.jpg)
ក្រុម ជក់១ដើម បង្ហាញស្នាដៃសិល្បៈដែលផ្គុំឡើងពីសំរាមផ្សេងៗ។ ហុង មិនា
ភ្នំពេញ៖ កម្ទេចឈើ សំរាម និងក្រដាសកាសែតដែលត្រូវបានបោះចោល យកមកបិទកាវ និងតម្រៀបចេញជារូបភាពផ្សេងៗ ដើម្បីឲ្យកាន់តែមានភាពទាក់ទាញ និងជាការច្នៃប្រឌិតបែបថ្មី ក្រៅពីការគំនូរលើជញ្ជាំង របស់ក្រុម «ជក់ ១ ដើម» ចាប់ផ្តើមទទួលបានការគាំទ្រ បន្ទាប់ពីដាក់បង្ហាញនៅក្នុងបណ្តាញសង្គម។
អ្នកជំនាញខាងគូរគំនូរលើជញ្ជាំងជាង ១ ទសវត្សរ៍ ដែលគូបានគ្រប់ទម្រង់គំនូរជា 2D និង 3D លោក មែន បារាំង ដែលមានឈ្មោះពិត ហ៊ែល ធុច ជាប្រធានក្រុមនៃក្រុម ជក់ ១ ដើម បានថ្លែងមកភ្នំពេញប៉ុស្តិ៍ថា៖ «ខ្ញុំបានយកកម្ទេចឈើពុកៗ សំរាម កម្ទេចថ្មអាចម៍ផ្កាយ កន្ទុយបារី ក្រដាសកាសែត ដបទឹកសុទ្ធ ប្លាស្ទិក និងរបស់ផ្សេងៗទៀតដែលគេបានបោះចោល ហើយគិតថាវាប្រើការលែងបាន និងយកមកកែច្នៃជារូបផ្សេងៗ ដែលអាចមានតម្លៃ និងដាក់លក់នៅលើទីផ្សារបាន»។
អតីតនៃសមាជិកក្រុម សិល្បៈគំនូរលើជញ្ជាំងដែលបានបំបែកក្រុមមកមានកូនក្រុមត្រឹម ៣ ទៅ ៤ នាក់ ហៅថា ក្រុមជក់ ១ ដើម ដែលសមាជិកខ្លះនៃក្រុមជាអតីតនិស្សិតនៅសាកលវិទ្យាល័យភូមិន្ទវិចិត្រសិល្បៈបានបញ្ចប់ឈ្មោះជានិស្សិត ដើម្បីចាប់ជំនាញខាងគំនូរឲ្យកាន់តែច្បាស់កំពុងតែទទួលបានប្រជាប្រិយភាពខ្លាំង ទៅលើគំនូរលើជញ្ជាំង ការច្នៃវត្ថុផ្សេងៗ (សំរាម ប្លាស្ទិក និងកម្ទេចឈើ....) ដែលគេបោះចោលមកធ្វើជារូបភាពផ្សេងៗ និងគូរជាគំនូរទាក់ទងទៅនឹងបញ្ហាបរិស្ថាន។
លោក មែន បារាំង បានបន្តប្រាប់ពីមូលហេតុក្នុងការរៀបរបស់ដែលគេបានបោះចោលមកផ្គុំជារូបផ្សេងៗទៀតថា៖ «ទាក់ទងជាមួយនឹងគំនូរ និងចម្លាក់ នៅក្នុងស្រុកខ្មែរយើងមានគ្រប់សព្វអស់ហើយ។ ប៉ុន្តែចំពោះការដើរប្រមូលកម្ទេចកម្ទី សំរាមអីហ្នឹងនៅស្រុកខ្មែរយើងដូចជាមិនសូវឃើញមាន ហើយក៏គេមិនសូវឲ្យតម្លៃដែរ។ យើងក៏ចង់បង្កើតអ្វីៗដែលថ្មី ហើយក៏ចង់ដាស់គំនិតរបស់ប្រជានជនយើងឲ្យដឹងថា កម្ទេចកម្ទីទាំងអស់ហ្នឹងសុទ្ធតែមានតម្លៃទាំងអស់»។
សិល្បៈគំនូរផុសរូបបក្សីទំលើមែកឈើ និងផ្ទៃក្រោយជាក្រដាសកាសែត។ហុង មិនា
វាជាចំណាប់អារម្មណ៍ខាងជនបរទេសកុម្ម៉ង់ទិញជាហូរហែដែលលក់ចេញក្នុងតម្លៃ ២៥ ទៅ ៣០ ដុល្លារ សម្រាប់ជនបរទេស និង ១០ ទៅ ១៥ ដុល្លារសម្រាប់ភ្ញៀវក្នុងស្រុក។
គួរបញ្ជាក់ថា ការផ្គុំវត្ថុផ្សេងៗ (កម្ទេចឈើ សំរាម ប្លាស្ទិក...) ដែលគេបោះចោលនេះ អាចផ្គុំបាននៅលើជញ្ជាំងថ្ម ជញ្ជាំងដែក ផ្ទាំងថ្ម កញ្ចក់ និងលើប្រភេទជ័រ ដែលអាចបានជារូបផ្ទះ ដើមឈើ រុក្ខជាតិ សត្វ និង ប្រាសាទអង្គរវត្ត រួមទាំងរូបភាពផ្សេងៗទៀត ដោយអាចប្រើប្រាស់កាវបាន ៣ ប្រភេទ ដូចជា កាវទៀន កាវ 502 និងកាវបិទកញ្ចក់ និងបន្ថែមពណ៌ឲ្យស៊ីទៅនឹងរូបភាព ដែលទំហំ ៤០-៥០ សង់ទីម៉ែត្រ ប្រើរយៈពេលផ្គុំរហូតដល់ ២ ទៅ ៣ ម៉ោង ឬ ១ ថ្ងៃពេញ ទៅតាមប្រភេទរូបភាព។
ទាក់ទងនឹងការបើកសាលាបង្រៀនគូរគំនូរដោយមិនគិតថ្លៃ ប្រធានក្រុមជក់ ១ ដើម រូបនេះ បានបញ្ជាក់ថា លោកនឹងមានគម្រោងបើកនៅអំឡុងខែ មេសា និងឧសភា ខាងមុខនេះ ដោយមានលោកជាអ្នកគ្រប់គ្រង និងទទួលបានជំនួយពីមិត្តភក្តិជាជនជាតិជប៉ុន។
ស្ថាបនិកនៃក្រុមជក់ ១ ដើម លោក មែន បារាំង បានបន្ថែមថា៖ «ចំពោះការបើកសាលានេះ យើងទទួលបានជំនួយមកពីជនជាតិជប៉ុន ដែលគាត់បានផ្តល់ជាទីកន្លែង និងសម្ភារៈ ក៏ដូចជាថវិកា។ ចំណែកឯខ្ញុំ គឺជាអ្នកគ្រប់គ្រងដោយចាត់ចែងទាំងការបង្រៀន និងរកគ្រូមកបង្រៀន។ សាលានឹងទទួលសិស្សបែងចែកជា ២ គឺសិស្សដែលមានលទ្ធភាពក្នុងការបង់ថ្លៃសិក្សាក្នុង ១ ខែ ១០ ដុល្លារ និងសិស្សដែលគ្មានលទ្ធភាព ប៉ុន្តែមានបំណងចង់ក្លាយជាជាងគំនូរអាជីព»។
គំនូរដើមត្នោតរចនាបន្ថែមដោយកម្ទេចសំរាម។ហុង មិនា
ក្នុងការបង្រៀនត្រូវបែងចែកជា ៣ វគ្គធំៗ ដែល ១ វគ្គ ត្រូវចំណាយពេលដល់ ២ ទៅ ៣ ខែ ។ សម្រាប់វគ្គទី ១ ត្រូវរៀនអំពីខ្នាតរូបភាពគ្រប់ប្រភេទ វគ្គទី ២ រៀនអំពីរបៀបលាយពណ៌ និងវគ្គទី ៣ ជាវគ្គទ្រឹស្តី ដែលត្រូវមានទាំងវគ្គទី ១ និងវគ្គទី ២ បញ្ចូលគ្នា ព្រមទាំងអនុវត្តផ្ទាល់លើជញ្ជាំង ឬផ្ទាំងក្រណាត់ ដោយបង្រៀនតែថ្ងៃសៅរ៍ និងថ្ងៃអាទិត្យប៉ុណ្ណោះ។ វាបែងចែកជា ២ វេន ពេលព្រឹក និងពេលថ្ងៃ ដែលមាន ២ ម៉ោង។
លោក បារាំង បានបញ្ជាក់ពីការគិតតម្លៃសិក្សាលើសិស្សដែលមានជីវភាពធូរធារថា៖ «១០ ដុល្លារ ដែលយើងយកមកពីសិស្ស យើងបែងចែកជា ៣។ ទី ១ យើងទុកសម្រាប់ផ្គត់ផ្គង់ទឹក ភ្លើងក្នុងសាលា ទី ២ ត្រូវបែងចែកទៅដល់គ្រូបង្វឹកខ្លះ និងទី ៣ គឺត្រូវមានកញ្ចប់ថវិកាមួយសល់ពីការចំណាយទាំងអស់យកទុកនៅក្នុងហិប សម្រាប់យកមកទិញដូចជាអាហារ និងសម្ភាររៀនសូត្រ។ ក្នុងនាមខ្ញុំជាអ្នកគ្រប់គ្រង ខ្ញុំមិនប៉ះពាល់លុយទាំងនោះទេ ព្រោះយើងបានចុះកិច្ចសន្យាជាមួយដៃគូហើយ ហើយខ្ញុំក៏នឹងជួយទៅតាមលទ្ធភាពដែលខ្ញុំអាចជួយទៅបាន ដែលខាងជប៉ុនក៏មិនបានទាមទារអ្វីពីយើង គ្រាន់តែជាទឹកចិត្តដែលយើងចង់ជួយប៉ុណ្ណោះ»។
ដើម្បីឲ្យសិល្បៈគំនូរ និងការច្នៃប្រឌិតដោយយករបស់ផ្សេងៗដែលគេបោះចោលមកច្នៃជារូបផ្សេងៗនេះឲ្យកាន់តែប្លែក និងកាន់តែថ្មីជាងមុន លោក មែន បារាំង ក៏បានបន្ថែមទៀតថា៖ «ក្នុងពេលឆាប់ៗនេះ ខ្ញុំក៏គ្រោងថានឹងយកថង់ប្លាស្ទិកមករៀបធ្វើជាទីក្រុងមួយដែលពោរពេញដោយសំរាម ដែលយើងមានជារូបឡានស៊ីនទ្រី ធុងសំរាម មានមនុស្សដើរ មានអគារ ដែលប្រធានបទទាក់ទងនឹងបរិស្ថានទាំងអស់ ហើយក៏សង្ឃឹមថា ប្រជាជនយើងនឹងឃើញរូបភាពនេះហើយនឹកឃើញដល់បរិស្ថានរបស់យើង និងជួយការពារបរិស្ថានឡើងវិញ»។
លោក បារាំង បានបញ្ជាក់ថា «ខ្ញុំក៏នឹងផ្សព្វផ្សាយពីការយកប្រភេទកម្ទេចឈើ ឬសំរាមដើម្បីផ្គុំក្នុងហាងផ្សេងៗ ដែលរូបភាពផ្គុំទាំងនោះ យើងអាចរក្សាទុកបានរហូតដល់ ២ ទៅ ៣ ឆ្នាំ ឬលើសពីនេះ។ បើសិនជាម្ចាស់ហាងថែបានល្អ លើកលែងតែឈូសចោលប៉ុណ្ណោះ បើត្រឹមតែយកអំបោសស្លាបមាន់មកបោស វាមិនអាចជ្រុះនោះទេ»៕
