ក្រុងប៉េកាំង: ស្ដ្រីវ័យកណ្ដាលមកពីក្រុងហារប៊ីន ប្រទេសចិន ទើបរកឃើញថ្លើមផ្ទុកជាតិគីមី ដែលទំនងជាបង្កឡើងដោយចំណូលចិត្ដលាបថ្នាំសក់រៀងរាល់ខែ អស់រយៈពេល ១០ ឆ្នាំ។
ដោយស្គាល់ជាអ្នកស្រី ឈិន លើបណ្ដាញផ្សព្វផ្សាយចិន ស្ដ្រី វ័យខ្ទង់ ៥០ ឆ្នាំរូបនេះ បានអះអាងថា សក់ស្កូវរបស់អ្នកស្រីកាន់តែច្រើនស្ទើរពេញក្បាល។ ដូច្នេះ ដើម្បីទប់ស្កាត់បញ្ហានេះ អ្នកស្រីត្រូវលាបសក់នៅសាឡនរៀងរាល់ខែ។ ទើបតែថ្មីៗនេះ អ្នកស្រី បានដឹងថា ទម្លាប់នេះបានបង្កគ្រោះថ្នាក់យ៉ាងធ្ងន់ធ្ងរដល់ថ្លើម។
កាលពី ២ ខែមុន ពេលអ្នកស្រី ឈិន ដើរឡើងជណ្ដើរទៅកាន់បន្ទប់គេងពេលរាត្រី អ្នកស្រីចាប់ផ្ដើមមានអារម្មណ៍ហត់ និងថប់ដង្ហើមប្លែក បន្ទាប់មក ស្វាមីបានសម្គាល់ឃើញថា ស្បែករបស់អ្នកស្រីប្រែជាពណ៌លឿង និងភ្នែកឡើងស។ ពួកគេបានប្រញាប់ទៅកាន់មន្ទីរពេទ្យភ្លាម។
នាយកដ្ឋានវេជ្ជសាស្ដ្រជំងឺឆ្លង ក្រុងហារប៊ីន បានរកឃើញថា អ្នកស្រីផ្ទុកសារធាតុគីមី ប៊ីលីរូប៊ីន លើស្បែកលើសប្រក្រតីជាង ១០ ដង។
ក្រុមវេជ្ជបណ្ឌិត រកឃើញថា ថ្លើមរបស់ស្ដ្រីរូបនេះ កើតជំងឺថ្លើមតំណាក់កាលចុងក្រោយ និងព្យាយាមស្វែងរកមូលហេតុ។
ស្ដ្រីរូបនេះមិនប៉ះគ្រឿងស្រវឹង ហើយប្រវត្ដិការប្រើប្រាស់ឱសថមិនបង្ហាញសញ្ញាប៉ះពាល់ដល់ថ្លើមធ្ងន់ធ្ងរឡើយ។
ក្រោយពីឮទម្លាប់លាបថ្នាំសក់រៀងរាល់ខែរយៈពេល ១០ ឆ្នាំ ក្រុមវេជ្ជបណ្ឌិតសន្និដ្ឋានថា សារធាតុគីមីថ្នាំលាបសក់ជាដើមចមបង្កជំងឺថ្លើមធ្ងន់ធ្ងរនេះ។
ក្រោយពីការព្យាយាមរយៈពេល ២០ ថ្ងៃ អ្នកស្រី ឈិន មានអាការប្រសើរឡើងបន្ដិចតែ ក្រុមអ្នកជំនាញនិយាយថា សារធាតុគីមីបានធ្វើឲ្យខូចថ្លើមមួយចំនួនដែលអាចបង្កើនឱកាសកើតជំងឺមហារីកថែមទៀត។
វេជ្ជបណ្ឌិត ហ្វូ លីជួន នាយកនៃនាយកដ្ឋានវេជ្ជសាស្ដ្រទូទៅសម្រាប់ជំងឺឆ្លង បាននិយាយថា ថ្នាំលាបសក់ភាគច្រើនផ្ទុកនូវសារធាតុគីមីជាច្រើន ដោយខ្លះ មានជាតិពុលខ្លាំងចំពោះរាងកាយមនុស្ស ដូចជា នីត្រូបេនហ្សេន និងអានីឡាញជាដើម។
សមាសធាតុទាំងនេះ ងាយស្រូបចូលតាមស្បែកក្បាល ហើយពេលវាចូលដល់ក្នុងរាងកាយ វាត្រូវបានរំលាយដោយថ្លើម។
ជារឿយៗ វាមិនត្រឹមតែបំផ្លាញដល់សរីរាង្គប៉ុណ្ណោះទេ តែថែមទាំងអាចបង្កផលប៉ះពាល់ធ្ងន់ធ្ងរ ដូចជា ករណីរបស់អ្នកស្រី ឈិន ជាដើម។
វេជ្ជបណ្ឌិត បានលើកឡើងថា អ្នកមិនគួរលាបថ្នាំសក់ទេ ដើម្បីសុខភាពថ្លើម។ តែបើអ្នកត្រូវតែលាបថ្នាំសក់ដោយខានមិនបាន លោកបានណែនាំឲ្យប្រើថ្នាំលាបចម្រាញ់ពីផលិតផលរុក្ខជាតិ។
បើអ្នកជ្រើសរើសយកថ្នាំលាបគីមី វេជ្ជបណ្ឌិត ហ្វូ អះអាងថា អ្នកមិនគួរប្រើវាញឹកញាប់លើសពីម្ដងក្នុងរយៈពេល ៦ ខែឡើយ៕ HR
ប្រភព Odditycentral.com