ក្រុងម៉ិកស៊ីកូ: ពិតជាឱកាសដ៏កម្រ ដែលអ្នកជ្រមុជទឹកម្នាក់ និងភ្ញៀវទេសចរក្នុងទូកកម្សាន្ដមួយមានការភ្ញាក់ផ្អើលយ៉ាងខ្លាំងពេលបានឃើញត្រីបាឡែនប្រផេះប្រវែង ១៣,៧១ ម៉ែត្រ និងកូនៗហែលយ៉ាងជិតបង្កើយនៅប្រទេសម៉ិកស៊ិក។
ជំនួបដ៏រំជួលចិត្ដចៃដន្យនេះ ត្រូវបានផ្ដិតយករូបភាពដោយអ្នកជ្រមុជទឹកឈ្មោះ អេនទ្រា អ៊ីហ្ស៊ូតទី អាយុ ៤៩ ឆ្នាំ ដែលបាននិយាយថា លោកគិតថា ស្បែកបាឡែននេះច្បាស់ជារឹងដូចសម្បកលៀសហើយមើលទៅ តែពេលបានយកដៃស្ទាបកាន់ផ្ទាល់ វាពិតជាទន់ល្មើយមិនគួរឲ្យជឿសោះ។
អ្នកស្រឡាញ់ធម្មជាតិ មកពីក្រុងហ្គេណាវ ប្រទេសអ៊ីតាលី បានថតរូបនូវទស្សនីយភាពដ៏កម្រនេះពីសប្ដាហ៍មុនដោយប្រើកាមេរ៉ា GoPro។ មេធាវីរូបនេះ បានបន្ដថា៖ «វាហាក់បីដូចជា វាបានបណ្ដែតខ្លួនលើទឹកដើម្បីមកនិយាយពាក្យ សួស្ដី ជាមួយយើងទាំងអស់គ្នា»។
បាឡែនហែលសំកាំងលើផ្ទៃទឹកប្រមាណ ១០ វិនាទី ខណៈទេសចរឆ្លៀតអង្អែលវាថ្មម។
លោក អេនទ្រា បានបន្ដថា៖ «មេបាឡែមួយក្បាលនេះ ពេលកូនរបស់វាហែលពីខាងក្រោមពោះវា មេបាឡែនវាបណ្ដោយខ្លួនឲ្យភ្ញៀវស្ទាបអង្អែលក្បាលបានមួយភ្លែតដែរ»។
ចំនួនបាឡែនប្រផេះក្នុងដែនសមុទ្រប៉ាស៊ីហ្វិក ត្រូវបានចាត់ចូលជាពូជសត្វកម្រដោយសហភាពអន្ដរជាតិដើម្បីអភិរក្សធម្មជាតិ៕
HR