ភ្នំពេញៈ បណ្តុំស្នាដៃពិព័រណ៍ទោលរបស់វិចិត្រករ ស្រ៊ុន រីដា ក្រោមប្រធានបទ«ឥទ្ធិពល» ដែលឆ្លុះបញ្ចាំងពីជីវិតរស់នៅប្រចាំថ្ងៃនៅក្នុងប្រទេសកម្ពុជា នឹងដាក់តាំងបន្តរហូតដល់ថ្ងៃទី ១១ ខែកញ្ញា ឆ្នាំ ២០១៩ ឯណោះ ក្រោយពីបានបើកសម្ពោធកាលពីថ្ងៃទី ១១ ខែកក្កដា ឆ្នាំ ២០១៩ កន្លងមកនៅវិចិត្រសាល ស-ស។ ដោយឡែកការតាំងពិព័រណ៍នេះត្រូវបានរៀបចំឡើងដោយអ្នករៀបចំពិព័រណ៍ឯករាជ្យ ម៉ឹង មេត្តា និងឧបត្ថម្ភគាំទ្រពីមូលនិធិ Rei Foundation។
បើតាមការឲ្យដឹងពេលសម្ពោធពី ម៉ឹង មេត្តា ជាអ្នករៀបចំពិព័រណ៍ឯករាជ្យដែលរស់នៅ និងធ្វើការនៅទីក្រុងភ្នំពេញឲ្យដឹងពីអត្ថន័យនៃប្រធានបទថា៖ «ការងារសិល្បៈរបស់ ស្រ៊ុន រីដា ជាដំណើរការនៃការចងចាំ និងចងក្រងឯកសារអំពីបច្ចុប្បន្ន និងបន្តទៅថ្ងៃអនាគត។ សម្រាប់ស្នាដៃថ្មីរបស់គាត់នៅក្នុងពិព័រណ៍នេះដែលមានចំណងជើងថា «ឥទ្ធិពល» នៅឆ្នាំ ២០១៩ នេះគាត់បានបន្តមូលដ្ឋានការងាររបស់គាត់ ដោយសង្កេតមើលជីវិតរស់នៅប្រចាំថ្ងៃនៅក្នុងប្រទេសកម្ពុជា។ គាត់ចាប់អារម្មណ៍ទៅលើវត្ថុដែលគាត់បានឃើញ និងមនុស្សដែលកំពុងប្រើប្រាស់សម្ភារទាំងនោះនៅក្នុងជីវិតប្រចាំថ្ងៃ ហើយប្រធានបទ «ឥទ្ធិពល» គឺជាសំណួរវែកញែករបស់សិល្បករចំពោះការអភិវឌ្ឍនានានៅទីក្រុងដែលមានឥទិ្ធពលចំពោះសេដ្ឋកិច្ច និងវប្បធម៌ ហើយគាត់ក៏ចង់បង្ហាញរូបភាពជាគំនូរ ចម្រុះពណ៌ និងគំនូរលើក្រដាសផ្តិតបន្ទះឈើ»។
គួរបញ្ជាក់ដែរថា វិចិត្រករ ស្រ៊ុន រីដា កើតឆ្នាំ ១៩៩២ នៅខេត្តព្រៃវែងប្រទេសកម្ពុជាបានបញ្ចប់ការសិក្សាពីសាកលវិទ្យាល័យភូមិន្ទវិចិត្រសិល្បៈនៅក្នុងឆ្នាំ ២០១៧ និងបានសិក្សានៅរោងជាង ចារ ដើម្បីអភិវឌ្ឍការងារសិល្បៈផ្តិតរូប។ គាត់បានទៅសិក្សារយៈពេលចំនួនមួយឆមាសផ្នែក Arts Plastique នៅឯសាកលវិទ្យាល័យ University Paris 8 ក្នុងប្រទេសបារាំងកាលពីឆ្នាំ ២០១៨។
ការបើកពិព័រណ៍ទោលដំបូងរបស់លោកមានចំណងជើងថា «រំលឹក» បានដាក់បង្ហាញនៅ Java Creative Cafe ឆ្នាំ ២០១៧ ហើយលោកបានចូលរួមពិព័រណ៍ជាក្រុមជាច្រើនរួមមានជាមួយសិល្បករវ័យក្មេងលើកទី ១០ នៅមណ្ឌលពិព័រណ៍ Andaman Cultural Study Center ខេត្តក្រាប៊ី ប្រទេសថៃ ឆ្នាំ ២០១៩ ថ្មីៗកន្លងមក ខណៈការតាំងពិព័រណ៍ប្រធានបទថា «Landscape After War» នៅមជ្ឈមណ្ឌលបុប្ផាណា ភ្នំពេញឆ្នាំ ២០១៩ និងប្រធានធ្លាប់តាំងនៅឯ Faux Mouvement-Centre d''Art contemporain ទីក្រុង Mezt ប្រទេសបារាំងឆ្នាំ ២០១៨។
លោកក៏ដាក់តាំងពិព័រណ៍រូបថតជាក្រុមនៅវិទ្យាស្ថានបារាំងកាលពីឆ្នាំ ២០១៧ ក្រោមប្រធានបទថា «តំបន់ជ្រោយចង្វារ ២ បរិបទកំពុងបាត់បង់» នៅឯវិចិត្រសាល Bellevue Serviced Apartments ពិព័រណ៍ឈ្មោះថា «Woodblock Prints» នៅផ្ទះមេត្តាឆ្នាំ ២០១៦ និងប្រធានបទ «ជីវិតប្រចាំថ្ងៃ» នៅវិចិត្រសាល Artillery Cafe ឆ្នាំ ២០១៥។
រីឯអ្នករៀបចំពិព័រណ៍ ម៉ឹង មេត្តា គឺជាអ្នករៀបចំពិព័រណ៍ឯករាជ្យដែលរស់នៅនិងធ្វើការនៅទីក្រុងភ្នំពេញ ប្រទេសកម្ពុជាដោយលោកគឺជាស្ថាបនិកវិចិត្រសាល «កន្លែងខ្ញុំ» និង «ដំបូល» ដែលជាស្ថាប័នសិល្បៈឯករាជ្យ និងជាផ្ទះដែលមានផ្ទុកធនធានសិល្បៈ។ លោកបានរៀបចំពិព័រណ៍មួយចំនួននៅវិចិត្រសាល Treeline ដូចជាពិព័រណ៍ឈ្មោះ «ឆ្ពោះទៅមុខ» ឆ្នាំ ២០១៩ ពិព័រណ៍ «រៀនពីអតីតកាល ឬ គម្រោង វណ្ណ មូលីវណ្ណ» ឆ្នាំ ២០១៩ និងពិព័រណ៍ «ទីប្រសព្វ» ឆ្នាំ ២០១៩ ជាដើម៕