.jpg)
ម្ចាស់សួនផ្កា ២៣ លាននាក់ នៅចក្រភពអង់គ្លេសបង្ខំចិត្ដចោលផ្ការាប់លានដើម។
ក្រុងឡុងដ៍៖ បុប្ផា និងរុក្ខជាតិរាប់លានដើមត្រូវបានបោះចោល គ្មានស្ដាយស្រណោះ។ ឧស្សាហកម្មផ្កា និងរុក្ខជាតិលម្អនៅអង់គ្លេស អាចនឹងដួលទាំងស្រុងនៅប៉ុន្មានសប្ដាហ៍ទៀត ដោយសារតែការរីករាលដាលនៃវីរុសកូរ៉ូណាទូទាំងសកលលោក។
សមាគមពាណិជ្ជកម្មផ្កា (HTA) ដែលតំណាងឲ្យមជ្ឈមណ្ឌលដំណាំលម្អ ១ ៤០០ កន្លែងទូទាំងចក្រភពអង់គ្លេស ទទូចសុំជំនួយហិរញ្ញវត្ថុពីរដ្ឋាភិបាល ដើម្បីទ្រទ្រង់ឧស្សាហកម្មក្នុងកាលៈទេសៈដ៏យ៉ាប់យ៊ឺនបំផុតនេះ។
លោក ជេមស៍ បានណ៍ ប្រធានសមាគម HTA ប្រកាសថា៖ «យើងជួបព្យុះអាក្រក់បំផុតនៅអង់គ្លេស»។
លោកបន្តទៀតថា៖ «អាកាសធាតុតាមរដូវកាល និងកត្តាមិនអាចថែរក្សាផ្កាទុកបានយូរ ធ្វើឲ្យអ្នកដាំផ្កាងាយប្រឈមនឹងការខាតបង់កាន់តែខ្លាំងពី ១ ថ្ងៃ ទៅ ១ ថ្ងៃ»។
សមាគមដំណាំផ្កាស្នើសុំរដ្ឋាភិបាលនូវជំនួយហិរញ្ញវត្ថុ ៣០៩ លានដុល្លារអាមេរិក ដើម្បីទ្រទ្រង់ការដួលរលំ។
ប្រធានសមាគម HTA បានឲ្យដឹងថា៖ «រហូតដល់ខែឧសភា មិនសង្ឃឹមថា មានដំណើរការលក់ដូរ ខណៈពេលនេះ ធ្លាប់ជាវេលាដ៏សំខាន់ក្នុងវិស័យដាំដុះលក់ផ្កា និងដំណាំលម្អ»។
តាមការប៉ាន់ស្មាន នៅអង់គ្លេសមានចំនួនអ្នកដាំផ្កាប្រមាណ ២៣ លាននាក់ ដែលតាមទម្លាប់ពួកគេត្រូវទៅហាងរកទិញពូជផ្កា និងដំណាំយកមកដាំនៅផ្ទះអំឡុងខែមេសានេះ។
មានអាជីវកម្ម ៦៥០ ក្រុមហ៊ុនទៀត នៅអង់គ្លេស ដែលត្រូវការផលិតផលទាំងនោះមកផលិតជាគ្រឿងតុបតែងលម្អ។ មនុស្ស ១៥ ០០០ នាក់ បម្រើការផ្ទាល់ក្នុងឧស្សាហកម្មដែលមានតម្លៃស្មើនឹង ១,៤ ពាន់លានផោន។
តារាទូរទស្សន៍ប្រចាំកម្មវិធីសួនផ្កា និងដំណាំ Alan Titchmarsh បានត្អូញត្អែរថា៖ «យើងរកផ្កាមកបំពេញន័យដល់ជីវិត ពេលសម្ងំនៅផ្ទះ តែស្ថានភាពកាន់តែយ៉ាប់»៕
