ក្រុងប៊ុយដាប៉ែស៖ នាយករដ្ឋមន្ដ្រីហុងគ្រី វីកទ័រ អូរបាន បានប្ដេជ្ញាដាំកូនឈើ ១០ ដើមរៀងរាល់កំណើតក្មេងនីមួយៗ ក្នុងបំណងឆ្លើយតបនឹងការប្រែប្រួលអាកាសធាតុ។
នាយករដ្ឋមន្ដ្រីជាតិនិយមបាននិយាយថា សេចក្ដីប្រកាសនេះ គឺជាផ្នែកមួយនៃ «គម្រោងវិធានការទប់ទល់បម្រែបម្រួល» ដែលរដ្ឋាភិបាលបានអនុម័តកាលពីសប្ដាហ៍មុន។
សេចក្ដីប្រកាសថ្នាក់ជាតិប្រចាំឆ្នាំបានឲ្យដឹងថា៖ «យើងនឹងដាំកូនឈើ ១០ ដើម សម្រាប់ឱកាសកំណើតកូននីមួយៗ ដែលវិធានការនេះនឹងបង្កើនគម្របព្រៃឈើទូទាំងប្រទេសដល់ ២៧ ភាគរយ នៅឆ្នាំ ២០៣០»។
លោកនាយករដ្ឋមន្ដ្រីមិនបានផ្ដល់ព័ត៌មានលម្អិត ជុំវិញវិធានការនេះនៅឡើយទេ។
លោក អូរបាន កាលពីខែមុនបានចាត់ទុកគម្រោងការប្រែប្រួលអាកាសធាតុជា «ទស្សនៈគ្រឹះប្រជាធិបតេយ្យ» ដើម្បីទប់ទល់នឹងបញ្ហាការប្រែប្រួលអាកាសធាតុ។ វាជាអ្វីដែលលោកបានប្រើសម្រាប់គោលនយោបាយរបស់លោក រួមទាំងការប្រឆាំងដាច់អហង្ការចំពោះអន្ដោប្រវេសន៍មកពីបណ្ដាលប្រទេសមូស្លីម។
ទីភ្នាក់ងារថាមពលជាតិ និងគម្រោងទប់ទល់នឹងការប្រែប្រួលអាកាសធាតុបានដាក់គោលដៅជាច្រើន រួមមានការផលិតអគ្គិសនីដោយមិនបំភាយសារធាតុកាបូននៅឆ្នាំ ២០៣០ ដែលភាគច្រើនប្រើថាមពលនុយក្លេអ៊ែរ និងថាមពលសូឡា។
លោកបានឲ្យដឹងថា៖ «យើងធ្លាប់គិតថា អឺរ៉ុបគឺជាអនាគតរបស់យើង។ ពេលនេះ យើងដឹងថាយើងគឺជាអនាគតរបស់អឺរ៉ុបវិញ»។
លោកបានប្រកាសកាត់ពន្ធ និងផ្ដល់ប្រាក់លើកទឹកចិត្ដដល់ក្រុមគ្រួសារទាំងឡាយណាដែលបង្កើតកូនច្រើនបន្ថែមទៀត។ នេះជាវិធានការឆ្លើយតបចំពោះការធ្លាក់ចុះនៃកំណើនប្រជាជនសរុប៕ AFP/HR