ក្រុងប៊ែរឡាំង: ឆ្លងថ្នល់ ជាឱកាសត្រូវប្រញាប់ដើរបន្ទាន់។ តែនោះជាអ្វីដែលពលរដ្ឋក្រុង ហ្រ្វែដប៊ឺក ប្រទេសអាល្លឺម៉ង់ស្រឡាំងកាំង ពេលភ្លើងសញ្ញាចរាចរណ៍លោតពណ៌បៃតងបង្ហាញរូបលោក Elvis Presley។
ដើម្បីរំឭកការផ្សារភ្ជាប់រវាងតារាចម្រៀង «Love me Tender» ជាមួយទីក្រុង ហ្រ្វ៊ែដប៊ឺក អាជ្ញាធរមូលដ្ឋានបានកែច្នៃពន្លឺភ្លើងពណ៌ចរាចរណ៍ចំនួន ៣ ទៅជាពន្លឺភ្លើងរូបរាងតារាចម្រៀងរ៉ុកអេនរ៉ូល Elvis។
ពេលភ្លើងស្ដុបចេញពណ៌ក្រហម វាបង្ហាញពីនិមិត្តសញ្ញាតន្ដ្រី ដែលមានរូបក្បាលមេក្រូរបស់លោក។ ពេលចេញពណ៌បៃតង រូបលោក Elvis រំលេចរាងឈរកន្ធែកជ្រែង ដែលជាកាយវិការពេញនិយមរបស់លោក។ លោកបានស្លាប់នៅអាយុ ៤២ ឆ្នាំ ទាំងមិននឹកស្មានដល់ ក្នុងឆ្នាំ ១៩៧៧។
ទីក្រុងអាល្លឺម៉ង់នានាចូលចិត្ដរចនាភ្លើងស្ដុបដើម្បីឧទ្ទិសរំឭកដល់បុគ្គលល្បីៗ។ ទីក្រុង បោន បានដំឡើងភ្លើងស្ដុបរំលេចមុខតន្ត្រីករ Beethoven ខណៈទីក្រុងខាងលិច ទ្រីយើរ បានប្រារឰខួប ២០០ ឆ្នាំរបស់ អ្នកប្រាជ្ញ Karl Marx ដោយរចនាភ្លើងស្ដុបរូបពុកចង្ការបស់លោក៕