ក្រុងញូវដែលី៖ ចំពោះ យុវតី នីឡានស៊ី ផាថែល (Nilanshi Patel) នាងមានកម្ពស់ត្រឹមតែ ១,៦៧ ម៉ែត្រទេ ប៉ុន្តែក្មេងស្រីមកពីតំបន់ម៉ូដាសា ភាគខាងជើងរដ្ឋហ្គូចារ៉ាត់រូបនេះ មានសក់វែងជាងរាងកាយរបស់នាងដល់ទៅ ២០ សង់ទីម៉ែត្រ។
កញ្ញា នីឡានស៊ី ផាថែល អាយុ ១៧ ឆ្នាំ ដែលត្រូវបានប្រគល់វិញ្ញាបនបត្រនៃកំណត់ត្រាហ្គីនណេសពិភពលោកឆ្នាំ ២០១៩ ចំពោះសក់ដ៏វែងបំផុតជាមួយប្រវែងដល់ទៅ ១៩០ សង់ទីម៉ែត្រ បានបង្ហោះរូបភាពជាមួយម្ដាយ កាមីនីបេណាត់ (Kaminibenat) នៅទីក្រុងម៉ូដាសា ចម្ងាយប្រមាណ ១១០ គីឡូម៉ែត្រ ពីអាមេដាបាដ កាលពីថ្ងៃទី ១៩ ខែ មករា ឆ្នាំ ២០២០។
យោងតាមវិបសាយក្នុងស្រុក នាងបានទុកសក់ឲ្យដុះតាមធម្មជាតិតាំងពីអាយុ ៦ ឆ្នាំ ហើយសក់ដ៏វែងអន្លាយរបស់នាង គឺជាភាពទាក់ទាញចម្បងរបស់យុវតីរូបនេះផងដែរ។
កញ្ញា នីឡានស៊ី ជាសិស្សរៀនផ្នែកវិទ្យាសាស្ដ្រ ដែលត្រៀមខ្លួនជាវិស្វករកុំព្យូទ័រម្នាក់ បានបំបែកកំណត់ត្រាក្នុងនាមជាមនុស្សវ័យក្រោម ១៨ ឆ្នាំ ដែលមានសក់វែងជាងគេបំផុតក្នុងលោក។ កញ្ញា នីឡានស៊ី ដែលត្រូវចំណាយពេលកន្លះម៉ោងសម្ងួតសក់ និងសិតសក់ដ៏យូរបានពោលថា៖ «សំណាងណាស់ ខ្ញុំមានហ្សែនល្អ។ មនុស្សភាគច្រើនដែលខ្ញុំបានជួបចង់ដឹងពីអាថ៌កំបាំងចំពោះសក់ដុះលូតវែងរបស់ខ្ញុំ តែខ្ញុំហាក់ដូចជាមិនបានធ្វើអ្វីខុសពីធម្មជាតិឡើយ។ ខ្ញុំកក់សក់ ១ សប្ដាហ៍ម្ដង ដែលចំណាយពេលដល់ទៅ ២ ម៉ោង»។
នាងរំសាយសក់ឥណ្ឌា កញ្ញា នីឡានស៊ី សារភាពថា ខ្លួនបានប្រើប្រេងដែលអ្នកម្ដាយធ្វើឲ្យ ជារូបមន្ដសម្ងាត់ ដែលនាងមិនអាចលាតត្រដាង។ ភាគច្រើននាងបួងសក់ ដោយមិនទម្លាក់វាវែងអន្តាយនោះឡើយ៕ AFP/HR