.jpg)
រូបតំណាង : រថយន្តក្រុងនៅអេក្វាទ័រ ដែលអាចបង់ថ្លៃជិះជាដបប្លាស្ទិក។ រូបថត AFP
ក្រុងគីតូ៖ ការថែទាំបរិស្ថានធ្វើឲ្យប្រទេស អេក្វាទ័រ ទទួលបានជោគជ័យ យ៉ាងហោចណាស់ជាប្រយោជន៍ដល់អ្នកប្រើប្រាស់សេវាកម្មដឹកជញ្ជូនសាធារណៈក្នុងមជ្ឈមណ្ឌលពាណិជ្ជកម្ម ហ្គាយ៉ាឃ្វីល។
គម្រោងថ្មីនេះមានបំណងទប់ស្កាត់ការពង្រាយសំរាម និងការបំពុលបរិស្ថានដែលអាចឲ្យអ្នកដំណើរផ្លាស់ប្ដូរដបប្លាស្ទិកជំនួសប្រាក់ដើម្បីទិញសំបុត្ររថយន្តក្រុង។
ទីក្រុងកំពង់ផែ ភាគនិរតីប្រទេស អេក្វាទ័រ គឺជាទីក្រុងល្បីបំផុតទី២ ប្រចាំប្រទេស ជាមួយប្រជាជន ២,៧ លាននាក់ តែវាក៏ជាទីក្រុងផលិតសំរាមដ៏ច្រើនផងដែរ។ អ្នកដំណើរ ដែលប្រើប្រព័ន្ធសេវាកម្មរថយន្ដក្រុង Metrovia ពេលនេះនាំគ្នាតម្រង់ជួរនៅមុខម៉ាស៊ីនទើបដំឡើងថ្មី ដោយរង់ចាំញុកដបប្លាស្ទិកជំនួសប្រាក់ ២ សេន ដែលពួកគេត្រូវចំណាយលើការជិះរថយន្ដក្រុង។
អ្នកដំណើរ គ្រីស្ទៀន ខាដេណាស បាននិយាយថា៖ «ចូរស្រមៃថា ២ សេន (១ ដប) ហើយដបប្លាស្ទិក ១៥ ស្មើនឹង ៣០ សេន យើងអាចប្រើសម្រាប់បង់ថ្លៃរថយន្តក្រុងជាស្រេច»។
ជនចូលនិវត្ដន៍អាយុ ៧៦ ឆ្នាំ ឈ្មោះ វ៉ាស៊ីនតោន ប្រាវូ ត្រូវចំណាយប្រាក់ ៩ ដុល្លារជិះតាក់ស៊ីទៅក្នុងក្រុង។ ពេលនេះលោកត្រូវដើររើសដបតាមធុងសំរាម និងតាមដងផ្លូវពេលធ្វើដំណើរម្ដងក្នុងមួយសប្ដាហ៍។
រូបតំណាង : ត្រឹមតែ ២ ខែ ប្លាស្ទិកជាង ២៤ ០០០ ដប ត្រូវបានប្រមូល។ រូបថត AFP
ទីក្រុងហ្គាយ៉ាឃ្វីល ផលិតសំរាម ៤ ២០០ តោនក្នុង ១ ថ្ងៃ ហើយមានតែ ១៤ ភាគរយទេ ដែលអាចកែច្នៃ។
ទោះជាយ៉ាងណា ប្រព័ន្ធទូទាត់សំរាមនៅមិនទាន់ពេញនិយមនោះទេដោយមានតែម៉ាស៊ីនទូទាត់ប្រាក់តែ ១ គ្រឿង សម្រាប់ការដោះដូរជាមួយដបប្លាស្ទិកជំនួសការបង់ប្រាក់ជិះរថយន្តក្រុង។
នាយកគ្រប់គ្រងសេវាកម្មដឹកជញ្ជូនសាធារណៈ Metrovia លោក ឡេអូប៉ូលដូហ្វាល់ឃ្វេស បានឆ្លើយតបថា ម៉ាស៊ីនថ្មីៗ នឹងមកដល់ឆាប់ៗ ដែលនឹងទូទាត់ថ្លៃសេវាកម្មជិះរថយន្តក្រុងភ្លាមៗ ដោយមិនចាំបាច់រង់ចាំយូរ។
រយៈពេល ២ ខែ តាំងពីដាក់ដំណើរការប្លាស្ទិកជាង ២៤ ០០០ ដបត្រូវបានប្រមូលកែច្នៃ៕ AFP/HR
