ភ្នំពេញៈ កម្មវិធីពិព័រណ៍សៀវភៅកម្ពុជាលើកទី ៧ នឹងមានស្តង់ចំនួន ១១៤ ស្តង់ សម្រាប់ត្រៀមដាក់តាំងបង្ហាញសៀវភៅនានា ដែលនាំមកពីបណ្តាគ្រឹះស្ថានបោះពុម្ពជិត ៨០០ ធ្វើនៅបរិវេណនៃបណ្ណាល័យជាតិ មានរយៈពេល ៣ ថ្ងៃគឺចាប់ថ្ងៃទី ៧-៩ ខែ ធ្នូ ឆ្នាំ ២០១៨ នាចុងសប្តាហ៍នេះ។
កម្មវិធីពិព័រណ៍សៀវភៅដែលតែងធ្វើឡើងជារៀងរាល់ឆ្នាំ ខណៈការប្រារព្ធដំបូងឆ្នាំ ២០១១ ដោយមានអ្នកចូលរួមតិច និងចំនួនស្តង់តាំងសៀវភៅក៏តិចតួចនោះ ឥឡូវកំពុងតែទាក់ទាញចំណាប់អារម្មណ៍ទាំងអ្នកចូលរួម បណ្តាគ្រឹះស្ថានបោះពុម្ព ក៏ដូចក្រុមហ៊ុនស្ពនស័រ កាន់តែច្រើនឡើងពីមួយឆ្នាំទៅមួយឆ្នាំគួរឲ្យកត់សម្គាល់ក្រោមប្រធានបទ «សៀវភៅរស់ចំណេះរីក»។
លោកស្រី ខ្លូត វិបុលឡាប្រធានបណ្ណាល័យជាតិកម្ពុជា បង្ហើបឲ្យដឹងពីភាពប្រែប្រួលនៃការរៀបចំពិព័រណ៍សៀវភៅកម្ពុជាលើកទី ៧ នៅក្នុងឆ្នាំនេះថា៖ «ចំពោះដំណើរការរៀបចំគឺនៅតែមានរបៀបវារៈដូចឆ្នាំមុន តែអ្វីដែលប្រែប្រួលគឺសកម្មភាពរៀបចំ។ ឆ្នាំនេះ យើងមានការភ្ញាក់ផ្អើលខ្លាំង ដោយសារមានបណ្តាគ្រឹះស្ថានបោះពុម្ពជាច្រើនមានប្រមាណជិត ៨០០ គ្រឹះស្ថាន បានទំនាក់ទំនងដាក់ស្តង់ (Booth) តែយើងអាចមានកន្លែងដាក់អស់លទ្ធភាពត្រឹមតែចំនួន ១១៤ ស្តង់ ព្រោះបរិវេណបណ្ណាល័យជាតិយើងមានទំហំតូច។
ដូច្នេះស្តង់នីមួយៗអាចនឹងមានដាក់តាំងរួមគ្នាច្រើនរហូតដល់ចំនួន ១០ គ្រឹះស្ថានក៏មានដែរ។ ប្រៀបធៀបនឹងឆ្នាំមុន គឺយើងរៀបចំមានចំនួនជាង ៨០ ស្តង់។ យើងមានក្រុមហ៊ុនធំៗជាច្រើនជាម្ចាស់ស្ពនស័រនៅឆ្នាំនេះ ដូចជា ក្រុមហ៊ុនជីបម៉ុង ធនាគារ ANZ Royal និងក្រុមហ៊ុន Crab។ ចំពោះក្រុមហ៊ុន Crab ចូលរួមជួយផ្នែកមធ្យោបាយធ្វើដំណើររបស់អ្នកចូលរួមគឺមានការបញ្ចុះតម្លៃពិសេសចំនួន ៥០ ភាគរយនៃមធ្យោបាយធ្វើដំណើរដោយសេវាកម្ម Crab»។
ដោយមានការយល់ដឹងអំពីសារៈសំខាន់នៃការអានសៀវភៅ និងការរៀបចំពិធីពិព័រណ៍សៀវភៅកម្ពុជា ពេលកន្លងមកប្រកបដោយការសហការផ្សព្វផ្សាយបានទូលំទូលាយនោះ ទើបគេសង្កេតឃើញសម្ទុះនៃក្រុមសិស្ស និស្សិត ភ្ញៀវជាតិ និងភ្ញៀវអន្តរជាតិ មានការកើនឡើងគួរឲ្យកត់សម្គាល់។
លោកស្រី ខ្លូត វិបុលឡា ក៏បានរំឭកពីចំនួនអ្នកចូលរួមសរុបកាលឆ្នាំចាស់ថា៖ «កាលពីឆ្នាំ ២០១៧ អ្នកចូលរួមសរុបទាំងអស់ក្នុងរយៈពេល ៣ ថ្ងៃ គឺយើងទទួលបាននូវចំនួន ៥១ ០០០ នាក់ ខណៈឆ្នាំនេះយើងរំពឹងថា នឹងមានអ្នកចូលរួមទាំង ៣ ថ្ងៃ អាចបានចំនួន ៧ ម៉ឺននាក់។ នេះបើយោងតាមការស្ទាបស្ទង់មតិតាមរយៈអ្នកចូលរួមបានចូលគេហទំព័ររបស់បណ្ណាល័យជាតិ»៕