.jpg)
ផ្កាគំរង់ខ្មោចអង្កត់ផ្ចិត ១១១ សង់ទីម៉ែត្រ មានទំហំធំជាងផ្កាមុនៗ។ រូបថត AFP
ក្រុងហ្សាការតា៖ ក្រុមអ្នកអភិរក្សឥណ្ឌូនេស៊ីបាននិយាយថា ពួកគេបានប្រទះឃើញពូជរុក្ខជាតិដែលធ្លាប់ត្រូវបានចាត់ទុកជាផ្កាធំបំផុតក្នុងលោកមួយប្រភេទ។
ផ្កាយក្ស Rafflesia tuan-mudae ពណ៌ក្រហម អុចកន្ទួលពណ៌ស លើស្រទាប់ផ្កា មានអង្កត់ផ្ចិតប្រមាណ ១១១ សង់ទីម៉ែត្រ។
វាមានទំហំធំជាងផ្កាជាប់កំណត់ត្រាចាស់ទំហំ ១០៧ សង់ទីម៉ែត្រ ពេលរីកស្គុសស្គាយ ដែលប្រទះឃើញនៅព្រៃកោះស៊ូម៉ាត្រាខាងលិចកាលពីច្រើនឆ្នាំមុនផងដែរ។
លោក Ade Putra នៅទីភ្នាក់ងារអភិរក្ស អាហ្គ្រាម នៅកោះស៊ូម៉ាត្រា បាននិយាយថា៖ «នេះ គឺជាផ្កា Rafflesia tuan-mudae ធំបំផុតដែលធ្លាប់ចងក្រងមក»។
លោកបានបន្ថែមថា ផ្កានេះ រីកមានរយៈពេលតែប៉ុន្មានសប្ដាហ៍ មុនពេលវាស្រពោន និងរលួយ។
វាត្រូវបានដាក់ឈ្មោះ Rafflesia តាមអ្នកអាណានិគមនិយមចក្រភពអង់គ្លេសឈ្មោះ Sir Stamford Raffles ដែលបានប្រទះឃើញបុប្ផាចម្លែកនេះនៅឥណ្ឌូនេស៊ីកាលពីដើមសតវត្សរ៍ទី ១៩។
ពូជផ្កានេះបានដុះនៅតាមបណ្ដាប្រទេសនានាក្នុងតំបន់អាស៊ីអាគ្នេយ៍ រួមទាំងហ្វីលីពីន ដែលត្រូវបានប្រទះឃើញចេញផ្កាយក្សទំហំ ១០០ សង់ទីម៉ែត្រ។
ផ្កាយក្សមានទំហំធំដល់ជាង ១ ម៉ែត្រ ដែលជាអម្បូរផ្កាប៉ារ៉ាស៊ីត ដែលជួនកាលគេហៅថា ផ្កាគំរង់ខ្មោច ដោយវាជះក្លិនដូចសាច់ស្អុយ ដើម្បីទាក់ទាញសត្វល្អិត។
ក្រៅពីផ្កាយក្សដែលរីកមានទំហំជាង ១ ម៉ែត្រនោះ ក៏មានផ្កាពពួកប៉ារ៉ាស៊ីត ដែលបំភាយក្លិនពុល គឺជាផ្កា Amorphophallus titanium នៅឥណ្ឌូនេស៊ី ក្រោមការលូតលាស់សណ្ឋានដូចលិង្គ និងអាចមានកម្ពស់ប្រវែង ៣ ម៉ែត្រ៕ AFP/HR
