច គីគូកុ បានស្លាប់មួយថ្ងៃក្រោយកើតជំងឺផ្ដាសាយ។ ពេលនោះហើយរឿងតក់ស្លុតរមែងកើតឡើងឥតស្រាកស្រាន្ដ។
គ្រួសាររបស់ក្មេងស្រីរក្សាទុកតុក្កតាដែលនាងស្រឡាញ់ ដោយដាក់ក្នុងទីសក្ការៈតូចមួយសម្រាប់ជាការចងចាំ។
ពួកគេបានហៅវាថា «អូគីគុ» ក្រោយពីបាត់បង់កូនស្រីជាទីស្រឡាញ់ និងចាប់ផ្ដើមបួងសួងដល់តុក្កតានេះជានិច្ច។ មិនយូរប៉ុន្មាន ពួកគេបានសម្គាល់ឃើញមានបញ្ហាមិនប្រក្រតីកើតឡើង ដែលតុក្កតាមានម៉ូដសក់ «អូកាបប៉ា» (ម៉ូដសក់សេះ និងសក់មានប្រវែងខ្លីលើចង្កា) ហើយពេលនេះវាបានដុះវែង។ ពួកគេចាត់ទុកថា តុក្កតានេះត្រូវបានវិញ្ញាណក្មេងស្រី គីគូកុ សណ្ឋិត។
អារាមម៉ានណេនជី ដែលល្បីដោយសារជំនឿតុក្កតាដុះសក់មនុស្ស។ ហ្វេសប៊ុក
ក្នុងឆ្នាំ ១៩៣៨ ក្រុមគ្រួសារកុមារី គីគូកុ បានសម្រេចចិត្ដរើផ្ទះពីហុកកៃដូ ដោយអត់យកតុក្កតានោះមកតាម ពីព្រោះពួកគេយល់ថា វាគួរតែស្ថិតនៅទីតាំងដដែល។
ដូច្នេះ ពួកគេបានប្រគល់វាដល់ព្រះសង្ឃនៅអារាមម៉ានណេនជី និងបានទូលប្រាប់អំពីអាថ៌កំបាំងដ៏គួរឲ្យភ័យខ្លាចរបស់តុក្កតានេះ។ តុក្កតា អូគីគុ ត្រូវបានរក្សាទុកក្នុងទីអារាមនោះរៀងរហូតមក ហើយមនុស្សម្នាតែងតែមកមើលសក់មនុស្សបន្ដដុះ តែពួកគេមិនត្រូវបានអនុញ្ញាតឲ្យថតរូបតុក្កតាឡើយ។
បច្ចុប្បន្ន តុក្កតា អូគីគុ បានដុះសក់វែងដល់ត្រឹមជង្គង់ តែព្រះសង្ឃក៏តែងតែកាត់តម្រឹមជានិច្ចកាល។
រឿងរ៉ាវដ៏ព្រឺព្រួចរបស់តុក្កតា អូគីគុ បានទាក់ចិត្ដអ្នកសរសេរប្រលោមលោក ផលិតករភាពយន្ដ និងល្ខោនបុរាណ កាប៊ូគិ ជាច្រើនថែមទៀត៕HR
