.jpg)
រូបក្រុមការងារមូលនិធិអាស៊ី និង Starbucks កម្ពុជា នៅក្នុងយុទ្ធនាការជួយរៀបចំបណ្ណាល័យកុមារ។ សហការី
ភ្នំពេញៈ គម្រោងតោះអាន! Let''s Read! គឺជាគម្រោងឌីជីថលរបស់អង្គការមូលនិធិអាស៊ី បានបង្កើតក្នុងគោលដៅលើកស្ទួយការអានសៀវភៅរបស់កុមារ ដោយការនិយាយពីតំបន់ក្នុងស្រុក តួអង្គសំខាន់ និងភាសា នៅតាមប្រទេសមួយចំនួននៃទ្វីបអាស៊ី។
ចាប់ពីថ្ងៃទី១ ខែ ធ្នូ ឆ្នាំ ២០១៨ កន្លងមក ក្រុមហ៊ុនកាហ្វេ Starbucks កម្ពុជា និងអង្គការមូលនិធិអាស៊ីកម្ពុជា បានសហការគ្នាបោះផ្សាយសៀវភៅរឿងនិទាន សម្រាប់កុមារឈ្មោះថា «ខាល់ឌី និងពពែរាំរែក»។ តាមរយៈសៀវភៅនេះ ក៏ជាផ្នែកមួយនៃយុទ្ធនាការរបស់សប្បុរសធម៌ (Give Good) នៅឆ្នាំ ២០១៨ របស់ Starbucks ក្នុងគោលបំណងបង្កើនភាពរីករាយនៃការអានសម្រាប់កុមារកម្ពុជា។
សាធារណជន ក៏អាចចូលរួមយុទ្ធនាការសប្បុរសធម៌នេះដែរ តាមរយៈការជួយទិញសៀវភៅរឿង «ខាល់ឌី និងពពែរាំរែក» ដែលមានដាក់លក់ទូទាំង ១៥ សាខានៃហាងកាហ្វេរបស់ Starbucks កម្ពុជា ទូទាំងទីក្រុងភ្នំពេញ និងនៅទីរួមខេត្តសៀមរាប ១ ក្បាល មានតម្លៃ ៦ ដុល្លារ។
អ្នកស្រី Meloney Lindberg ជាតំណាងអង្គការមូលនិធិអាស៊ី ប្រចាំប្រទេសកម្ពុជា ថ្លែងថា៖ «សៀវភៅរឿងពីកាហ្វេ នឹងជួយកុមារយល់ដឹងពីប្រវត្តិរបស់កាហ្វេ។ គម្រោងតោះអាន ចាប់ផ្តើមនៅប្រទេសកម្ពុជា តាំងពីឆ្នាំ ២០១៦ មកម្ល៉េះ។ គោលបំណងសំខាន់យើងគឺបង្កើតធនធាននៃការអានឲ្យកាន់តែច្រើន និងជួយផ្សព្វផ្សាយពីវប្បធម៌នៃការអានដល់កុមារនៅកម្ពុជា»។
តាមរយៈយុទ្ធនាការនេះដែរ Starbucks កម្ពុជា ក៏គាំទ្រដល់គម្រោងតោះអាន! របស់អង្គការមូលនិធិអាស៊ី ដែលមានគោលដៅពង្រឹងធនធានសៀវភៅកុមារ ដែលមានភាសា សាច់រឿង តួអង្គ តាមប្រទេសក្នុងតំបន់អាស៊ី ដែលបង្កការងាយស្រួលដល់កុមារសម្រាប់ការស្រមៃមើលឃើញ។
សៀវភៅអានកុមាររឿង «ខាល់ឌី និងពពែរាំរែក»។សហការី
កាលពីឆ្នាំមុន Starbucks កម្ពុជា បានគាំទ្រជួយបោះពុម្ពសៀវភៅកុមារចំនួន ៥០០ ក្បាល។ លោក ប៉ោ លីម ជាអ្នកគ្រប់គ្រងទូទៅនៃក្រុមហ៊ុន Starbucks កម្ពុជា ឲ្យដឹងថា៖ «យើងពិតមានក្តីរីករាយមែនទែន នឹងលទ្ធផលនៃកិច្ចសហការរវាងយើង និងអង្គការមូលនិធិអាស៊ី កាលពីឆ្នាំមុន ហើយរំពឹងថា នឹងបន្តការងារនេះជាមួយគ្នាបន្តទៅទៀត»។
យុទ្ធនាការឆ្នាំនេះក៏ផ្តល់់ឱកាសដល់អ្នកនិពន្ធ និងវិចិត្រករកម្ពុជា សហការនឹងអ្នកជំនាញផ្នែកឆុងកាហ្វេរបស់ Starbucks ដើម្បីផលិតសៀវភៅរឿង «ខាល់ឌី និងពពែរាំរែក» ជារឿងព្រេងនិទានស្តីពីការរកឃើញកាហ្វេដំបូង។
ចំពោះប្រាក់ចំណេញដែលរកបានពីការលក់សៀវភៅ នឹងយកទៅបន្តគាំទ្រដល់គម្រោង Let''s Read! នៅប្រទេសកម្ពុជា និងប្រទេសដទៃទៀតនៅអាស៊ី។ សៀវភៅរឿងនេះ មានជាភាសាខ្មែរ និងអង់គ្លេស ហើយក៏អាចរកបាននៅលើគេហទំព័រទាំង ២ នេះ។
គម្រោងបណ្ណាល័យឌីជីថល តោះអាន! មានសៀវភៅកុមារប្រកបដោយគុណភាពខ្ពស់ ជាភាសាខ្មែរ ចំនួនជាង ២៦០ ក្បាល និងជាង ១,៦០០ ក្បាលទៀតជា ភាសា ២០ ផ្សេងទៀត។ លោកអ្នក អាចអាន និងទាញយកសៀវភៅទាំងនេះដោយមិនគិតថ្លៃ នៅលើគេហទំព័រ www.letstreadasia.org ឬដោនឡូតអេប Let''s Read! នៅលើ Google PlayStore៕
