ភ្នំពេញៈ តារាចម្រៀងទាំងប្រុសស្រីគ្រប់ផលិតកម្ម បានសម្រុកថតបទចម្រៀង សម្រាប់ត្រៀមចេញនៅថ្ងៃចូលឆ្នាំថ្មីប្រពៃណីខ្មែរឆ្នាំ ២០១៨ នេះ តែមហាជនសង្កេតឃើញថា សម្បូរតែបទបែកស្លុយសឹងទាំងអស់តារាចាស់ និងតារារលកក្រោយ មិនសូវជាសម្បូរបទបែបប្រពៃណីខ្មែរនោះឡើយ។
យ៉ាងណាមិញបទចេញថ្មីមានចំណងជើងថា «ចង្កេះទន់ទោរ» របស់តារាចម្រៀងស្រីកំពូលនៅទ្រនំថោន កញ្ញា មាស សុខសោភា ក្លាយជាដើមចមមួយដែលធ្វើឲ្យមហាជនចោទសួរនាំ គ្នាភ្លាមៗថា តើចុះកញ្ញា មាស សុខសោភា មានចេញបទបែកស្លុយនឹងគ្នាដែរទេ សម្រាប់ចូលឆ្នាំខ្មែរឆ្នាំថ្មីនេះ?»។
សាមីខ្លួនមិនទាន់បានបកស្រាយអ្វីផងនោះ ក៏មានក្រុមអ្នកគាំទ្រដែលជា Fans របស់តារាចម្រៀងស្រីចាស់វស្សានៅទ្រនំថោន ចេញមកនិយាយការពារភ្លែតថា៖ «បើតាមដឹងតាំងពីអ៊ើយមកនោះ កញ្ញា មាស សុខសោភា មិនដែលចេញបទបែកស្លុយនោះឡើយ ហើយឆ្នាំនេះក៏មិនឃើញមានដែរ»។
បន្ថែមពីនេះ តារាចម្រៀងស្រីឈរលំដាប់កំពូលថោន ដែលទើបតែលេចឮនូវដំណឹងថា អាក់អន់ស្រពន់ចិត្តនឹងទ្រនំចាស់ ហើយមានទ្រនំថ្មីចង់បាននោះ ក៏បានបង្ហើបប្រាប់ភ្នំពេញប៉ុស្តិ៍ដែរថា៖ «ជាការពិតសម្រាប់នាងខ្ញុំផ្ទាល់ បទចម្រៀងសម្រាប់ត្រៀមចេញរដូវចូលឆ្នាំថ្មីនីមួយៗនោះគឺថានាងខ្ញុំមិនដែលចេញបទចម្រៀងបែបមានចង្វាក់ញាប់ៗ ឬបទខ្មែរបច្ចុប្បន្នហៅថាបទបែបស្លុយនោះឡើយ។ មូលហេតុមិនមានមកពីនាងខ្ញុំមិនចូលចិត្ត ហើយខ្ញុំក៏បានសង្កេត និងបានស្ទង់មើលពីទំនោរទស្សនិកជនជាអ្នកស្តាប់ដែរថា បងប្អូនក៏មិននិយមបទបែបនោះផងដែរ។ ម្យ៉ាងវិញទៀត បទចម្រៀងប្រភេទមានចង្វាក់ញាប់ៗ ឬខ្មែរបច្ចុប្បន្នហៅថាបទបែបស្លុយនោះខាងផលិតកម្មក៏មានក្រុមតារាចម្រៀងតាមបែបនេះផងដែរ ដើម្បីបម្រើទៅតាមទីផ្សារមហាជនជាអ្នកស្តាប់។ ចំណែកឯនាងខ្ញុំវិញក៏តែងតែយកបទចម្រៀងបែបចង្វាក់ខ្មែរតាំងពីដើមមក»។
ហាក់ដូចជាដឹងរឿងមុនថា នឹងត្រូវលើកយកការចេញបទថ្មី «ចង្កេះទន់ទោរ» របស់ខ្លួន ដែលមានការច្រៀងរ៉េបផងដែរនោះមកនិយាយ កញ្ញា មាស សុខសោភា ក៏បញ្ជាក់ភ្លាមដែរថា៖ «សម្រាប់បទថ្មីរបស់ខ្ញុំនេះ មានលាយឡំគ្នារវាងបទបែបខ្មែរ និងមានការរ៉េបពីតារាចម្រៀងប្រុស ២ រូបដែរគឺលោក Tempo Tris និងលោក Riel Bob Mula។ តែការធ្វើបទបែបនេះ មិនមែនជាបទចម្រៀងដែលមានលក្ខណៈជាបទចម្រៀងមានចង្វាក់លឿន ឬបែកស្លុយដាច់ឆ្ងាយតែឯងនោះឡើយ ដោយយើងខិតខំបញ្ចូលអ្វីជាអត្តសញ្ញាណខ្មែរខ្លះ សម្រាប់អ្នកនិយមស្តាប់បទបែបនេះ»។
ម្យ៉ាងទៀតកាលពីតារានេះចេញ «Dance and Smile» ក្រោមការរិះរកគំនិតច្នៃប្រឌិតដោយលោក អ៊ុក រតនា ដែលជាអ្នកដឹកនាំសម្តែងរបស់ផលិតកម្មថោន និងជាជំនួយការផ្ទាល់របស់តារាចម្រៀងស្រីសំឡេងផ្អែមស្រទន់កញ្ញា មាស សុខសោភា ដែលមានការច្នៃប្រឌិតថ្មីបែបចម្រុះទម្រង់សិល្បៈ ជាពិសេសគឺទម្រង់សិល្បៈបុរាណសៀករហស្សកម្ម បានទាក់ទាញចំណាប់អារម្មណ៍ របស់ទស្សនិកជនយ៉ាងច្រើនសន្ធឹកសន្ធាប់ផងដែរ។
ក្រៅពីសិល្បៈខ្មែរ ក៏មានរំលេចសិល្បៈបស្ចិមប្រទេសនៅក្នុង MV បទថ្មីនោះផងដែរ ខណៈលោក អ៊ុក រតនា ក៏ធ្លាប់បានបកស្រាយថា៖ «យើងចង់បង្ហាញឲ្យឃើញភាពចម្រុះនៃវប្បធម៌ ២ រវាងខ្មែរ និងបរទេសផងដែរ តាមរយៈបទថ្មីរបស់តារាស្រីល្បីកញ្ញា មាស សុខសោភា»៕