ក្រុងតេអេរ៉ង់: ពិព័រណ៍គំនូរជីវចលមួយបើកសម្ពោធនៅក្រុងតេអេរ៉ង់ រំលេចនូវព្រះឆាយាល័ក្ខណ៍ព្រះមហាក្សត្រីអង់គ្លេស អេលីហ្សាបេតទី ២ ជាចោរសមុទ្រ កាន់ដាវខ្លី និងដៃដែក ក្រោយពីរឹបអូសនាវាដឹកប្រេងអ៊ីរ៉ង់។
ទំនាក់ទំនងការទូតដ៏ជូរចត់រវាងក្រុងតេអេរ៉ង់ និងក្រុងឡុងដ៍ កាន់តែដុនដាបតាំងពីនាវា British Royal Marines ចូលរួមក្នុងការរឹបអូសយកនាវាដឹកប្រេងអ៊ីរ៉ង់ «Grace 1» នៅលើដែនសមុទ្រ Gibraltar នៃចក្រភពអង់គ្លេសកាលពីថ្ងៃទី ៤ ខែកក្កដា។
ជាការឆ្លើយតបភ្លាមៗ កងឆ្មាំបដិវត្ដន៍អ៊ិស្លាមរបស់អ៊ីរ៉ង់បានរឹបអូសនាវាដោតទង់ជាតិចក្រភពអង់គ្លេសមួយគ្រឿងក្នុងឆក Hormuz នៅថ្ងៃទី ១៩ ខែកក្កដា ជាអ្វីដែលក្រុងឡុងដ៍បានហៅថា «ទង្វើសងសឹក»។
តុក្តតា ៤០ ផ្ទាំងត្រូវបានដាក់តាំងបង្ហាញក្នុងពិព័រណ៍ «ម្ចាស់ក្សត្រីចោរសមុទ្រ» នៅសាលវិចិត្រ Osveh Art និងមជ្ឈមណ្ឌលវប្បធម៌ក្នុងក្រុងតេអេរ៉ង់ ដើម្បីបង្ហាញអំពីការរឹបអូសនាវា «Grace 1» ដែលមេដឹកនាំកំពូលអ៊ីរ៉ង់ Ayatollah Ali Khamenei ចោទជាចោរសមុទ្រអង់គ្លេស។
តុក្តតាមួយបង្ហាញរូបភាពព្រះម្ចាស់ក្សត្រីគ្រងឈុតជាចោរសមុទ្រ មានមួករំលេចរូបឆ្អឹងខ្មោច និងដៃដែក សត្វសេកមួយក្បាលលើស្មា។
បណ្ណារក្ស Masoud Shojaei-Tabatabayi និយាយថា៖ «គោលបំណងចម្បងរបស់យើងនៃការរៀបចំពិព័រណ៍នេះគឺជាប្រតិកម្មចំពោះទង្វើចោរកម្មដ៏ឥតអៀនខ្មាសនេះ ដែលវាពិតជាខុសច្បាប់ទាំងស្រុង»។
ចំណងការទូតរវាងប្រទេសទាំង ២ ធ្លាក់ខ្លាំងដោយក្រុងឡុងដ៍កាលពីឆ្នាំ ២០១១ ក្រោយពីនិស្សិតតវ៉ានៅមុខស្ថានទូកក្រុងតេអេរ៉ង់។ ពួកគេផ្សះផ្សាវិញក្នុងឆ្នាំ ២០១៤៕ HR