ភ្នំពេញ៖ ទោះបីជាមានភាពរយាលស្ងាត់ក្នុងទីផ្សារសម្តែងកុន ដែលជាអាជីពចម្បងក្នុងវិស័យសិល្បៈបន្តិចមែន តែតារាសម្តែងស្រីជាថៅកែម៉ាំ ផ្អក ត្រសក់ចាវកញ្ញា ពៅ លីដា សម្រស់ស្អាតមិនជ្រេតាមវ័យ ចាប់បានលាភថ្មីដើមឆ្នាំ ២០២០ ក្លាយជាអ្នកតំណាងផ្សព្វផ្សាយផលិតផលសាប៊ូកក់សក់មកពីប្រទេស បារាំង ម៉ាក Vertalyca។
តារាស្រីញញឹមស្រស់កញ្ញា ពៅ លីដា បង្ហើបប្រាប់ភ្នំពេញប៉ុស្តិ៍ពីដំណឹងបានក្លាយខ្លួនជាទូតសុច្ឆន្ទៈឲ្យផលិតផលសាប៊ូកក់សក់ និងប្រេងបន្ទន់ម៉ាក Vertalyca នេះថា៖ «រឿងនេះ ក្រុមហ៊ុនបានទាក់ទងមកខ្ញុំតាំងពីខែ វិច្ឆិកា ឆ្នាំ ២០១៩ មក ក៏ប៉ុន្តែខ្ញុំត្រូវសាកល្បងផលិតផលមួយហ្នឹងដោយខ្លួនឯងជាមុនសិនដែរ ហើយខ្ញុំសាកតែ ៣ ថ្ងៃ ក៏បានដឹងថា ផលិតផលនេះល្អដែរ។ តែដោយសារខ្ញុំចង់ដឹងឲ្យបានប្រាកដចិត្ត ទើបខ្ញុំបន្តប្រើរហូតដល់ជាង ២ ខែ ទើបបានសម្រេចចិត្តចុះកុងត្រាជាមួយនឹងខាងក្រុមហ៊ុនតែម្តង»។
កញ្ញា ពៅ លីដា ដែលនៅតែបន្តគ្រងដំណែងជាតួឯកស្រីក្នុងការថតខ្សែភាពយន្តខ្នាតធំជាច្រើនបន្តបន្ទាប់នោះ បានបង្ហើបពីការចុះកុងត្រាជាមួយនឹងក្រុមហ៊ុន វើថាលីកា ខសមេធីក & ឯ.ក ដែលបាននាំចូលសាប៊ូកក់សក់ និងប្រេងបន្ទន់ម៉ាក Vertalyca ជាផលិតផលមកពីប្រទេស បារាំង រយៈពេល ៦ ខែ ខណៈនៅពេលផុតកុងត្រា តារាស្រីរូបនេះ នៅមិនទាន់សម្រេចចិត្តនឹងបន្តកុងត្រាទៀត ឬបញ្ចប់នោះទេ។
តារាសម្តែងស្រីដែលតែងតែបន្តការគាំទ្រពីមហាជនគ្រប់វ័យកញ្ញា ពៅ លីដា ក៏បានរៀបរាប់ពីការសាកល្បងផលិតផលរយៈពេលយូរដូច្នេះថា៖ «ដូចជាគ្រប់ផលិតផលទាំងអស់ ដែលខ្ញុំទទួលធ្វើជាអ្នកតំណាងផ្សព្វផ្សាយផលិតផល គឺខ្ញុំត្រូវតែជឿជាក់ថា មានគុណភាពពិតមែន ទើបខ្ញុំហ៊ានផ្សព្វផ្សាយ បើមិនល្អហើយចេះតែផ្សព្វផ្សាយ វាធ្វើឲ្យអ្នកដែលគាត់យកប្រើខកបំណង ហើយណាមួយទៀត ខ្ញុំក៏មិនចង់ឲ្យហ្វេនរបស់ខ្ញុំមានការខកបំណងផងដែរ»។
នាមួយរយៈចុងក្រោយនេះ កញ្ញា ពៅ លីដា តារាស្រី ដែលគេសម្គាល់ថា មានទេពកោសល្យក្នុងការសម្តែងរូបនេះ ហាក់ដូចជាមិនសូវឃើញមានវត្តមាននៅក្នុងការថតខ្សែភាពយន្តថ្មីឡើយ ដែលក្លាយជាចម្ងល់មហាជនផងដែរថា ហេតុអ្វីបានជាមិនសូវឃើញតារាស្រីរូបនេះ ចេញមុខតាមខ្សែភាពយន្តថ្មីសោះអ៊ីចឹង?
ជាការស្រាយចម្ងល់មហាជន តារាសម្តែងស្រី ដែលក្រៅពីអាជីពជាអ្នកសិល្បៈក៏បានប្រកបអាជីវកម្ម អចលនទ្រព្យជាមួយនឹងគ្រួសារដែរនោះ ក៏បានបញ្ជាក់ថា៖ «មិនមែនខ្ញុំមិនទទួលការថតកុននោះទេ ព្រោះថា នេះគឺជាអាជីពដែលខ្ញុំស្រឡាញ់ ហើយក៏ជាការងារចម្បងក្នុងសិល្បៈទៀតផងដែរ។
ប៉ុន្តែមកពីខ្ញុំ ទើបតែពត់ធ្មេញ ហើយនាពេលថ្មីៗនេះ ខាងផលិតករបានទាក់ទងមកគឺចង់ឲ្យថតកុនរឿងបុរាណទៀត ទើបខ្ញុំមិនទទួលថត ដោយសារវាមិនស៊ីគ្នា។ តែបើសិនជាកុនរឿងសម័យថត MV វិញ និងថតស្ប៉តផ្សព្វផ្សាយផលិតផលនានានោះ គឺខ្ញុំនៅតែទទួលថតដូចជាធម្មតាទេ»៕