​ម៉ូដ​តំណាង​ស្ត្រី​ខ្មែរ ២៥ ខេត្ត-ក្រុង គ្រង​ឈុត​តុក្កតា​បាប៊ី​នៅ​ខ្វះ​ឱកាស​យក​ទៅ​ដាក់​តាំង​បង្ហាញ​មហាជន​

ម៉ូដសម្លៀកបំពាក់ស្រ្តីខ្មែរតំណាងខេត្តកែប កំពង់ឆ្នាំង (កណ្តាល) និងកំពង់ស្ពឺ។ Bora Apsara Barbie

ក្រុងសៀមរាបៈ ទោះបីពុំឆ្លងកាត់រៀនជំនាញសិល្បៈមែនក្តី តែថ្វីដៃកែច្នៃម៉ូដសម្លៀកបំពាក់បុរាណប្លែកៗគ្រងឈុតតុក្កតារបស់សិល្បករខ្មែរវ័យ ២៦ ឆ្នាំ កំពុងតែទាក់ចំណាប់អារម្មណ៍ទេសចរបរទេស និងខ្មែរអាណិកជន ជាវទុកជាវត្ថុអនុស្សាវរីយ៍យ៉ាងផុសផុល។

តែក្រោយពីខិតខំចំណាយពេលអស់ ៧ ខែ បង់កម្លាំងកាយ ចំណាយអស់ធនធានប្រាក់រាប់ពាន់ដុល្លារមក ដើម្បីច្នៃម៉ូដសម្លៀកបំពាក់រចនាបែបខ្មែរ ដែលសង្ឃឹមថា អាចនាំយកតាំងបង្ហាញសាធារណជនទស្សនា និងស្វែងយល់កាលពី ២ ឆ្នាំមុន មកទល់ពេលនេះ ក៏កម្រងស្នាដៃច្នៃម៉ូដសម្លៀកបំពាក់តំណាងស្ត្រីទូទាំង ២៥ ខេត្ត-ក្រុង របស់លោក ជៀប ស៊ីបូរ៉ា នៅតែពុំទាន់អាចមានឱកាសរកទីកន្លែងដាក់តាំងបង្ហាញនៅឡើយដោយខ្វះការគាំទ្រ។

លោក ជៀប ស៊ីបូរ៉ា ដែលមានទេពកោសល្យផ្នែកសិល្បៈអតីតជានិស្សិតជំនាញផ្នែកព័ត៌មានវិទ្យា រៀបរាប់ពីការបង្កើតគំនិតច្នៃប្រឌិតជាម៉ូដនៃឈុតសម្លៀកបំពាក់បុរាណបែបខ្មែរនេះថា៖ «ខ្ញុំបានចាប់ផ្តើមតាំងពីឆ្នាំ ២០១៣ មក គឺយកតុក្កតាបាប៊ីច្នៃជាអ្នកគ្រងឈុតម៉ូដនានា។ ទោះបីជាខ្ញុំមិនបានរៀនជំនាញសិល្បៈច្នៃម៉ូដមែន តែខ្ញុំចូលចិត្តមើលសៀវភៅម៉ូដ និងសិល្បៈច្រើន ទើបជក់ចិត្តរហូតសាកល្បងធ្វើវារហូតមក។ ម្យ៉ាងទៀតនេះជាការងារក្រៅពីជំនាញរៀនរបស់ខ្ញុំតែប៉ុណ្ណោះ»។

លោក ជៀប ស៊ីបូរ៉ា អ្នកច្នៃម៉ូដឈុតបាប៊ី។ Bora Apsara Barbie

កំលោះរៀនព័ត៌មានវិទ្យា តែដុងសិល្បៈរូបនេះបន្តថា៖ «ទោះដំបូងឡើយពុំមានអ្នកគាំទ្រក្តី លុះក្រោយឃើញមានការគាំទ្រពីបងប្អូនខ្មែរ និងជនបរទេស ជាបណ្តើរ។ តែភាគច្រើនអ្នកជាវវត្ថុនេះគឺជាបរទេស និងខ្មែរអាណិកជន ហើយខ្ញុំក៏មិនទាន់បានបើកជាកន្លែងសម្រាប់ច្នៃលក់ជារបរធំដុំនៅឡើយដែរ គ្រាន់តែឆ្លៀតធ្វើពេលមានគេកុម្ម៉ង់គឺ ១ តម្លៃចន្លោះពី ៣០ ដុល្លារ ទៅ ៥០ ដុល្លារ ខណៈខ្ញុំក៏ត្រូវចំណាយពេល ២-៣ ថ្ងៃ ឯណោះទើបបាន ព្រោះត្រូវប៉ាក់ឌិន ដាំអង្កាំ និងជ្រើសក្រណាត់សូត្រខ្មែរមកកាត់ច្នៃជាម៉ូដ»។

ឈុតសម្លៀកបំពាក់ស្ត្រីខ្មែរទាំង ២៥ ខេត្ត-ក្រុងនោះរួមមាន ភ្នំពេញឈុត «រាជិនីទីក្រុងគជ់» បាត់ដំបងឈុត «ព្រះប្រពៃស្រព» កំពង់ស្ពឺឈុត «មន្តស្នេហ៍រកាសួគ៌» ប៉ៃលិន «មយូរ៉ា» មណ្ឌលគិរីឈុត «រុក្ខទេវី» សៀមរាបឈុត «នាងទេពអប្សរ» ឧត្តរមានជ័យឈុត «នាដស្ត្រី» ក្រចេះឈុត «ទេវវារី» កោះកុងឈុត «សុវណ្ណមច្ឆា» ត្បូងឃ្មុំឈុត «នារីទសវត្សរ៍ ទី៩០» រតនគិរីឈុត «ភូមិរីធីតា» កំពត «អភិជននិយមបារាំង» កណ្តាល «ធរណីមាតា» ស្ទឹងត្រែង «គង្គាទេវី» កំពង់ចាមឈុត «បទុមទេវី» កែបឈុត «ទេវីស្រីសមុទ្រ» ព្រៃវែងឈុត «កុលស្ត្រីខ្មែរ» កំពង់ឆ្នាំងឈុត «នារីកុលាភាជន៍» បន្ទាយមានជ័យ «សោភ័ណស្ត្រី» កំពង់ធំ «មហិង្សានារី» ពោធិ៍សាត់ «បុប្ធាផ្សងទៀន» ស្វាយរៀងឈុត «វីរស្ត្រី» ព្រះសីហនុឈុត «សិង្ហអប្សរ» តាកែវ «សុវណ្ណហង្ស» និងព្រះវិហារឈុត «គិរីស្វរទេវី»៕