.jpg)
កញ្ញា យូរី និងក្រុមរាំបទ ស្វាបាប៊ូ។ Yousos Apdoulrashim
ភ្នំពេញៈ ជាមួយរូបសម្រស់ផូរផង់បែបយុវវ័យ តារាចម្រៀងសាច់សខ្ចីនៅទ្រនំសាន់ដេ កញ្ញា ឆាយ យូរី នៅប៉ុន្មានឆ្នាំចុងក្រោយនេះបានអង្រួនឆាកតន្ត្រី និងក្ដាប់បានជោគជ័យលើអាជីពចម្រៀងមិនណយទេ។
យ៉ាងណាមិញ តារាស្រីទាំងវ័យក៏ខ្ចីល្វក់ ហើយសម្ផស្សក៏អំណោយផលរូបនេះ ហាក់ពុំទាន់ស្រវាបានតំណែងតួសម្ដែងក្នុងខ្សែភាពយន្តណាមួយឡើយ ទាំងរូបនាងផ្ទាល់ក៏លាន់មាត់ថា ប្រាថ្នាអាជីពសម្ដែងដែរតែពុំស្វាក់បានមួយរឿងសោះ។
ក្នុងជំនួបជាមួយ ភ្នំពេញប៉ុស្ដិ៍ នាថ្ងៃសម្ពោធភាពយន្តរឿង «បិសាចគំនូរ» កាលពីដើមសប្ដាហ៍ ស្រីស្រស់ យូរី និយាយថា៖ «ក្រៅពីអាជីពជាតារាចម្រៀង យូរី ផ្ទាល់ក៏ចង់ចាប់អាជីពជាតារាសម្តែងដែរ ហើយអាចសម្តែងបានគ្រប់ប្រភេទមិនថា សម្តែងជាតួស្លូត តួកាច តួក្រមិចក្រមើម ឬតួទឹកភ្នែកអីគឺ យូរី ធ្វើបានទាំងអស់»។
ទោះយ៉ាងណាក្ដី តារាស្រីខ្ចីល្វក់ ដែលល្បីចាកចោលអតីតសង្សាររួមខ្នើយជាអ្នកដឹកនាំសម្ដែងលោក រ៉េត ទៅលួចបង្កាត់ភ្លើងស្នេហ៍នឹងដៃគូសិល្បៈថ្មីលោក ប៊ីម៉ូ នោះ ក៏បានបន្តប្រាប់ពីបំណងប្រឡូកក្នុងវិស័យសម្ដែងភាពយន្តផងដែរថា៖ «ចំពោះតំណែងជាតួឯក ឬជាតួអ្វី ដែល យូរី នឹងសម្តែងនោះ យូរី ក៏មិនអាចឆ្លើយបានដែរ ដោយសារមិនទាន់មានម្ចាស់ផលិតកម្មភាពយន្តទាក់ទងឲ្យទៅសម្តែងនៅឡើយទេ»។
ដោយសារភាពថា ពុំទាន់មានទីផ្សារសម្ដែងសោះ តារាចម្រៀង ដែលទើបបញ្ចេញបទ «ស្វាបាប៊ូ» ជាមួយការស្លៀកពាក់រយ៉េរយ៉ៃដូចមនុស្សព្រៃ និងចង្វាក់រាំអមដោយស្វាធំយ៉ាងប្លែកភ្នែក កញ្ញា យូរី ក៏បានធ្វើឲ្យមជ្ឈដ្ឋានខ្លះសន្និដ្ឋានថា អាចដោយសារនាងមិនទាន់ចប់កុងត្រាជាមួយផលិតកម្មសាន់ដេនៅឡើយ ទើបបណ្ដាម្ចាស់ផលិតកម្មភាពយន្តនានាមិនទាន់ហ៊ានទាក់ទងឲ្យនាងសម្ដែងកុនក៏ថាបាន។
យ៉ាងណាក៏ដោយ ខណៈនាងទើបប្រកាសទទួលការសម្ដែងភាពយន្ត តែក្រឡេកមើលវិស័យចម្រៀងវិញ តារាស្រីនិយមលេងស្តាយឃ្យូតៗ កញ្ញា យូរី បានទាក់ទាញការគាំទ្រច្រើនសម្រាប់បទចម្រៀង «ស្វាបាប៊ូ» ជាមួយឈុតឆាកប្លែកៗរាំនៅក្នុងព្រៃ។ បទនេះត្រូវបានដឹកនាំសម្តែងដោយលោក ប៊ីម៉ូ (Bmo) ដែលល្បីថាមានទំនាក់ទំនងស្នេហាជាមួយស្រីស្រស់ យូរី នោះ។
កញ្ញា យូរី ក៏រំពឹងដែរថា៖ «បទនេះផ្ទាល់មិនទាន់បានចេញជា MV ទេទើបតែដាក់ផ្សាយ Trailer ជាផ្លូវការប៉ុណ្ណោះតែឃើញថាមានការចុច Like នឹងស៊ែរច្រើនមែនទែន។ ចំណែកឯ MV បទហ្នឹង នឹងចេញនៅប៉ុន្មានថ្ងៃខាងមុខនេះហើយ»។
តារាចម្រៀងរូបនេះ ក៏ត្រូវបានគេសង្កេតឃើញថា ចាប់ផ្តើមឡើងកូដខ្លាំងតាំងពីចេញបទ «ចាក់ទឹកដូង» នារដូវចូលឆ្នាំ ២០១៧ ធ្វើឲ្យកក្រើកអ្នកគាំទ្រទាំងក្នុង និងក្រៅប្រទេស។ បទចម្រៀងដែលសុទ្ធតែជាបទផ្ទុះរបស់នាង រួមមានបទ ទឹកហូរក្រោមស្ពាន, ក្បាច់ទា និងបទនំបុ័ងប៉ាតេ ជាដើម៕
