ខេត្តសាមុតប្រាកាន៖ ព្រះសង្ឃ ១ អង្គ បានចារគូសវាសសំណេរធម៌ នៅលើម៉ាស់ពណ៌ទឹកក្រូច បួងសួងទទូចសុំឲ្យមានការបញ្ចប់សេចក្ដីឈឺចាប់របស់សត្វលោកដោយសារតែវីរុសកូរ៉ូណា។
ចំណារព្រះសង្ឃ គឺជាអត្តសញ្ញាណសម្រាប់ម៉ាស់ប្រចាំអារាម ដែលត្រូវបានផលិតឡើងពីការកែច្នៃសំរាមប្លាស្ទិកជុំវិញបវិវេណវត្ត។
ស្ថិតនៅក្នុងចំណោមប្រទេសអាស៊ីដែលមានចំនួនអ្នកឆ្លងវីរុសកូរ៉ូណាដ៏ច្រើននោះ ប្រទេស ថៃ ដែលបានប្រកាសបិទព្រំដែន និងទីសាធារណៈ មានតម្រូវការប្រើប្រាស់ម៉ាស់ច្រើន។
ព្រះសង្ឃនៅអារាមក្បែរក្រុងបាងកក បាននឹកឃើញគំនិតច្នៃប្រឌិត កែច្នៃម៉ាស់បន្ថែមដោយចារនូវសំណេរលើកទឹកចិត្តសម្រាប់អ្នកដែលមានជំនឿលើសាសនា ក្នុងការរួមចំណែកបង្ការជំងឺ។
អារាម ចាកដេង (Chak Daeng) ដែលល្បីល្បាញដោយសារតែព្រះចៅអធិការប្រណិប័តន៍គំនិតគិតគូរដល់បរិស្ថាន បានផលិតក្រណាត់ស្បង់ពីសំរាមដបប្លាស្ទិក ១៥ តោនជារៀងរាល់ខែ។
ព្រះសង្ឃ និងក្រុមអ្នកស្ម័គ្រចិត្តបានធ្វើការត្បាញរវៃសរសៃជ័រ ដែលចម្រាញ់ពីប្លាស្ទិក ផ្គួបជាមួយនឹងសំឡីកប្បាសដើម្បីបង្កើតជាក្រណាត់។
បន្ថែមលើកិច្ចការផលិតស្បង់កន្លងមក ព្រះសង្ឃ ប្រាណម ដាម៉ាឡាងការ៉ូ កាលពីខែមុនបានចាប់ផ្ដើមកិច្ចការផលិតម៉ាស់ ដើម្បីរួមចំណែកការពារសុខភាពប្រជាជន។
ស្រទាប់ការពារបន្ថែមត្រូវបានដេរនៅចន្លោះស្រទាប់ក្រណាត់នៃម៉ាស់ ដែលព្រះអង្គមានសង្ឃដីកាប្រាប់ទីភ្នាក់ងារ AFP ថា វានឹងជួយការពារតំណក់តូចៗចេញពីមាត់ ឬច្រមុះ។
ដើម្បីជំនួយដល់សេចក្ដីស្ងប់ផ្លូវចិត្ត អ្នកជំនាញចារយ័ន្ត នៅអារាម ចាកដេង បានបន្ថែមសំណេរបែបព្រះធម៌ ដែលមានអត្ថន័យសម្រាយថា «ដើម្បីស្វែងយល់អំពីបញ្ហាត្រូវស្វែងរកវិធីបញ្ចប់សេចក្ដីឈឺចាប់»។
ពុទ្ធសាសនិកជាច្រើនជឿថា ការស្វះស្វែងរកប្រភពនៃបញ្ហានឹងធ្វើឲ្យមនុស្សធ្វើដំណើរឆ្ពោះទៅកាន់និពា្វន ប៉ុន្តែព្រះតេជគុណ ប្រាណម ទទួលស្គាល់ថា មិនមែនសុទ្ធតែមនុស្សគ្រប់គ្នាមានជំនឿបែបនេះទេ។
ព្រះតេជគុណមានសង្ឃដីកាថា៖ «អ្នកដែលមិនជឿធម៌សាសនាព្រះពុទ្ធ ម៉ាស់ធម្មតា និងម៉ាស់ពីអារាមនេះមិនមានអ្វីខុសគ្នាទេ»។
ទោះបីជាប្រជាជនថៃខ្លះមានការភិតភ័យ និងខ្លះទៀតជ្រួលច្របល់ដោយសារតែវិបត្តិជំងឺរាតត្បាតនេះ ព្រះតេជគុណ ប្រាណម បានអំពាវនាវ ទៅដល់ប្រជាពលរដ្ឋថៃដោយបន្តប្រណិប័តន៍ធម៌ និងប្រព្រឹត្តតែទង្វើប្រកបដោយធម៌ ដើម្បីរក្សាចិត្តស្ងប់អំឡុងពេលឆ្លងកាត់គ្រោះជំងឺសកលមួយនេះ។
នៅប្រទេសជិតខាង មីយ៉ាន់ម៉ា វិញព្រះសង្ឃពុទ្ធសាសនាស្រវាស្រទេញ និងសូត្រព្រះធម៌ ដើម្បីការពារប្រជាជាតិទាំងមូល។
ព្រះសង្ឃមីយ៉ាន់ម៉ា មួយក្រុមបានប្រើបាឡុងហោះលើតំបន់ស័ក្ដិសិទ្ធិដែលសម្បូរប្រាង្គប្រាសាទ និងអារាមបាហ្គាន ដោយប្រោះព្រំទឹកមន្តពីលើផ្ទៃអាកាស៕ AFP