.jpg)
ក្រុមយុវជនសម្តែងសិល្បៈដើម្បីបញ្ជ្រាបពីបរិស្ថាននៅក្នុងមហោស្រពសិល្បៈ និងបរិស្ថានកាលឆ្នាំ ២០១៨។ រូបថត សហការី
ក្រុងស្ទឹងសែនៈ បន្ទាប់ពីមានការគាំទ្រស្ទើរតែគ្រប់មជ្ឈដ្ឋានកាលពីរៀបចំជាលើកដំបូងនៅឆ្នាំមុននោះ មហោស្រពសិល្បៈ និងបរិស្ថានក៏ត្រូវប្រារព្ធធ្វើលើកទី ២ ឆ្នាំ ២០១៩ នេះដែលមានចំនួន ៤ ថ្ងៃ និងមានកម្មវិធីជាច្រើន សម្រាប់ចែកជូនមហាជនរីករាយចូលរួមកម្សាន្ត និងស្វែងយល់ពីសិល្បៈវប្បធម៌ខ្មែរ និងបញ្ហាបរិស្ថានបន្ថែមទៀតឲ្យកាន់តែច្បាស់លាស់។
រាល់ទម្រង់នៃទស្សនីយភាពសិល្បៈចម្រុះមានការសម្តែងសិល្បៈមហាជន ការតាំងពិព័រណ៍ ការចាក់ផ្សាយពីឯកសារស្រាវជ្រាវទាក់ទងទៅនឹងសិល្បៈ រាំធន ក៏ដូចជាការរៀបចំសិក្ខាសាលាជាមួយនឹងសិស្ស ពលរដ្ឋនៃសហគមន៍ អ្នកលក់ដូរ និងអាជ្ញាធរពាក់ព័ន្ធនឹងប្រារព្ធធ្វើនៅក្នុងបរិវេណវត្តសំបូរ ស្រុកប្រាសាទសំបូរ ខេត្តកំពង់ធំគឺចាប់ផ្តើមពីថ្ងៃទី ២០ រហូតទី ២៤ ខែឧសភា ឆ្នាំ ២០១៩ ។
សិល្បៈប្រឌិតស្តីពីប្លាស្ទិកក្នុងមហោស្រពសិល្បៈ និងបរិស្ថានឆ្នាំមុន។ រូបថត សហការី
កញ្ញា សួស ស៊ីណាត ប្រធានក្រុមគម្រោងរៀបចំកម្មវិធី «មហោស្រពសិល្បៈ និងបរិស្ថាន» នៃអង្គការសិល្បៈខ្មែរអមតៈ (CLA) បានរៀបរាប់ពីគោលបំណងនិងកម្មវិធីសំខាន់ៗឲ្យដឹងថា៖ «ទី ១ យើងចង់លើកកម្ពស់ការយល់ដឹងពីតួនាទីសិល្បៈក្នុងការអភិវឌ្ឍសង្គម ខណៈចំណុចទី ២ ចង់លើកកម្ពស់ការយល់ដឹងពីផលប៉ះពាល់នៃការប្រើប្រាស់ប្លាស្ទិក និងទី ៣ ចង់ឲ្យផ្លាស់ប្តូរអំពីការគិតរបស់មនុស្សចំពោះទម្លាប់ប្រើប្រាស់ប្លាស្ទិកគឺចង់លើកទឹកចិត្តពួកគេឲ្យកាត់បន្ថយមកនៅត្រឹមកម្រិតតិចបំផុត។ ដោយឡែកតាមរយៈសិល្បៈនេះដែរ វាមិនត្រឹមតែអាចជួយបម្រើនូវភាពរីករាយដល់មនុស្សឲ្យសប្បាយប៉ុណ្ណោះទេ តែថែមទាំងអាចជាវិធីផ្ញើសារល្អៗដែលជាចំណេះដឹងឲ្យអ្នកទស្សនាទទួលបានផលផងដែរ»។
ប្រធានក្រុមគម្រោងរៀបចំកម្មវិធី កញ្ញា សួស ស៊ីណាត ក៏បានបញ្ជាក់ពីកម្មវិធីនានាឲ្យដឹងត្រួសៗដែរថា៖ «សម្រាប់ សិក្ខាសាលាស្តីពីការបង្កើតភ្លេងថ្មីមានចាប់ថ្ងៃទី ២០ ដល់ទី ២៤ ខែឧសភា ឆ្នាំ ២០១៩ ខណៈថ្ងៃទី ២១ ដល់ទី ២៣ ខែឧសភា ២០១៩ ជាកម្មវិធីសិក្ខាសាលាជាមួយសិស្ស ពលរដ្ឋសហគមន៍ អ្នកលក់ដូរ និងអាជ្ញាធរពាក់ពន្ធ័នៅខេត្តកំពង់ធំនៃតំបន់សំបូរព្រៃគុកទៅលើប្រធានបទគឺផលប៉ះពាល់នៃការប្រើប្រាស់គ្រឿងប្លាស្ទិក និងការចែកដើមឈើ ដើម្បីដាំបន្ថែម»។
គួរបញ្ជាក់ដែរថាសម្រាប់ប្រាសាទសំបូរព្រៃគុកទើបតែត្រូវបានបញ្ចូលក្នុងបញ្ជីសម្បត្តិបេតិកភណ្ឌពិភពលោកកាលពីថ្ងៃទី ៨ ខែកក្កដាឆ្នាំ ២០១៧ នៅក្នុងកិច្ចប្រជុំកំពូលលើកទី ៤១ នៃគណៈកម្មការបេតិកភណ្ឌពិភពលោកដែលប្រើអស់រយៈពេល ១០ ថ្ងៃនៅឯទីក្រុងក្រាកូនៃប្រទេសប៉ូឡូញ ហេតុដូច្នេះហើយទើបជំរុញឲ្យមានការរៀបចំជាព្រឹត្តិការណ៍សំខាន់នានា នៅឯតំបន់នេះឲ្យកាន់តែមានសក្ដានុពលខ្លាំង ដើម្បីទាក់ទាញក្រុមទេសចរទៅទស្សនាកម្សាន្ត៕
