ភ្នំពេញៈ ខណៈដែលកុនរឿង «កិច្ចសន្យាស្នេហ៍ Tom & Jerry» ដែលសម្តែងដោយតារាចម្រៀងប្រុសអូរីជីណលលោក ម៉ា ច័ន្ទបញ្ញា និងតួស្រីកញ្ញា អ៊ីងអ៊ីង ចាក់បញ្ជាំងតាមរោងកុននានារយៈពេលប៉ុន្មានថ្ងៃមក ក៏ស្រាប់តែផ្ទុះសារខកចិត្តនឹងទស្សនិកជនពីសំណាក់ តួប្រុសគួរឲ្យភ្ញាក់ផ្អើល។
ចេញពីគណនីហ្វេសប៊ុកផ្ទាល់ខ្លួនតារាចម្រៀងប្រុសអូរីជីណលលោកម៉ា ច័ន្ទបញ្ញា ក្រោយពីបានឃើញសម្ទុះនៃការចាប់អារម្មណ៍ជាវសំបុត្រចូលទស្សនាកុនទី ៤ របស់ខ្លួនបានសម្តែងគឺរឿង «កិច្ចសន្យាស្នេហ៍ Tom & Jerry» មានតិច ហើយក៏បានលុបចោលសារនោះវិញថា៖ «ភាពឈឺចាប់មួយដែលគ្មានអ្នកដឹង។ ទាំងកម្លាំងកាយ និងកម្លាំងចិត្តប្រឹងសរសេររឿងនេះឡើង ដើម្បីឲ្យទស្សនិកជនបានមើលឃើញរូបភាពដូចអ្វីដែលខ្ញុំបានស្រមើស្រមៃ។ តែចុងក្រោយស្នាដៃមួយនេះ ធ្វើឲ្យខ្ញុំឈឺចាប់ព្រោះតែមានការគាំទ្រតិចតួចបំផុតរហូតសឹងតែមិនជឿ។ ក្តីបរាជ័យមួយនេះធ្វើឲ្យខ្ញុំ ខ្លាចរអានឹងការបោះជំហានបន្តក្នុងវិស័យភាពយន្តនៅក្នុងនាមជាអ្នកនិពន្ធ។ អារម្មណ៍ពេលនេះ ប្រៀបដូចជាដើមឈើជ្រុះស្លឹក។ ប្រសិនបើគ្មានការគាំទ្រ គ្មានការលើកទឹកចិត្ត និងគ្មានការផ្តល់ឱកាសនោះ ខ្ញុំនឹងដើរចេញពីវិថីមួយនេះ ហើយខ្ញុំក៏រីករាយទទួលគំនិតបន្ថែម ដើម្បីស្ថាបនា សាច់រឿងដូចគ្នា។ សង្ឃឹមថា បងប្អូននឹងសាកល្បងទៅទស្សនារឿងនេះ មុននឹងធ្វើការវិភាគថា រឿងនេះមិនល្អមើល»។
តារាចម្រៀងប្រុស ដែលបានរះលើវិថីសិល្បៈចម្រៀងបែបអូរីជីណល ហើយក៏ហក់ទៅចាប់អាជីពសម្តែងកុនទៀតរូបនេះ ក៏បានលើកសរសើពីកម្រិតសាច់រឿងខ្លួនឯងដែរថា៖ «រឿងកិច្ចសន្យាស្នេហ៍ Tom & Jerry ជាស្នាដៃទី ៤ របស់ខ្ញុំ បន្ទាប់ពីរឿង សិស្សប្អូនសំណព្វចិត្ត និងរឿងខូចចិត្តអាជីព។ ខ្ញុំសែនស្រឡាញ់សាច់រឿងនេះណាស់ព្រោះវាមានរំលេចគ្រប់រសជាតិ ទាំងអារម្មណ៍ស្នេហា កំប្លុកកំប្លែង ភាពភ័យរន្ធត់ និងទេសភាពស្រស់ត្រកាលនៃខេត្តរតនគិរី ជាមួយនឹងការរស់នៅរបស់ជនជាតិដើមភាគតិច ដែលមនុស្សភាគច្រើនស្ទើរតែបំភ្លេចទៅហើយ»។
នាមួយរំពេចក្រោយមកក៏មានគណនីហ្វេសប៊ុកមួយ ដែលប្រាប់ពីមុខងារខ្លួនជាផលិតករម្នាក់ឈ្មោះថា Mung Kul បានចូលមកបញ្ចេញមតិយោបល់ឆ្លុះបញ្ចាំងពីវិស័យភាពយន្តផងដែរ។ ពីគណនីហ្វេសប៊ុកនេះបានសរសេរថា៖ «ក្នុងនាមជាផលិតករភាពយន្តម្នាក់ ទោះបីស្នាដៃការផលិតរបស់ខ្លួននៅមិនទាន់ដល់ចំណុចមួយខ្លាំង តែក៏មានមោទនភាព នឹងក្រុមការងាររបស់ខ្លួន ដែលបានចូលរួមចំណែកក្នុងការបង្ហាញ និងផ្សព្វផ្សាយនូវទស្សនីយភាពនៃតំបន់ទេសចរណ៍ ស្អាតៗ ក្នុងប្រទេសកម្ពុជា ដែលបងប្អូនយើងមិនសូវបានទៅដល់ ដើម្បីឲ្យពួកគាត់បានស្គាល់ និងចូលរួមទស្សនាកម្សាន្តក្នុងការលម្ហែអារម្មណ៍»។
គួរបញ្ជាក់ដែរថា ភាពយន្តរឿង «កិច្ចសន្យាស្នេហ៍ Tom & Jerry» នេះផលិតដោយផលិតកម្មរ៉ុក ដែលបានចាក់បញ្ជាំងតាមរោងកុននានានៅភ្នំពេញតាំងពីថ្ងៃទី ១៩ ខែកុម្ភៈ មកហើយ បានបញ្ចប់នៅថ្ងៃទី ២២ ខែកុម្ភៈ ឆ្នាំ ២០១៨ កាលពីថ្ងៃម្សិលមិញ៕