ភ្នំពេញ៖ កម្រងរូបថតជាច្រើនសន្លឹកដែលរៀបរាប់អំពីកិច្ចការអភិរក្សបរិស្ថានរបស់ឆ្មាំព្រៃក្នុងខេត្ដកោះកុង នឹងត្រូវបានដាក់តាំងបង្ហាញនៅថ្ងៃទី ៧ ខែធ្នូ នេះ នៅ 5DrunkMen ជាន់ដំបូលក្នុងទីក្រុងភ្នំពេញ។ រូបថតទាំងអស់ក៏ត្រូវដាក់លក់សម្រាប់ទ្រទ្រង់គម្រោងរបស់ឆ្មាំអនុរក្សផងដែរ។
ឆ្មាំអនុរក្សព្រៃឈើ ដែលប្រយុទ្ធប្រឆាំងនឹងការបរបាញ់សត្វព្រៃ និងកាប់ឈើខុសច្បាប់ក្នុងខេត្ដកោះកុង គឺជាប្រធានបទរបស់ជាងថតរូបព័រទុយហ្គាល់ ដែលមានមូលដ្ឋានក្នុងក្រុងភ្នំពេញ លោក មីហ្គែល ជេរ៉ូនីម៉ូ ក្នុងពិព័រណ៍រូបថតក្រោមចំណងជើងថា «ព្រៃឈើក្នុងដួងចិត្ដខ្ញុំ»។
លោក ជេរ៉ូនីម៉ូ បាននិយាយថា៖ «យើងនឹងមានរូបថតសរុប ២៤ ផ្ទាំង ហើយរូបទាំងអស់ក៏សម្រាប់ដាក់លក់ ដើម្បីប្រើប្រាស់ក្នុងគម្រោងរបស់អនុរក្ស។ រូបថតទាំងនេះផ្ដោតលើឆ្មាំអនុរក្សជាមួយបំណែកកញ្ចក់ឆ្លុះរុក្ខជាតិ និងរូបភាពធម្មជាតិដ៏ស្រស់ត្រកាល ដែលសម្ភារប្រើប្រាស់ទាំងអស់សុទ្ធតែប្រមូលដោយឆ្មាំអនុរក្សខ្លួនឯង ដូចជា សំណាញ់សម្រាប់ចាប់បក្សី ឬអន្ទាក់ទាក់សត្វព្រៃខុសច្បាប់»។
ជាងថតរូបដែលធ្លាប់តាំងពិព័រណ៍ Plastic Kingdom បានប្រាប់ ភ្នំពេញ ប៉ុស្ដិ៍ ថា៖ «យើងក៏មានរូបភាពបញ្ចាំងលើអេក្រង់បង្ហាញពីដំណើរល្បាតព្រៃ ការលែងសត្វព្រៃនៅភូមិក្បែរខាង ព្រមទាំងវីដេអូឃ្លីបផ្សេងៗទៀត»។
លោក ជេរ៉ូនីម៉ូ ចំណាយពេលជាងមួយឆ្នាំទាក់ទងជាមួយអង្គការ Wildlife Alliance និងបង្កើតគំនិតប្រើប្រាស់កញ្ចក់ជាវិធីបង្ហាញក្ដីយកចិត្ដទុកដាក់ថ្មីឆ្លុះបញ្ចាំងពីកិច្ចការរបស់អតីតអ្នកប្រមាញ់សត្វទៅជាឆ្មាំអភិរក្ស ដើម្បីការពារធម្មជាតិ។
លោកនិយាយថា៖ «ខ្ញុំបានចំណាយពេលចុងសប្ដាហ៍ក្នុងខេត្ដកោះកុង ទាំងក្នុងភូមិជីផាត់ ជាទីដែលអង្គការ និងឆ្មាំអភិរក្សស្ថិតនៅ តែក៏ធ្វើដំណើរជាមួយពួកគេក្នុងកិច្ចការល្បាតព្រៃផងដែរ»។
លោកបន្ដថា ពួកគេធ្លាប់ជាអ្នកប្រមាញ់សត្វព្រៃ ដែលជាធនធានចំណូលសំខាន់មួយ តែក្លាយជាឆ្មាំអនុរក្ស ពេលមកដល់របស់អង្គការ Wildlife Alliance ដែលបានបណ្ដុះបណ្ដាលពួកគេ និងផ្ដល់ជាជម្រើសក្នុងការរកចំណូលជាបុគ្គលិកអភិរក្សធម្មជាតិ។
លោកបានបន្តថា៖ «កិច្ចការអភិរក្សរបស់ពួកគេពិតជាលំបាក។ ឆ្មាំអនុរក្សបន្ដល្បាតព្រៃ ៥ ថ្ងៃ ហើយពួកគេទទួលទាន និងគេងក្នុងព្រៃ ដោយការដើរល្បាតរយៈពេលជាច្រើនម៉ោង ដើម្បីស្វែងរកអន្ទាក់។ ស្ថានភាពអាកាសធាតុអាចប៉ះពាល់ដល់កិច្ចការរបស់ពួកគេ ជាពិសេស ភ្លៀង និងខ្យល់អំឡុងរដូវរំហើយនេះ ឬជាក់ស្ដែង ជួនកាលពួកគេក៏ពើបប្រទះនឹងក្រុមប្រមាញ់សត្វព្រៃខុសច្បាប់ដែលកាន់អាវុធផងដែរ»។
លោកលើកឡើងថា អង្គការបានបណ្ដុះបណ្ដាលអ្នកភូមិជីផាត់ពីជំនាញនាំភ្ញៀវដើរព្រៃ បង្កើតផ្ទះស្នាក់ និងសកម្មភាពអេកូទេសចរណ៍ផ្សេងៗជាប្រយោជន៍បង្កើនសេដ្ឋកិច្ចគ្រួសារ និងចៀសវាងការវិលត្រឡប់ទៅកាន់សកម្មភាពចាស់ឡើងវិញ។
អំឡុងពេលធ្វើដំណើរនោះ លោក ជេរ៉ូនីម៉ូ បានជជែកអំពីកិច្ចការអភិរក្សរបស់ឆ្មាំអនុរក្ស និងបានសម្ភាសពួកគេនៅមុន និងក្លាយជាអ្នកអភិរក្សសត្វព្រៃ និងព្រៃឈើ។
លោកបានប្រាប់ ភ្នំពេញ ប៉ុស្ដិ៍ ដោយបានស្រង់សម្ដីឆ្មាំអនុរក្សថា៖ «ខ្ញុំចូលចិត្ដការងារនេះ និងពេញចិត្ដកិច្ចការល្បាតព្រៃការពារសត្វ និងធម្មជាតិឲ្យក្មេងជំនាន់ក្រោយបានឃើញ។ វាមានសារៈសំខាន់ដែលយើងត្រូវការពារព្រៃឈើ ពីព្រោះយើងស្ថិតក្នុងតំបន់អភិរក្សព្រៃ។ ធម្មជាតិបានផ្ដល់ឲ្យយើងនូវទឹក និងខ្យល់បរិសុទ្ធ ក៏ដូចជាការពារយើងពីបម្រែបម្រួលអាកាសធាតុផងដែរ»។
ទន្ទឹមនឹងនេះ លោកក៏រំពឹងថា អ្នកចូលរួមទស្សនាពិព័រណ៍នេះត្រូវបានលើកទឹកចិត្ដតាមរយៈកិច្ចការពារបរិស្ថានរបស់ក្រុមឆ្មាំអនុរក្ស ដែលផ្លាស់ប្ដូរផ្នត់គំនិតពីអ្នកប្រមាញ់ទៅជាអ្នកអភិរក្ស។
លោកអះអាងថា៖ «នោះជាមូលហេតុដែលខ្ញុំប្រើវិធីសាស្ដ្រផ្ដិតយករូបភាពឆ្មាំអនុរក្សកាន់កញ្ចក់បែកឆ្លុះសេចក្ដីស្រឡាញ់ថ្មីចំពោះព្រៃឈើ»។
ក្រៅពីពិព័រណ៍រូបថត នឹងមានពិធីជប់លៀងជាមួយក្រុមឌីជេ លេងបទចម្រៀងទាន់សម័យ ដែលពួកគេបានចំណាយពេលចូលរួមយ៉ាងច្រើនកុះករផងដែរ។
លោក ជេរ៉ូនីម៉ូ បាននិយាយថា ក្រុមហ៊ុនជាច្រើនបានផ្ដល់រង្វាន់ដែលប្រើប្រាស់សម្រាប់អ្នកទិញសំបុត្រ ដោយប្រាក់ចំណូលទាំងអស់នឹងទ្រទ្រង់ដល់គម្រោងសហគមន៍ឆ្មាំអនុរក្សហៅថា CAPU។
លោកបានបញ្ជាក់ថា៖ «ខ្ញុំបានធ្វើកិច្ចការជាច្រើនជាមួយ edjais ក្រុមរើសសំរាមក្រៅផ្លូវការ ដែលដើររើសអេតចាយតាមដងផ្លូវបំណងលក់រកប្រាក់កម្រៃ។ ខ្ញុំក៏នឹងរៀបចំពិព័រណ៍មួយក្នុងខែមករាខាងមុខ អំពីបញ្ហាបរិស្ថានដ៏មានសារៈសំខាន់»។
ព័ត៌មានលម្អិត មាននៅទំព័រអ៊ីនស្ដាក្រាមរបស់លោក មីហ្គែល ជេរ៉ូនីម៉ូ migueljeronimophotography ឬទាក់ទងតាមលេខទូរស័ព្ទ ០១០ ២៩៨ ០៩១៕