.jpg)
ការចែកចាយសាប៊ូដល់កុមារ ជួយដល់ការអប់រំ និងការពារជំងឺ។ រូបថត សហការី
សៀមរាប៖ Eco-Soap Bank (ESB) ជាឈ្មោះគម្រោងមូលដ្ឋាននៅខេត្ដសៀមរាប បំណងធ្វើឲ្យប្រសើរឡើងចំពោះបរិស្ថានដោយការប្រមូលសាប៊ូប្រើរួចពីសណ្ឋាគារ ផ្ដល់ការងារដល់ស្ដ្រីងាយរងគ្រោះជាអ្នកផលិតសាប៊ូ និងបរិច្ចាគសាប៊ូច្នៃរួចទៅដល់កុមារក្រីក្រទូទាំងសកលលោក កំពុងបោះជំហានធ្វើកិច្ចការមនុស្សធម៌ជាង ១០ ប្រទេសនៅទូទាំងពិភពលោក។
ក្រៅពីប្រតិបត្ដិការចម្បងនៅសៀមរាប ESB បានចុះបញ្ជីជាអង្គការនៅសហរដ្ឋអាមេរិក និងកំពុងដំណើរការកិច្ចការសប្បុរសនៅក្នុងប្រទេស ឡាវ នេប៉ាល់ រវ៉ាន់ដា តង់ហ្សានី កេនយ៉ា អាហ្វ្រិកខាងត្បូង សៀរ៉ាឡេអូន លីបង់ អ៊ូហ្គង់ដា និងស្វាស៊ីឡង់។
លោក Samir Lakhani ស្ថាបនិក ESB បានឲ្យដឹងថា៖ «មិនគួរមានកុមាររងគ្រោះព្រោះបញ្ហាខ្វះសាប៊ូនោះទេ ពីព្រោះសាប៊ូប្រមាណ ៥ លានដុំ ត្រូវបានបោះចោលពីសណ្ឋាគាររៀងរាល់ថ្ងៃ។ ក្នុងពេលឆាប់ៗ យើងបន្ដទៅកាន់ បង់ក្លាដែស ឥណ្ឌា អេហ្ស៊ីប និងលីប៊ើរី។ យើងមានមោទនភាពដែលបានផ្ដើមចលនាពិភពលោកដ៏ថ្លៃថ្លានៅកម្ពុជា»។
បច្ចុប្បន្ន សាប៊ូកែច្នៃត្រូវបានបរិច្ចាគដល់កុមារសិស្សសាលាជាង ១ លាននាក់ នៅជុំវិញពិភពលោកតាមរយៈអង្គការ និងសប្បុរសជននានា ខណៈនៅកម្ពុជាការចែកចាយបានចំនួនប្រមាណ ៦០ ម៉ឺនដុំ។
គម្រោង Eco-Soap Bank ត្រូវបានបង្កើតឡើងក្នុងឆ្នាំ ២០១៤ នៅពេលនិស្សិតស្ម័គ្រចិត្ដអាមេរិក Samir Lakhani ធ្វើការក្នុងអង្គការអ្នកត្រួសត្រាយកម្ពុជា (TCO) លើការជីកស្រះត្រីនៅភាគខាងជើងកម្ពុជា។
ពេលបំពេញការងារលោក Samir បានឃើញអ្នកម្ដាយម្នាក់យកសាប៊ូម្សៅងូតទឹកដុសឲ្យកូន។ ទិដ្ឋភាពនេះបានធ្វើឲ្យលោកភ្ញាក់ផ្អើល រួចក៏គិតពីលទ្ធភាពជួយពួកគេ។
លោក Samir អាយុ ២៧ ឆ្នាំ បាននិយាយថា៖ «ខ្ញុំចាប់ផ្ដើមការងារស្ម័គ្រចិត្ដដំបូងពេលអាយុ ២២ ឆ្នាំ។ ខ្ញុំដឹងថា នេះជាទង្វើខ្វះអនាម័យ។ ខ្ញុំចាំបានថា ស្ដ្រីក្នុងភូមិនោះបានងូតទឹក និងប្រើសាប៊ូម្សៅដុសឲ្យកូន»។
លោក Samir Lakhani ស្ថាបនិក Eco-Soap Bank។ រូបថត សហការី
ត្រឡប់ទៅសណ្ឋាគារវិញ លោកបានដឹងថា សាប៊ូក្នុងបន្ទប់ស្នាក់នៅត្រូវបានផ្លាស់ប្ដូររៀងរាល់ថ្ងៃ ទោះបីជាប្រើអស់តែបន្ដិចក៏ដោយ។ នៅថ្ងៃបន្ទាប់ លោកបានជិះកង់ជុំវិញក្រុងសៀមរាបតាមសណ្ឋាគារគ្រប់ច្រកល្ហក ដើម្បីសុំសាប៊ូទាំងនោះ។
លោក Samir និយាយថា៖ «យើងបានចុះបញ្ជីជាអង្គការអន្ដរជាតិក្នុងឆ្នាំ ២០១៥ ពេលយើងផ្ដើមទទួលសំណើពីរដ្ឋាភិបាល និងសណ្ឋាគារនៃប្រទេសនីមួយៗជុំវិញពិភពលោកឲ្យធ្វើកិច្ចការស្រដៀងគ្នានេះក្នុងប្រទេសពួកគេ។ ពួកគេគាំទ្រគម្រោងដោយសារទទួលស្គាល់ពីអត្ថប្រយោជន៍បរិស្ថាន និងសុខភាព ជាពិសេស ឱកាសការងារសម្រាប់ស្ដ្រី»។
ក្នុងឆ្នាំ ២០១៧ លោក Samir គឺជាវីរជនម្នាក់ចំណោម ១០ នាក់ នៃកម្មវិធី CNN''s Hero ប្រចាំឆ្នាំ ដែលទទួលស្គាល់កិច្ចការផ្លាស់ប្ដូរសង្គម។
ការកែច្នៃសាប៊ូ
ការប្រមូលសាប៊ូចាស់ៗត្រូវធ្វើឡើងតាមសណ្ឋាគារ ដែលបច្ចុប្បន្នមានចំនួនជាង ៤០០ ទីតាំង ទាំងនៅក្រុងសៀមរាប ភ្នំពេញ និងបាត់ដំបង រួចសម្លាប់មេរោគ និងសម្អាតកម្ទេចដីជាដើម។ បន្ទាប់មក បុគ្គលិកភាគច្រើនជាស្ដ្រីងាយរងគ្រោះ កិនសាប៊ូនឹងម៉ាស៊ីនជាម្សៅ រួចលាយទឹក កៀបចូលពុម្ព និងកាត់ជាដុំតូចៗ មុននឹងហាលសម្ងួត ១ សប្ដាហ៍។
លោក មាន លុច្ស ប្រធានគម្រោង Eco-Soap Bank នៅកម្ពុជា បានឲ្យដឹងថា៖ «ជំហានដំបូងយើងយកសាប៊ូដែលប្រមូលបានពីសណ្ឋាគារផ្ទះសំណាក់ផ្សេងៗ មកដុសរូសវាសិន ដើម្បីសម្អាតក្អែលសក់។ ជ្រលក់ទឹកថ្នាំសម្លាប់មេរោគរួចដាក់ហាល ២-៣ ថ្ងៃ ដាក់ក្នុងម៉ាស៊ីនឈូសទឹកកកចេញជាសន្លឹកស្ដើងៗ រួចកិនម្ដងទៀត ជាម្សៅក្រោយពេលបែងចែកទៅតាមពណ៌សាប៊ូ»។
សណ្ឋាគារ ៤០០ទីតាំងបានចូលរួមផ្ដល់សាប៊ូ។ រូបថត សហការី
លោកបន្ដថា៖ «ពេលវាក្លាយជាម្សៅយើងយកវាមកលាយជាមួយទឹក [បន្ថែមប្រេងក្លិន និងម្សៅសរីរាង្គសម្រាប់ការនាំចេញទៅអាមេរិក។ ថ្លឹង សង្កត់ក្នុងពុម្ពទំហំប្រហែលឥដ្ឋតាន់ រួចកាត់ជា ៣ ដុំ មុនពេលបោះត្រាស្លាកសញ្ញា និងចិតក្បាច់]។ ចំពោះការផលិតសម្រាប់ចែកចាយ យើងកាត់វាជា ៨ ដុំ រួចច្រកដាក់ក្នុងកេស»។
លោក Samir Lakhani បានប្រាប់ ភ្នំពេញ ប៉ុស្ដិ៍ ថា៖ «សណ្ឋាគារក៏ទទួលបាននូវចំណាប់អារម្មណ៍វិជ្ជមានពីភ្ញៀវ ចំពោះការចូលរួមជួយសង្គម។ ភ្ញៀវទេសចរជាច្រើនមកកម្ពុជា និងបានសួរថា តើសណ្ឋាគារពួកគេស្នាក់នៅបានចូលរួមយុទ្ធនាការកែច្នៃសាប៊ូឬទេ?។ សណ្ឋាគារធ្វើការជាមួយយើង បានកាត់បន្ថយសំរាមរាប់ពាន់គីឡូក្រាម ហើយពេលនេះ យើងក៏ប្រមូលសម្ភារជាក្រណាត់ និងក្រដាសបង្គន់សេសសល់ផងដែរ»។
អតីតជាអ្នករត់តុនៅភោជនីយដ្ឋានអាហារបួសក្នុងក្រុងសៀមរាប កញ្ញា ហាក់ ហ៊ុន ជាអ្នកផលិតសាប៊ូ ESB បាននិយាយថា៖ «កាលខ្ញុំនៅធ្វើការភោជនីយដ្ឋាន យើងបម្រើភ្ញៀវតិចតួចតែបើនៅទីនេះខ្ញុំចេះច្រើន។ ចេះទាំងរបៀបធ្វើសាប៊ូ ចេះដឹងពីការចុះយកសាប៊ូតាមអូតែល ស្នើលុយ របៀបទិញអីវ៉ាន់តាមផ្សារ និងចុះភូមិបង្រៀនក្មេងៗពីរបៀបលាងដៃទៀត»។
លទ្ធភាពចែកចាយ
ដោយសារមិនមានមូលនិធិគ្រប់គ្រាន់សម្រាប់ការចែកចាយខ្លួនឯង ESB បានបរិច្ចាគសាប៊ូតាមរយៈអង្គការ និងអ្នកស្ម័គ្រចិត្ដនានា ដែលបន្ដបង្ហាត់បង្ហាញកុមារពីបញ្ហាអនាម័យ និងលាងដៃសម្អាត។
លោក លុច្ស បានឲ្យដឹងថា៖ «យើងមានការលំបាកចំពោះលទ្ធភាពចែកចាយសាប៊ូកែច្នៃរួច។ យើងសុំឲ្យមានអង្គការផ្សេងៗទាក់ទងមកដើម្បីយកសាប៊ូទៅចែកចាយតាមសហគមន៍ និងសាលារៀនឲ្យបានទូទាំងប្រទេសជាពិសេសដល់កុមារក្រីក្របានប្រើប្រាស់។ យើងក៏រំពឹងទទួលបានការបរិច្ចាគ ដើម្បីទ្រទ្រង់មូលនិធិ»។
សាប៊ូប្រមូលតាមសណ្ឋាគារ ត្រូវបានស្ត្រីច្នៃផលិតឡើងវិញសម្រាប់នាំចេញទៅបរទេស។ហុង មិនា
ជាមួយបំណងផ្ដល់សាប៊ូដល់កុមារ ២,៥ លាននាក់ នៅឆ្នាំក្រោយ ESB បានឲ្យដឹងថា ពួកគេទទួលការបរិច្ចាគនៅទីតាំងសិប្បកម្ម និង PayPal។
លោក Samir បន្ដថា៖ «ចក្ខុវិស័យវែងឆ្ងាយរបស់យើងចង់ដាក់សាប៊ូគ្រប់សាលារៀនទាំងអស់ក្នុងប្រទេស កម្ពុជា។ ការវិនិយោគលើអនាម័យសម្រាប់កុមារ កាត់បន្ថយអត្រាការបោះបង់សាលា និងជំងឺ»។
លោករំពឹងថា អង្គការកាន់តែច្រើននឹងសហការជាមួយ TCO/ESB ដើម្បីទទួលបានសាប៊ូ ៥០ ដុំឥតគិតថ្លៃ។ ព័ត៌មានលម្អិត ទំនាក់ទំនងទូរស័ព្ទ លេខ ០៨៥ ៥០១ ២៨៦ ឬអ៊ីមែល pm@ecosoapbank.org»៕
វីដេអូ៖
