.jpg)
ក្រុមរបាំរំដួលសហសម័យចម្រុះរបស់លោកគ្រូ ហង់ ភូមិរ៉ា ហៅយាយកន្តែរ៉ែ។ រូបថត ហ្វេសប៊ុក
ភ្នំពេញៈ ដោយសារតែចង់ឲ្យមានគំនិតច្នៃប្រឌិតថ្មី តែមិនចោលទម្រង់ដើម និងទទួលបានការឯកភាពពីខាងក្រសួងវប្បធម៌ និងវិចិត្រសិល្បៈផងដែរនោះ ក៏ជំរុញឲ្យលោកគ្រូរបាំបុរាណខ្មែរគ្រប់ទម្រង់វ័យ ៣២ ឆ្នាំលោក ហង់ ភូមិរ៉ា ដែលស្រទាប់យុវវ័យច្រើនតែស្គាល់គាត់ក្នុងតួអង្គរបាំទម្រង់ល្ខោនខោលជាតួយក្ស តួស្វា ជាពិសេសតួអង្គយាយកន្តែរ៉ែ សម្រេចច្នៃនូវទម្រង់របាំរំដួលបុរាណទៅជារបាំសហសម័យឲ្យមានលក្ខណៈរស់រវើក និងទាក់ទាញនូវចំណាប់អារម្មណ៍អ្នកទស្សនា។
លោក ហង់ ភូមិរ៉ា ជាគ្រូរបាំដែលបានបញ្ចប់ការសិក្សាផ្នែកសិល្បៈរបាំបុរាណទម្រង់ល្ខោនខោល និងជាប្រធានក្រុមសិល្បៈយុវជនល្ខោនខោលជំនាន់ថ្មីរូបនេះបង្ហើបពីការយករបាំរំដួលបែបបុរាណរបស់ក្រសួងវប្បធម៌មកច្នៃជារបាំរំដូលសហសម័យថា៖ «ដោយសារចង់ឲ្យទម្រង់របាំនានាមានលក្ខណៈសម្បូរបែបតាមសម័យពោលគឺប្រែក្លាយជារបាំសហសម័យ ព្រោះថាយើងបានឈរទៅលើគោលការណ៍រួមមួយដោយខ្ញុំក៏ទទួលបានការប្រឹក្សា និងយល់ស្របពីថ្នាក់ក្រសួងវប្បធម៌ផងដែរ ចំពោះការច្នៃរបាំសហសម័យនេះគឺវាមានលក្ខណៈរួមរក្សាទម្រង់ដើម និងរកអ្វីបន្ថែមថ្មីលើរបស់ចាស់ឲ្យមានលក្ខណៈសម្បូររស់រវើក។ មិនថាតែរបាំរំដួលដែលខ្ញុំបាទបានយកមកច្នៃនេះទេ សូម្បីតែរបាំដទៃក៏យើងអាចច្នៃបង្កើតជារបាំសហសម័យបានដែរ»។
ក្រុមបុរសដែលសម្តែងរបាំរំដួលសហសម័យនាពេលហាត់សមសម្តែង។ រូបថត ហ្វេសប៊ុក
លោក ហង់ ភូមិរ៉ា ដែលជាប់ងារហៅថា «យាយកន្តែរ៉ែ» ធ្លាប់បានបង្កើតស្នាដៃធំមួយសម្រាប់អាជីពអ្នកសិល្បៈគឺការដឹកនាំក្រុមរបាំចម្រុះក្រមា ដែលមានក្រុមយុវជនចូលរួមចំនួនដល់ទៅ ១០១៤ នាក់កាលពីប្រារព្ធពិធីបើកកីឡាជាតិលើកទី ២ នាឆ្នាំ ២០១៨ កន្លងមកនោះបន្តថា៖ «ការច្នៃរបាំបុរាណទៅជារបាំសហសម័យនោះគឺមិនមែនយើងធ្វើឲ្យខូចទម្រង់របស់វាទេ គឺការបង្កើត និងបង្កើនឲ្យមានភាពទាក់ទាញ។ ខ្ញុំសូមទាញជាឧទាហរណ៍ទៅលើទម្រង់របាំល្ខោនខោលដែលជាជំនាញខ្ញុំឲ្យឃើញចុះ ប្រសិនបើយើងមិនបានរកវិធីថ្មីបន្ថែម ទៅលើទម្រង់ចាស់នៃរបាំល្ខោនខោលនោះទេ ច្បាស់ណាស់សម្រាប់អារម្មណ៍អ្នកទស្សនា ពិតជាមិនសូវចាប់អារម្មណ៍ឡើយ។ តែប្រសិនបើយើងប្រើវិធីប្លែកៗខ្លះដូចជា ឲ្យតួអង្គស្វា ប្រែមកសម្តែងមានកាយវិការស្និទ្ធស្នាលជាមួយទស្សនិកជនគឺចុះមកក្រោមឆាក លលេងនោះ ឬបង្កើតភាពក្រមិចក្រមើមតាមសភាពនៃតួអង្គស្វានោះគឺឃើញថាមានការទាក់អារម្មណ៍អ្នកទស្សនាសប្បាយរីករាយជាមួយនឹងទស្សនីយភាពនៃក្រុមរបាំជាងមុនដែរ នេះហើយហៅថាច្នៃបន្ថែមឲ្យថ្មីនោះ»។
ក្រុមស្ត្រីសម្តែងរបាំរំដួលសហសម័យនៅលើឆាកនាពេលកន្លងមក។ រូបថត ហ្វេសប៊ុក
ក្រោយពីច្នៃរបាំរំដួលបុរាណមកបែបជារបាំសហសម័យឲ្យមានលក្ខណៈប្លែក និងទទួលបានការកោតសរសើរពីគំនិតច្នៃប្រឌិតផ្នែកសិល្បៈរបាំ ដែលពុំមែនជាជំនាញឯកទេសខ្លួនមែនក្តីនោះក៏លោកគ្រូ ហង់ ភូមិរ៉ា មានគម្រោងការមួយទៀតនៅឆ្នាំ ២០២០ ផងដែរគឺការបង្កើតក្រុមរបាំចម្រុះខ្នាតធំឲ្យបានចំពេលបើកពិធីកីឡាថ្នាក់ជាតិលើកទី ៣ ម្តងទៀតទើបបានស្ងប់នូវសេចក្តីប្រាថ្នារបស់លោក។
លោកគ្រូ ហង់ ភូមិរ៉ា ហៅយាយកន្តែរ៉ែ ក៏បង្ហើបបន្ថែមថា៖ «ចំពោះខ្ញុំ នៅតែរក្សាចិត្តចង់សម្រេចគម្រោងការមួយទៀត បន្ទាប់ពីការដឹកនាំក្រុមរបាំក្រមាយុវជនដោយកាលនោះមានសមាជិកចូលរួមចំនួន ១០១៤ នាក់កាលបើកកម្មវិធីកីឡាថ្នាក់ជាតិលើកទី ២ នៅឆ្នាំ ២០១៨ នោះគឺការបង្កើតក្រុមរបាំចម្រុះ ដែលមានទ្រង់ទ្រាយធំ មានសមាជិកចូលរួមជាង ១០០០ នាក់ម្តងទៀត។ ម្យ៉ាងទៀតទម្រង់របាំចម្រុះនេះទាល់តែមានសមាជិកចូលរួមចាប់ពី ៥០០ នាក់ឡើងទៅទើបមានលក្ខណៈសមជារបាំចម្រុះល្អតាមទម្រង់»៕
លោក ហង់ ភូមិរ៉ា ហៅយាយកន្តែរ៉ែ គ្រូរបាំល្ខោនខោល។ ហ្វេសប៊ុក
