.jpg)
ចុងភៅដែលមិនបានរៀនជំនាញចម្អិនពីសាលាមិនមាននរណាម្នាក់ផ្ដល់ចំណាយថ្នាក់ផ្កាយឱ្យ។ AFP
ក្រុងបាងកក : ក្រោយពីរូបភាពបុរសក្រុងបាងកកម្នាក់ដែលមានភរិយាដ៏ស្រស់ស្អាតពីរនាក់ ទទួលការចាប់អារម្មណ៍ខ្លាំងក្នុងបណ្ដាញសង្គមរយៈពេលជាងពីរសប្ដាហ៍មកនេះ អ្នកទាំង ៣ និងកូនទាំង ៩ នាក់របស់ពួកគេ ចាំតែឆ្លើយនឹងសំណួរសុំចែករំលែករូបមន្ដសម្ងាត់ពីវិធីរួមរស់ក្នុងទ្រនំអាពាហ៍ពិពាហ៍ត្រីកោណដ៏សុខសាន្ដបែបនេះ។
វាចាប់ផ្ដើមពេលដែលភរិយាទីពីរ ឈ្មោះ វ៉ារីសសារ៉ា ផូកស្រ៊ីចាន់ អាយុ ៣២ ឆ្នាំ បានបង្ហោះរូបភាពពួកគេទាំង ៣ នាក់កាលពីទិវានៃក្ដីស្រឡាញ់ ដែលទទួលបានការចែករំលែកបន្ដជាង ៦០០០ ដងថា៖ «មនុស្សម្នានាំគ្នាកោតស្ញប់ស្ញែងចំពោះស្វាមីយើងលើហ្វេសប៊ុកយ៉ាងច្រើន។ ចាស! ស្វាមីខ្ញុំប្រាកដជាមានភរិយាពីរនាក់មែន»។
អ្នកស្រី បាននិយាយលេងសើចពីដើមទ្រូងធំមូលក្លំរបស់ខ្លួន និងភរិយាម្នាក់ទៀតថា៖ «វាមានរយៈពេលយូរឆ្នាំហើយ ហើយខ្ញុំមិនដែលផ្លាស់ប្ដូរចិត្ដស្រឡាញ់ចំពោះបងឡើយ។ អ្វីដែលបានផ្លាស់ប្ដូរនោះគឺទំហំដើមទ្រូង ៦០០ សេសេ និង ៤៥០ សេសេ។ បងចូលចិត្ដវាណាស់»។
បុរសជាស្វាមី ម៉ាណុប នុតថាយូធីន អាយុ ៤២ ឆ្នាំ បានប្រាប់បណ្ដាញផ្សព្វផ្សាយថា តាមពិតលោកមានភរិយា ៣ នាក់ តែភរិយាដើមឈ្មោះ «ឌៀរ» បានស្លាប់ក្រោយពីពួកគេមានតំណក់ឈាមកូន ៣ នាក់។ លោកបានរួមរស់ជាមួយភរិយាទីពីរឈ្មោះ វ៉ារីសសារ៉ា ផូកស្រ៊ីចាន់ នេះ រយៈពេលជាង ១០ ឆ្នាំ ហើយក្រោយមក បានរៀបការភរិយាម្នាក់ទៀតឈ្មោះ ណាត់តាយ៉ា តុងផាន អាយុ ២៦ ឆ្នាំ។ លោកមានកូន ៣ នាក់ជាមួយភរិយានីមួយៗ។
ភរិយាទាំងពីរបានជួយកិច្ចការរកស៊ីស្វាមី ជាការលក់គ្រឿងបន្លាសរថយន្ដនៅព្រឹត្ដិការណ៍ប្រណាំងរថយន្ដធំៗក្នុងប្រទេសថៃ។ លោក ម៉ាណុប បាននិយាយថា លោកបានផ្ដល់ប្រាក់ខែឲ្យភរិយាទាំងពីរ តែមិនប្រាប់អំពីចំនួនទឹកប្រាក់នោះឡើយ។
ប៉ុន្ដែអ្នកស្រី ណាត់តាយ៉ា បាននិយាយថា៖ «វាមិនមែនដោយសារតែលុយទេ។ គាត់ភាគច្រើនផ្ដោតលើការទំនុបបម្រុងកូនៗ»។
អ្នកស្រី វ៉ារីសសារ៉ា បានឯកភាពថា៖ «វាពិតជាត្រឹមត្រូវ។ សម្រាប់កូនៗ គាត់បានផ្ដល់ជូន ១០០ ភាគរយ។ សម្រាប់ភរិយា បើយើងស្នើសុំ ១០០០ បាត គាត់គ្រាន់តែឲ្យ ២០០ បាតប៉ុណ្ណោះ»។
ចំពោះលោក ម៉ាណុប លោកបានសារភាពថា លោកពិតជាបុរសសំណាងដែលមានភរិយាដល់ ៣ នាក់ ហើយរូបមន្ដសម្ងាត់ចំពោះសុភមង្គលនេះ លោកត្រូវដោះស្រាយរាល់ជម្លោះភ្លាមៗ កុំឲ្យវាឆេះខ្លាំង។
លោកនិយាយថា៖ «ពេលកើតមានបញ្ហា ខ្ញុំជជែកជាមួយពួកគាត់អំពីវាភ្លាមៗនៅថ្ងៃកើតបញ្ហាតែម្ដង»៕ HR/ប្រភព Coconut Bangkok
