ក្រុងម៉ូស្គូ៖ មហាសេដ្ឋីប្រេង ឡេអូនីដ មីកហេលសុន រមែងចុះកិច្ចព្រមព្រៀង និងជួបប្រជុំជាមួយប្រធានាធិបតីរុស្ស៊ី វ៉្លាឌីមៀ ពូទីន តែនៅថ្ងៃអង្គារ បុរសមានលុយច្រើនបំផុតរបស់រុស្ស៊ីរូបនេះបានជួបជាមួយក្រុមអ្នកវប្បធម៌ ខណៈលោកបង្ហាញគម្រោងមជ្ឈមណ្ឌលសិល្បៈក្រុងម៉ូស្គូថ្មី។
ទីតាំង GES-2 នៅភាគកណ្ដាលម៉ូស្គូ ឧបត្ថម្ភដោយមូលនិធិ VAC របស់លោក មីកហេលសុន ស្ថិតនៅរោងចក្រថាមពលអគ្គិសនីអាយុកាល ១ សតវត្សរ៍ ដែលត្រូវបានឌីហ្សាញឡើងវិញ និងរៀបចំកម្មវិធីសម្ពោធដោយវិចិត្រករ Renzo Piano របស់អ៊ីតាលី។
លោកបានថ្លែងក្នុងសិន្នសីទសារព័ត៌មានថា បរិវេណដ៏ធំទូលាយគ្រោងបង្កើតជាវិចិត្រសាល ហាងកាហ្វេ និងទីកន្លែងផលិតសិល្បៈ ដោយត្រៀមបើកទ្វារនៅខែកញ្ញា ឆ្នាំ ២០២០។
ស្ថិតលើដងទន្លេក្រុងម៉ូស្គូ ទីតាំងវិចិត្រសាលរក្សានូវរចនាសម្ព័ន្ធរោងចក្រឆ្នាំ ១៩០៧ ដែលផ្គត់ផ្គង់អគ្គិសនីក្រុងក្រឹមឡាំង តែពេលនេះប្រើបន្ទះថាមពលសូឡា លើដំបូល។
យោងតាមចំណាត់ថ្នាក់ទស្សនាវដ្ដី Forbes បានបង្ហាញថា ការវិនិយោគរបស់លោក មីកហេលសុន មានទឹកប្រាក់ ២៧,៣ ពាន់លានដុល្លារ ជាអគារដ៏សម្បើមក្នុងប្រទេស រុស្ស៊ី។
លោក មីកហេលសុន បានប្រាប់អ្នកសារព័ត៌មានថា៖ «ខ្ញុំកសាងសមិទ្ធផលជាច្រើនក្នុងជីវិត តែគម្រោងនេះពិតជាមានតម្លៃណាស់សម្រាប់ខ្ញុំ»។
ជាអ្នករក្សាទុកស្នាដៃសិល្បៈម្នាក់ លោក មីកហេលសុន បានចំណាយប្រាក់ ២០០ លានដុល្លារ ប្រមូលស្នាដៃវិចិត្រករ Francis Bacon, Amedeo Modigliani, Gerhard Richter និងអ្នកដទៃទៀត ដែលនឹងបង្ហាញនៅវិចិត្រសាល GES-2 ផងដែរ។
គម្រោងនេះ គឺជាទីតាំងវិចិត្រសាលរាងចតុកោណដំបូងបំផុតរបស់លោក ខណៈមហាសេដ្ឋីរុស្ស៊ីជាច្រើននាក់ទៀតធ្វើកិច្ចការសប្បុរសធម៌ទាក់ទងសិល្បៈ ផ្ដល់មូលនិធិដល់វិទ្យាស្ថានវប្បធម៌បស្ចិមប្រទេស ឬឧបត្ថម្ភ និងទិញស្នាដៃសិល្បៈ៕ AFP/HR