.jpg)
សារដែលតារាសម្ដែង ពេជ្រ ចរណៃ ប្រកាសមិនទទួលថតផ្សាយគ្រឿងស្រវឹង។ រូបថត ហ្វេសប៊ុក
ភ្នំពេញ៖ តារាសម្តែងស្រីល្បីអាចសម្តែងបានគ្រប់ទម្រង់ និងចេះក្បាច់គុនល្បុក្កតោកញ្ញា ពេជ្រ ចរណៃ បានធ្វើឲ្យអ្នកប្រើប្រាស់បណ្តាញសង្គមស្ងើចសរសើរ បន្ទាប់ពីតារាស្រីរូបនេះ ប្រកាសមិនថតផ្សព្វផ្សាយជាតិស្រវឹងជាសាធារណៈនៅក្នុងបណ្តាញសង្គម។
អ្នកសិល្បៈវ័យក្មេងទទួលបានការកោតសរសើរថា ជាតារារលកក្រោយ ប៉ុន្តែខ្វល់ខ្វាយច្រើនពីសិល្បៈវប្បធម៌ខ្មែរជំនាន់មុន ពេជ្រ ចរណៃ បានបង្ហោះសារនៅក្នុងបណ្តាញសង្គមថា៖ «សូមប្រកាសថា: នាងខ្ញុំមិនទទួលថត ឬផ្សព្វផ្សាយគ្រឿងស្រវឹងទេ»។
តារាសម្តែងស្រី និងជាពិធីការិនីរូបស្រស់វ័យ ២៥ ឆ្នាំរូបនេះ បានប្រាប់មក ភ្នំពេញ ប៉ុស្តិ៍ ទាក់ទងនឹងការប្រកាសមិនទទួលផ្សព្វផ្សាយជាតិស្រវឹងថា៖ «តាមពិតទៅតាំងពីដើមមកម្ល៉េះ នាងខ្ញុំមិនដែលទទួលថតផ្សព្វផ្សាយគ្រឿងស្រវឹងនោះទេ ប៉ុន្តែកន្លងមកខ្ញុំបានត្រឹមតែបដិសេធលក្ខណៈមិនបើកចំហ ដោយសារនៅតែមានការទាក់ទងមកឲ្យខ្ញុំផ្សព្វផ្សាយបែបនេះទៀត ទើបខ្ញុំសម្រេចចិត្តប្រកាសជាសាធារណៈដូច្នេះតែម្តងទៅ»។
គួរបញ្ជាក់ដែរថា បន្ទាប់ពីបានជាសះស្បើយពីជំងឺបេះដូង គេសង្កេតឃើញថា តារាសម្តែងស្រីរូបនេះ តែងតែចូលរួមក្នុងកិច្ចការសង្គម ស្វែងរកជំនួយ ដើម្បីឧបត្ថម្ភដល់ជនក្រីក្រ ថែមទាំងមានការផ្សព្វផ្សាយពីវប្បធម៌ខ្មែរ ដែលជិតបាត់បង់ផងដែរ។
កញ្ញា ពេជ្រ ចរណៃ ក៏បានបញ្ជាក់ប្រាប់ពីមូលហេតុដែលធ្វើឲ្យនាងមិនទទួលការថតផ្សព្វផ្សាយជាតិស្រវឹងយ៉ាងដូច្នេះថា៖ «គោលបំណងខ្ញុំគឺមិនចង់ផ្សព្វផ្សាយដល់យុវជន ឬក្មេងៗណា ដែលគាត់បានលេងប្រព័ន្ធអ៊ីនធឺណិតអីផ្សេងៗ នៅពេលដែលគាត់ឃើញថា ខ្ញុំជាយុវជនម្នាក់ដែលជា អាយដល របស់គាត់ ហើយបែរមកថតផ្សព្វផ្សាយគ្រឿងស្រវឹង ហាក់ដូចជាខ្ញុំកំពុងណែនាំឲ្យពួកគាត់ទទួលផឹកគ្រឿងស្រវឹងអ៊ីចឹង វាជាអារម្មណ៍មួយដែលខ្ញុំបានគិត ហើយទោះបីជាបានលុយច្រើនប៉ុនណាក៏ខ្ញុំមិនថតដែរ។ មិនមានន័យថាហាមឃាត់មិនឲ្យមានអ្នកញ៉ាំទេ សូម្បីខ្ញុំក៏ញ៉ាំគ្រឿងស្រវឹងដែរ ប៉ុន្តែញ៉ាំតែពេលមានកម្មវិធីធំៗ តែបន្តិចបន្តួចប៉ុណ្ណោះ ដែលអាចគ្រប់គ្រងខ្លួនឯងបាន»។
ភាពរីកចម្រើនខាងសិល្បៈសម្តែងកាន់តែមានទីផ្សារ តារាសម្តែងស្រីពោរពេញដោយទេពកោសល្យ និងមានសម្រស់ស្អាតកញ្ញា ពេជ្រ ចរណៃ ក៏បានបញ្ចប់នូវខ្សែភាពយន្តដុំ និងភាគជាច្រើនដូចគ្នា ដោយភាគច្រើនគ្រងតំណែងជាតួកាចឆ្នាសដូចជារឿង «ប្រពន្ធលួចលាក់» ដែលនាងត្រូវសម្តែងជាតួប្រពន្ធចុង។
កញ្ញា ពេជ្រ ចរណៃ ក៏បានបង្ហើបពីមូលហេតុដែលនាំឲ្យអ្នកដឹកនាំជ្រើសរើសស្រីស្អាតរូបនេះធ្វើជាតួកាចឆ្នាសដែរថា៖ «អាចថាមកពីខ្ញុំសម្តែងបានច្រើនទម្រង់ ទាំងកាច ស្លូត ទឹកភ្នែក ហើយអាចបត់បែនអត្តចរិតបាន ៤ ទៅ ៥ ទម្រង់ក្នុងរឿងតែមួយ ដោយអ្នកដឹកនាំធ្លាប់បានប្រាប់ថា អ្នកខ្លះបានតែតួកាច អ្នកខ្លះទៀតបានតែតួស្លូត អ៊ីចឹងខ្ញុំក៏អាចមានសមត្ថភាពក្នុងការសម្តែងតួអង្គបែបនេះ។ ខ្ញុំក៏មិនតូចចិត្តដែរ ព្រោះខ្ញុំគិតថានេះជាសិល្បៈនៃការសម្តែង សម្តែងឲ្យមហាជនបានទស្សនា ជាគំនិតអប់រំមួយផ្នែកប៉ុណ្ណោះ»៕
