.jpg)
ខេមរៈ ស្រីពៅ ដែលបាត់មុខពីសិល្បៈជាច្រើនឆ្នាំ បង្ហោះសារចង់វិលមកទ្រនំចាស់វិញ។ ហ្វេសប៊ុក
ភ្នំពេញ: ក្រោយបាត់មុខពីឆាកតន្ត្រី ក្រោមឥទ្ធិពលព័ត៌មានរហិចរហៀងថា តារាចម្រៀងស្រីត្រកូល ខេមរៈ សំងំព្យាបាលជំងឺប្រតិកម្មស្បែកធ្ងន់ធ្ងរឯស្រុកកំណើតស្រុកព្រៃឈរ កាលពីដើមឆ្នាំ ២០១៦ រហូតមានដំណឹងក្រោយទៀតថា នាងបានជាសះស្បើយពីជំងឺ ហើយថែមទាំងអាចនិពន្ធបទចម្រៀងឲ្យបងប្រុសច្រៀងទៀតនោះ ពេលនេះកញ្ញា ខេមរៈ ស្រីពៅ ក៏ទើបតែបានប្រកាសជំហរយ៉ាងជឿជាក់ថា នាងនឹងវិលចូលសិល្បៈវិញ។
ក្នុងសំណេរភ្ជាប់រូបថតបង្ហាញស្នាមញញឹម តារាចម្រៀងរាងខ្ពស់ស្រលូន ខេមរៈ ស្រីពៅ បានបរិយាយសារក្នុងបណ្ដាញសង្គមថា៖ «បងប្អូន និង fan (អ្នកគាំទ្រ) ទាំងអស់គ្នា ប្រាកដជានៅរង់ចាំនាងខ្ញុំឲ្យចូលសិល្បៈវិញ»។
តារាចម្រៀង ដែលបន្សាត់ខ្លួនពីសិល្បៈ និង អវត្តមានសូន្យឈឹងពីឆាកតន្ត្រីអស់រយៈពេលមិនតិចជាង ៣ ឆ្នាំមកហើយនោះ នាងបានបង្ហើបប្រាប់មហាជនថា៖ «កុំបារម្ភអីណា នាងខ្ញុំប្រាកដជាចូលសិល្បៈវិញ។ ចង់និយាយថា ស្រឡាញ់អ្នកទាំងអស់គ្នាណាស់។ កុំភ្លេចណា ជួយ like, comment, share បន្តផង ដើម្បីឲ្យបងប្អូនដឹងទាំងអស់គ្នា»។
ទោះជាអះអាងយ៉ាងជឿជាក់ថា នាងនឹងត្រឡប់មកកាន់វិថីសិល្បៈវិញក្ដី ក៏តារាចម្រៀងស្រីត្រកូល ខេមរៈ រូបនេះមិនបង្ហើបឲ្យដឹងពីពេលវេលាជាក់លាក់ ថ្ងៃណា ខែណា ឬឆ្នាំណា ទើបកញ្ញា ខេមរៈ ស្រីពៅ វិលមកបង្ហើរសំនៀងអង្រួនឆាកតន្ត្រីឡើយ។
ខណៈមានប្រិយមិត្តជាច្រើននាំគ្នាជជីកសួរនាងតាមបណ្ដាញសង្គមថា៖ «តើ បងពៅ មកវិញពេលណា?» ទាំងមិនមានចម្លើយចេញពីនាងផ្ទាល់ អ្នកគាំទ្រនាងឯទៀតបានបង្ហាញទឹកចិត្តនៅតែស្រឡាញ់គាំទ្រនាង ដោយខ្លះសរសេរថា៖ «ស្រឡាញ់អាយដល» និងខ្លះទៀតបង្ហាញការជឿជាក់ថា៖ «ខ្ញុំរង់ចាំបង»។
គួររំឭកដែរថា ចាប់តាំងពីដើមឆ្នាំ ២០១៦ តារាចម្រៀង ខេមរៈ ស្រីពៅ ត្រូវបានប្រភពព័ត៌មានទម្លាយពីអ្នកស្រុកព្រៃឈរ ខេត្តកំពង់ចាមថា នាងរសាត់ខ្លួនពីសង្គមសិល្បៈ ដោយសារតែជំងឺប្រតិកម្មស្បែកធ្ងន់ធ្ងរ ទៅព្យាបាលនៅថៃ។
ដំណឹងនេះកន្លងមកត្រូវបានបងប្រុសរបស់នាងលោក ខេមរៈ ភិរុណ និងតារាចម្រៀង ខេមរៈ សិរីមន្ត ច្រានចោលថាជារឿងមិនពិត ដោយអះអាងថា ប្អូនស្រីលោកមានជំងឺក្រពះពោះវៀន មិនមែនមានបញ្ហាប្រតិកម្មស្បែកធ្ងន់ធ្ងរត្រូវសំងំព្យាបាលនោះទេ។
កន្លងមកជាង ១ ឆ្នាំ គឺនៅរដូវបុណ្យចូលឆ្នាំប្រពៃណីខ្មែរ ឆ្នាំ ២០១៧ ទោះជាកញ្ញា ខេមរៈ ស្រីពៅ នៅតែមិនបង្ហាញមុខលើវិថីសិល្បៈក្ដី ក៏មហាជនឃើញឈ្មោះនាងរំលេចស្នាដៃនិពន្ធទំនុកច្រៀងបទ «ស្រុកខ្ញុំគេរាំតែអ៊ីចឹង» ឲ្យលោក ខេមរៈ សិរីមន្ត ជាបងប្រុសច្រៀងផងដែរ។
កាលពីឆ្នាំមុន ខេមរៈ សិរីមន្ត ធ្លាប់ប្រាប់ភ្នំពេញប៉ុស្តិ៍ ពីដំណើរចូលច្រៀងវិញរបស់ប្អូនស្រី តាមការទទូចពីអ្នកគាំទ្រនាងថា៖ «តាមពិតវត្តមានប្អូនស្រីខ្ញុំ ស្រីពៅ មិនទាន់អាចវិលមកបង្ហាញខ្លួន និងបកស្រាយបទចម្រៀងតបតាមសំណូមពរពីមហាជនបានទេ»៕
