ភ្នំពេញ: ក្រោយដំណើរហោះទៅដល់គោលដៅ ឆាកប្រគំតន្ត្រីធំដំបូង តន្ត្រីអចលនទ្រព្យ ឡេង ណាវ៉ាត់ត្រា នៅប្រទេសកូរ៉េខាងត្បូង របស់កំពូលតារាចម្រៀង ចំណូលថ្មីរបស់ផលិតកម្មហង្សមាស លោក ខេមរៈ សិរីមន្ត នៅយប់ថ្ងៃទី១៥ ខែកុម្ភៈនេះ រាជនីសំឡេងស្រទន់ កញ្ញា មាស សុខសោភា តារាចម្រៀងស្អក លោក ខេម និង កញ្ញា យូរី ក៏បានដឹកដៃគ្នាហោះទៅទីក្រុងសេអ៊ូល ស្វែងទៅជួបកំពូលតារាចម្រៀង ខេរមៈ សិរីមន្តី លើឆាកតន្ត្រីតែមួយ។
គួរបញ្ជាក់ថា នេះជាជើងយន្តហោះទី ២ បានដឹកតារាចម្រៀងខ្មែរ ទៅច្រៀងនៅប្រទេសកូរ៉េក្នុងកម្មវិធីប្រគំតន្ត្រីអចលនទ្រព្យ ដែលចាប់ផ្តើមនៅថ្ងៃទី ១៦-១៧ កុម្ភៈនេះ ខណៈជើងយន្តហោះទី១ រួមមាន ខេមរៈ សិរីមន្ត, ប៉ែន ចំរ៉ុង, អាឡាស្កូ, ចន ច័ន្ទលក្ខិណា បានចេញដំណើរតាំងពីថ្ងៃទី ១៣ ខែកុម្ភៈ ឆ្នាំ ២០១៨។
វត្តមានតារាចម្រៀង ៣ ដួង ទៅច្រៀង និងសម្តែង នៅប្រទេសកូរ៉េ ត្រូវបានរៀបចំសមាគមសិល្បករខ្មែរ និងទទួលបានការឧបត្ថមពីក្រុមហ៊ុន ឡេង ណាវ៉ាត់ត្រា ក្រោមចំនួនទឹកប្រាក់ចំណាយពីឧកញ៉ាវ័យក្មេង ឡេង ណាវ៉ាត់ត្រា អតីតពលករនៅកូរ៉េ ក្នុងគោលបំណងធ្វើឲ្យពលករនៅកូរ៉េបានសប្បាយ និងបានទស្សនាការប្រគំតន្ត្រីដ៏ធំដំបូង តន្ត្រីអចលនទ្រព្យ ប្រជុំដោយកំពូលតារាចម្រៀងពីកម្ពុជា។
ក្នុងនោះ តារាចម្រៀងទាំង ៣ ដួង ដែលទទួលបានស្វាគមន៍យ៉ាងរីករាយពីបងប្អូនខ្មែរនៅអាកាសយាន្តដ្ឋានអន្តរជាតិភ្នំពេញ និងការសុំថតរូបអនុស្សាវរីយ៍ក្នុងរយៈពេលដល់ទៅជិតមួយម៉ោងនោះ ពួកគេសុទ្ធតែបានអះអាងថា៖ «ដំណើរទៅច្រៀងនៅប្រទេសកូរ៉េ លើកនេះ សង្ឃឹមទទួលបានការគាំទ្រខ្លាំង ពិសេសយើងទាំងបីក៏នឹងទៅជួប បង សិរីមន្ត នៅទីនោះស្រាប់»។
តារាចម្រៀងសំនៀងស្រទន់កញ្ញា មាស សុខសោភា និងលោក ខេម បានអះអាងហើយអះអាងទៀតថា ៖ «ការទៅច្រៀងនៅកូរ៉េលើកនេះ ពិតជាធ្វើឲ្យបងប្អូនខ្មែរនៅកូរ៉េបានសប្បាយ ព្រោះថា កម្របានតារាល្បីៗទៅទៅឡើងឆាកជាមួយគ្នា ប៉ុន្តែលើកនេះ សមាគមសិល្បករខ្មែរ និងក្រុមហ៊ុន ឡេង ណាវ៉ាត្រា គាត់រៀបចំឲ្យពួកយើងបានជុំគ្នាលើឆាកតន្ត្រីនៅប្រទេសកូរ៉េ ពួកយើងនិងខំច្រៀងធ្វើឲ្យយ៉ាងឲ្យពួកគាត់បានសប្បាយ ក្រោយពីនឿយហត់ពីការងារ»។
រីឯតារាចម្រៀងនិយមស្ដាយឃ្យូតៗបែបយុវវ័យកញ្ញា យូរី ក៏ពោលដែរថា៖ «ខ្ញុំជាសិស្សប្អូន មិននឹកស្មានថា បានទៅសម្តែងនៅប្រទេសកូរ៉េជាមួយរៀមច្បងល្បីដែរ តែពេលនេះបានជួបគួកគាត់ មាន បងភា បង ខេម ពិសេស បង សិរីមន្ត ខ្ញុំនិងប្រឹងជាមួយពួកគាត់ ធ្វើយ៉ាងណាឲ្យការប្រគំតន្ត្រីមួយនេះ ទទួលបានជោគជ័យនិងឲ្យបងប្អូនខ្មែរនៅទីនោះបានសប្បាយដែរ»៕