.jpg)
ក្រុងឈិនឌូ: ស្នេហាចាប់ផ្ដើមដុះពន្លកនៅថ្ងៃតែមួយនៃវេលាប្រសូតក្នុងមន្ទីរពេទ្យ។ គូស្នេហ៍មួយគូដែលចាប់កំណើតនៅថ្ងៃតែមួយ កាលពី ២៧ ឆ្នាំមុនក្នុងតំបន់ ម៉ែនយ៉ាង ខេត្ដស៊ីឈួន ប្រទេសចិន បានរៀបការជាមួយគ្នា កាលពីថ្ងៃសៅរ៍។
ហ្គោ យូទីង បាននិយាយថា នាងនៅចាំពេលដែល ស៊ូ ជីងជា បានផ្ទេរមកសិក្សានៅសាលារបស់នាង កាលពីខែមិថុនា ឆ្នាំ២០០៤។ ពួកគេទាំងពីរជាមិត្ដភក្ដិនឹងគ្នា និងបានដឹងថា ពួកគេបានប្រសូតនៅថ្ងៃតែមួយ កាលពីថ្ងៃទី ១៦ ខែមិថុនា ឆ្នាំ ១៩៩០។ ពួកគេបានប្រារឰថ្ងៃខួបកំណើតរួមគ្នាពេលរៀននៅវិទ្យាល័យ។
អ្នកទាំងពីរផ្ដើមស្រឡាញ់គ្នាក្នុងឆ្នាំ ២០១៣ ហើយក្រោយមក ក៏បានប្រារឰខួបកំណើតជាមួយគ្នាច្រើនលើកច្រើនសាមកដែរ។
លើសពីនេះ គូស្នេហ៍ទាំងពីរមិនត្រឹមតែចូលរៀនថ្នាក់មតេយ្យជាមួយគ្នា និងរៀនជាមួយគ្រូដូចគ្នាប៉ុណ្ណោះទេ ប៉ុន្ដែពួកគេប្រសូតនៅមន្ទីរពេទ្យ Jiangyou People''s Hospital តែមួយទៀតផង។
ហ្គោ និងស៊ូ ត្រូវបានដាក់ថែទាំនៅមជ្ឈមណ្ឌលថែទាំទារកតែមួយ គ្រាន់តែអង្រឹងខុសគ្នាប៉ុណ្ណោះ។ អ្វីដែល ស៊ូ បានដឹង វាជាស្នេហាកាំរន្ទះ ឃើញភ្លាម ស្រឡាញ់ភ្លែត។
លោក ស៊ូ បានអះអាងថា៖ «ខ្ញុំបានលួចស្រឡាញ់គាត់តាំងពីយូរ តែខ្ញុំអត់ហ៊ានប្រាប់ពីអារម្មណ៍របស់ខ្ញុំទេ។ ព្រហ្មលិខិតបានកំណត់ឲ្យពួកយើងជួបគ្នា»៕ HR
ប្រភព People’s China Daily
