.jpg)
ប៊ុត សីហា និងតារារៀមច្បងជាគ្រូបង្វឹកក្នុងកម្មវិធី The VoiceCambodia។
ភ្នំពេញៈ បង្កការភ្ញាក់ផ្អើលយ៉ាងក្តៅគគុកទាំងអ្នកសិល្បៈ និងមហាជនតែម្តង ខណៈធ្លាយរឿងម្ចាស់ពានទី ១ នៃកម្មវិធី The Voice Cambodia លោក ប៊ុត សីហា ត្រូវប៉ូលិសចាប់ឃាត់ខ្លួនកាលពីល្ងាចថ្ងៃទី ២១ ខែកុម្ភៈ ឆ្នាំ ២០១៨ និងបានអនុញ្ញាតឲ្យត្រឡប់ទៅផ្ទះវិញហើយ បន្ទាប់ពីខាងអាណាព្យាបាលមកធានាក្នុងបទពាក់ព័ន្ធការប្រើប្រាស់គ្រឿងញៀន។
ទម្រាំតែបានក្លាយជាតារាចម្រៀងឈរលើទ្រនំផលិតកម្មធំមួយ គឺជាម្ចាស់ជយលាភីនៃកម្មវិធីលំដាប់ពិភពលោក The Voice Cambodia ដំបូង ប៊ុត សីហា ត្រូវឆ្លងការប្រឡងប្រជែងដ៏ស្វិតស្វាញ ជាមួយនឹងបេក្ខជនជាគូប្រជែង ដែលមានសំឡេងចម្រៀងល្អយ៉ាងច្រើន រួមផ្សំការជួយណែនាំបន្ថែមពីក្រុមតារាចម្រៀងរៀមច្បងសិល្បៈ ក្នុងនាមជាគ្រូបង្វឹកទាំង ៤ រូបផង និងឆ្លងកាត់ការវាយតម្លៃពីគណៈកម្មការមហាជន តាមរយៈការផ្ញើសារគាំទ្រផងដែរ តែឮដំណឹងនេះ ពិតជាងឿងឆ្ងល់ និងខកចិត្ត ស្តាយក្រោយខ្លាំងណាស់។
ថ្លែងទាំងអារម្មណ៍ភ្ញាក់ផ្អើលផង និងមានសេចក្តីសោកស្តាយផង ពេលបានឃើញព័ត៌មានរបស់លោក ប៊ុត សីហា ជាម្ចាស់ជយលាភីទី ១ នៃកម្មវិធី The Voice Cambodia លោក ណុប បាយ៉ារិទ្ធ ដែលជា គ្រូបង្វឹកម្នាក់ក្នុងចំណោមគ្រូបង្វឹក ៤ រូប ដែលចំនួន ៣ រូបទៀតមាន ឆន សុវណ្ណារាជ កញ្ញា ឱក សុគន្ធកញ្ញា និងអ្នកនាង ពេជ្រ សោភា បង្ហើបប្រាប់ភ្នំពេញប៉ុស្តិ៍ថា៖ «ក្នុងនាមខ្ញុំ Coach ម្នាក់ និងជារៀមច្បងផ្នែកសិល្បៈពិតជាមានការនឹកស្មានមិនដល់ ហើយក៏សោកស្តាយយ៉ាងខ្លាំងពីសមិទ្ធផលនៃការខំប្រឹងរបស់គាត់ក្នុងវិស័យសិល្បៈចម្រៀងមែនទែន។ ខ្ញុំស្តាយត្រង់ថា ទម្រាំគាត់បានពាន និងមានឈ្មោះល្បីក្នុងពិភពសិល្បៈនេះ គឺត្រូវឆ្លងកាត់ដំណាក់កាលច្រើនណាស់»។
លោក ណុប បាយ៉ារិទ្ធ ក៏បន្តថា៖ «រឿងគាត់ប្រើប្រាស់គ្រឿងញៀនវិញ ទាំងខាងខ្ញុំក្តី ខាងផលិតកម្មក្តី គិតថានេះជាទង្វើផ្ទាល់ខ្លួនគាត់ក្រៅពីការងារផ្នែកសិល្បៈ ហើយមិនដឹងថាគាត់បានទៅពាក់ព័ន្ធរបៀបណានោះទេ។ សម្រាប់ខ្ញុំវិញជាមួយ សីហា មិនសូវជាមានការងារសិល្បៈជួបគ្នាទេ»។
លោក ឆន សុវណា្ណរាជ ជាគ្រូបង្វឹកផ្ទាល់លោក ប៊ុត សីហា មិនហ៊ានថាយ៉ាងណាទេចំពោះអតីតកូនក្រុមខ្លួន ខណៈខាងភ្នំពេញប៉ុស្តិ៍ស្នើសុំចំណាប់អារម្មណ៍ផ្ទាល់ខ្លួននោះ។
លោក ឆន សុវណ្ណរាជ បានឆ្លើយដោយប្រើលេសថា៖ «សុំទោសផងបង ពេលនេះខ្ញុំកំពុងតែជាប់ថត ហើយគេកំពុងចាំខ្ញុំ។ ចាំពេលណាខ្ញុំថតចប់ ខ្ញុំនឹងទូរស័ព្ទទៅបងវិញពេលនោះ»។
ចំពោះរឿង ប៊ុត សីហា ប្រើគ្រឿងញៀននោះ ក៏ត្រូវបានលោក មាស រិទ្ធី ជានាយកព័ត៌មាននៃស្ថានីយទូរទស្សន៍ហង្សមាស បានទម្លាយឲ្យដឹងតាមកម្មវិធីផ្សាយព័ត៌មានពេលព្រឹកថា៖ «តាមការពិត ផលិតកម្មបានដឹងយូរមកហើយថា ប៊ុត សីហា បានប្រើប្រាស់គ្រឿងញៀន ពោលតាំងពីពេលក្រោយប្រឡងជាប់ជយលាភីលេខ ១ នារដូវកាលទី ១ នៃកម្មវិធី The Voice Cambodia ប្រមាណ ៣ ខែ មកម្ល៉េះ។ ថ្នាក់ដឹកនាំផលិតកម្ម ក៏ហៅ ប៊ុត សីហា មកណែនាំច្រើនលើកហើយដែរ ប្រមាណជា ១០ លើកឯណោះ ដើម្បីឲ្យឈប់ទង្វើនោះ តែតារាចម្រៀងរូបនេះ មិនបានស្តាប់ និងមិនធ្វើតាមទេ»៕
