ក្រុងអាំស្ទែរដាំ: ម៉ោងជិត ១១ អាធ្រាត្រទៅហើយ ខណៈព្រឹលបន្ដធ្លាក់គ្របដណ្ដប់លើដងវិថីតូចៗនៃ ក្រុងអាំស្ទែរដាំ ប្រទេសហូឡង់។ យុវជន ២ នាក់គ្រងឈុតពាក់អាវមួកដើរទៅកាន់បង្អួចធំមួយក្នុងខណ្ឌភ្លើងក្រហមដ៏ល្បីបំផុតក្នុងពិភពលោក។
Daily Mail បានរាយការណ៍ថា ក្រោមពន្លឺភ្លើងពណ៌ក្រហមព្រឹមៗ មាននារី ៣ នាក់ស្លៀកតែខោទ្រនាប់ក្រណាត់ប៉ាក់។
ម្នាក់អង្គុយចុចទូរស័ព្ទ ឥតខ្វល់យកភ្នែកដៀងតបការរំពៃមើលរបស់បុរស។ ម្នាក់ទៀត លាបក្រែមបបូរមាត់ ហើយអ្នកទី ៣ អង្គុយយោលខ្លួនតិចៗ រំលេចស្នាមញញឹមពព្រាយ។
សេវាកម្មផ្លូវភេទបានរីកចម្រើនយ៉ាងឆាប់រហ័ស ហើយថ្ងៃសម្បូរម៉ូយ នារីៗអាចរកចំណូលបានរហូតដល់ ៤៨០ ដុល្លារក្នុង ១ ថ្ងៃ។
ភ្ញៀវភាគច្រើនជាពលរដ្ឋមកពីចក្រភពអង់គ្លេស។ ពួកគេមកទីនេះដោយបើកបររថយន្ដ នៅថ្ងៃវិស្សមកាល ឬថ្ងៃចុងសប្ដាហ៍ ដើម្បីលួចដៀងកន្ទុយភ្នែកមើលនារីៗលក់ខ្លួនតាមទ្វារកញ្ចក់។ បុរសខ្លះថែមទាំងបានតបនឹងកាយវិការអូសទាញរបស់ពួកនាងទៀតផង។
ប៉ុន្ដែភ្ញៀវទេសចរ មកក្រុងអាំស្ទែរដាំ ត្រូវបានជម្រាបជូនដំណឹងឲ្យបញ្ឈប់ឌឺដង និងបង្ហាញកាយវិការមិនសមរម្យចំពោះនារីរកស៊ីផ្លូវភេទក្នុងតំបន់ភ្លើងក្រហមដ៏អសោចនោះទៀត។ មគ្គុទេ្ទសក៍នឹងត្រូវឲ្យប្រាកដថា ភ្ញៀវរបស់ខ្លួនត្រូវបែរខ្នងចេញពីនារីៗបោយដៃសម្ញែងរាងក្នុងបន្ទប់កញ្ចក់។
ច្បាប់ដ៏តឹងរ៊ឹងថ្មី ដែលចូលជាធរមានក្នុងខែមេសា ត្រូវបានដាក់ឲ្យអនុវត្ដដោយអាជ្ញាធរក្រុងដើម្បីបង្ក្រាបលើទេសចរចូលចិត្ដឌឺដងដោយនាំគ្នាដើរជាក្រុមតាមតំបន់ផ្ទះបននេះ។
ការស្រែកឡូឡា ផឹកគ្រឿងស្រវឹង និងលេងថ្នាំក៏ត្រូវហាមឃាត់ចំពោះភ្ញៀវទេសចរដែរ ដោយសូម្បីតែការថតរូបក៏លែងមានទៀត។
ប្រតិបត្ដិករទេសចរណ៍ត្រូវបានបង្គាប់ឲ្យជម្រាបជូនដល់ភ្ញៀវឲ្យចេះគោរពចំពោះនារីរកស៊ីផ្លូវភេទ និងពលរដ្ឋក្នុងតំបន់ផ្ទះបនទាំងនេះ។
ដំណើរកម្សាន្ដត្រូវតែបិទនៅម៉ោង ១១ យប់ និងកំណត់ត្រឹមមនុស្សតែ ២០ នាក់ប៉ុណ្ណោះ។ មគ្គុទេ្ទសក៍ដែលល្មើសនឹងបទបញ្ជានេះ នឹងត្រូវពិន័យ ២៣៧ ដុល្លារ ខណៈក្រុមហ៊ុនអាចត្រូវជាប់ពិន័យ ១ ១៧៥ ដុល្លារថែមទៀត។
ពេស្យាកម្មជារបរស្របច្បាប់នៅហូឡង់ តែមិនរាយប៉ាយតាមដងផ្លូវឡើយ ដូច្នេះនារីរកស៊ីផ្លូវភេទក្នុងក្រុងអាំស្ទែរដាំត្រូវស្ថិតនៅក្នុងទូកញ្ចក់ដើម្បីទាក់ទាញម៉ូយ៕HR