.jpg)
ភ្ញៀវទេសចរនាំគ្នាឈរថតរូបអនុស្សាវរីយ៍នៅប៉មផ្អៀង។ រូបថត AFP
ក្រុងរ៉ូម : ប៉មផ្អៀង ពីសា (Leaning Tower of Pisa) ពេលនេះកាន់តែមានលំនឹងរាងត្រង់បន្ដិច ដែលអរគុណដល់ក្រុមវិស្វករខិតខំសង្គ្រោះទីឋានទេសចរណ៍ល្បីល្បាញក្នុងលោកមួយនេះ។ នេះបើយោងតាមក្រុមអ្នកជំនាញបានឲ្យដឹងកាលពីថ្ងៃពុធ។
Surveillance Group ដែលមានភារកិច្ចជួសជុលអគារទ្រេតនេះបានឲ្យដឹងក្នុងសេចក្ដីថ្លែងការណ៍ថា ក្រោយពីការជួសជុលរយៈពេល ១៧ ឆ្នាំ ប៉មផ្អៀងពីសា កាន់តែមានលំនឹង និងងើបត្រង់ជាងមុន។
បណ្ដាញផ្សព្វផ្សាយអ៊ីតាលី បានបង្ហាញថាសាស្ដ្រាចារ្យវិស្វករ Nunziante Squeglia មកពីសាកលវិទ្យាល័យពីសាបាននិយាយថា វិមានកម្ពស់ ៥៧ ម៉ែត្រត្រូវបានកែសម្រួលឲ្យឈរត្រង់ជាងមុន ៤០ សង់ទីម៉ែត្រ។
ក្រុមការងារ Surveillance Group ត្រូវបានបង្កើតឡើងក្រោយពីវិស្វករជនជាតិប៉ូឡូញ Michele Jamiolkowski ដែលបានកាន់អត្ដសញ្ញាណប័ណ្ណអ៊ីតាលីបានបង្កើតគណៈកម្មការអន្ដរជាតិមួយដើម្បីសង្គ្រោះអគារបុរាណចន្លោះឆ្នាំ ១៩៩៣ ដល់ឆ្នាំ ២០០១។
ជាសំណង់ខ្ពស់រាងទ្រេតដែលភ្ញៀវទេសចរនិយមថតរូបយកដៃទ្រនោះ ប៉ម ពីសា ដ៏ល្បីល្បាញនេះត្រូវបានបិទទ្វារក្នុងខែមករា ឆ្នាំ ១៩៩០ រយៈពេល ១១ ឆ្នាំដោយបញ្ហាសុវត្ថិភាព ខណៈវាបានទ្រេតផ្អៀង ៤,៥ ម៉ែត្រ។ ក្រោយមកនេះវាត្រូវបានកែតម្រង់បានជាង ៤ តឹកហើយ។
ប៉មទ្រេត ដែលជានិម្មិតរូបអំណាចរបស់សាធារណរដ្ឋដែនសមុទ្រពីសា ក្នុងសម័យយុគកណ្ដាលបានផ្អៀងទ្រេតទៅម្ខាងតាំងពីកសាងក្នុងឆ្នាំ ១១៧៣៕ HR
